އެވަޓަނުގެ ޒުވާން ފޯވާޑް ކީން ޕީއެސްޖީއަށް

އެވަޓަނަށް ކުޅެމުން އަންނަ އިޓަލީގެ ޒުވާން ފޯވާޑް މޮއިސް ކީން ޕީއެސްޖީއަށް ސޮއިކޮށްފިއެވެ.

އުމުރުން 20 އަހަރުގެ ފޯވާޑް ޕީއެސްޖީއާ ގުޅުނީ ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށެވެ.

ޕީއެސްޖީއާ ގުޅުމަށްފަހު ކީން ބުނީ ޕީއެސްޖީއަށް ބަދަލުވެވުމަކީ އޭނާއަށް ފަޚުރެއް ކަމަށެވެ. އަދި ޕީއެސްޖީއަކީ ދުނިޔޭގައި މިވަގުތު އޮތް އެންމެ މޮޅު އެއް ކުލަބު ކަމަށާއި، މިދިޔަ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލުގައި ވާދަކޮށް އެ ކުލަބުން އެކަން ސާބިތުކޮށްދީފައިވާ ކަމަށެވެ. އަދި ދުނިޔޭގައި މިވަގުތު ތިބި އެންމެ މޮޅު ކުޅުންތެރިންނާއެކު ޕީއެސްޖީގައި ރަނގަޅު ކުޅުމެއް ދެއްކުމަށް ބޭނުންވާ ކަމަށްވެސް ކީން ބުންޏެވެ.

ޕީއެސްޖީން ކީންގެ ސޮއި ހޯދިއިރު، އޭނާ އެންމެ ފުރަތަމަ ވިދާލީ ފުޓްބޯޅަ ކެރިއަރު ފެށި ޓީމު ކަމަށްވާ ޔުވެންޓަސްއިންނެވެ. އެގޮތުން ޔުވެންޓަސްއަށް ކުޅެދިން 21 މެޗުގައި އަށް ލަނޑު ޖެހި ކީން ވަނީ އެ ޓީމާއެކު އިޓާލިއަން ލީގު ދެ ފަހަރު އަދި އިޓާލިއަން ކަޕް ކާމިޔާބުކޮށްފައެވެ.

އޭގެ ފަހުން މިދިޔަ އަހަރު ކީން އެވަޓަނާ ގުޅުނީ ފަސް އަހަރުގެ އެއްބަސްވުމެއްގެ ދަށުން 27.5 މިލިޔަން ޔޫރޯއަށެވެ. އެކަމަކު އެވަޓަނުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މިހާތަނަށް އެވަޓަނަށް ކުޅެދިން 37 މެޗުގައި ކީންއަށް ކާމިޔާބުކުރެވިފައިވަނީ އެންމެ ހަތަރު ލަނޑެވެ.

ލޯނު އުސޫލުން ޕީއެސްޖީން ކީންގެ ސޮއި ހޯދިއިރު، އެ ޓީމުން މި ޓްރާންސްފާ ބާޒާރުގައި ވަނީ ލޯނު އެއްބަސްވުމެއްގެ ދަށުން ރޯމާއަށް ކުޅެމުން އައި އިޓަލީގެ ޑިފެންޑަރު އަލެސަންދްރޯ ފްލޮރެންޒީ އާއި ޕޯޓޯއަށް ކުޅެމުން އައި ޕޯޗުގަލުގެ މިޑްފީލްޑަރު ޑެނީލޯ ޕެރޭރާގެ ސޮއިވެސް ހޯދާފައެވެ.