ޔުނައިޓެޑުގެ ޑަލޮޓް މިލާނަށް ސޮއިކޮށްފި

މެންޗެސްޓާ ޔުނައިޓެޑަށް ކުޅެމުން އައި ޕޯޗުގަލުގެ ޒުވާން ޑިފެންޑަރު ޑިއޭގޯ ޑަލޮޓް އޭސީ މިލާނަށް ސޮއިކޮށްފިއެވެ.

އުމުރުން 21 އަހަރުގެ ޑިފެންޑަރު މިލާނާ ގުޅުނީ ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށެވެ.

ޕޯޓޯ ދޫކޮށް 2018 ވަނަ އަހަރު 19 މިލިޔަން ޕައުންޑަށް ޔުނައިޓެޑާ ގުޅުނު ޑަލޮޓަށް އެ ޓީމުގައި އެންމެ އެދެވޭ ކުޅުމެއް ދެއްކިފައި ނުވާއިރު، ޔުނައިޓެޑުގެ ފުރަތަމަ އެގާރައިން އޭނާއަށް ފުރުސަތު ލިބިފައިވަނީ މަދު މެޗުތަކެއްގައެވެ. އެގޮތުން މިހާތަނަށް ޑަލޮޓް ޔުނައިޓެޑަށް ކުޅެދީފައިވަނީ އެންމެ 35 މެޗެވެ.

މިލާނަށް ސޮއިކުރުމަށްފަހު ޑަލޮޓް ބުނީ ބުރަ މަސައްކަތްތަކެއް ކޮށް އޭނާގެ އަސްލު ފެންވަރު މިލާނުގައި ދައްކަން މަސައްކަތް ކުރާނެ ކަމަށާއި، އެކަން ކުރެވޭނެ ކަމުގެ ފުރިހަމަ ޔަގީންކަން އޭނާއަށް އެބައޮތް ކަމަށެވެ. އަދި މީގެ ކުރިން އަނިޔާގެ މައްސަލަތަކެއް ކުރިމަތިވި ނަމަވެސް، މިހާރު އޭނާ ހުރީ އެއްކޮށް ފިޓްކޮށް ކަމަށާއި، މިލާނުގެ ފަހަތް ބެލެހެއްޓުމުގައި އޭނާއަށް މުހިންމު ދައުރެއް އަދާކުރެވޭނެ ކަމަށްވެސް ވަނީ ބުނެފައެވެ.

ޔުނައިޓެޑުގެ ލޯނު އެއްބަސްވުމެއްގެ ދަށުން ޑަލޮޓް މިލާނަށް ސޮއިކުރިއިރު، މި ސީޒަނުގައި އޭނާ ވަނީ ޔުނައިޓެޑަށް އެއް މެޗު ކުޅެދީފައެވެ. އެއީ އިނގިރޭސި ލީގު ކަޕުގައި މިދިޔަ ބުދަ ދުވަހު ބްރައިޓަން އަތުން 3-0 ން ޔުނައިޓެޑް މޮޅުވި މެޗެވެ.

ޔުނައިޓެޑާއެކު ޑަލޮޓަށް އެއްވެސް ކާމިޔާބީއެއް ހޯދިފައިނުވި ނަމަވެސް، އޭނާ ވަނީ ޕޯޓޯއާއެކު 2017-2018 ވަނަ ސީޒަނުގެ ޕޯޗުގަލް ލީގު ކާމިޔާބުކޮށްފައެވެ.