މަސްތުވާތަކެތީގެ ވިޔަފާރި ކުރާ މީހުންނަށް މި ސަރުކާރުން ސިޔާސީ ހިމާޔަތެއް ނެތް: މިނިސްޓަރ
4 އޮކްޓޯބަރު 2020 | އާދީއްތަ 08:24ގާތްގަނޑަކަށް 88 ކިލޯގެ މަސްތުވާތަކެތި އަތުލައިގެންފައިވާކަން މިނިސްޓަރ ފާހަގަ ކުރެއްވި
ހޯމް މިނިސްޓަރ ޝެއިޙް އިމްރާން އަބްދުﷲ- މިނިސްޓަރ ވަނީ ދިވެހި ފުލުހުންނަށް ތައުރީފު ކުރައްވާފައި
މަސްތުވާތަކެތީގެ ވިޔަފާރި ކުރާ މީހުންނަށް މި ސަރުކާރުން ސިޔާސީ ހިމާޔަތެއް ނުދޭނެ ކަމަށް ހޯމް މިނިސްޓަރ ޝެއިޙް އިމްރާން އަބްދުﷲ ވިދާޅުވެއްޖެއެވެ.
އައްޑޫގައި ހިންގި އޮޕަރޭޝަނެއްގައި 80 ކިލޯއަށްވުރެ ގިނަ މަސްތުވާތަކެތި އަތުލައިގެންފައިވާއިރު، އެކަމާ ގުޅިގެން އާދިއްތަ ދުވަހު މިނިސްޓަރ އިމްރާން ކުރެއްވި ޓްވީޓެއްގައި ވިދާޅުވީ، މަސްތުވާތަކެތީގެ ސަޕްލައި މަދު ކުރުމުގެ މަސައްކަތް މިހާރު ކާމިޔާބު ކުރެވެނީ އެފަދަ ވިޔަފާރި ކުރާ މީހުންނަށް މި ސަރުކާރުން ސިޔާސީ ހިމާޔަތް ނުދޭތީ ކަމަށެވެ.
އޭގެ އިތުރުން، މި އޮޕަރޭޝަންގައި ގާތްގަނޑަކަށް 88 ކިލޯގެ މަސްތުވާތަކެތި އަތުލައިގެންފައިވާކަން ފާހަގަ ކުރައްވައި މިނިސްޓަރ ވިދާޅުވީ، މި އޮޕަރޭޝަން ހިންގާފައިވަނީ ފުލުހުންގެ ޑީއީޑީއާއި އެކި ފަންނުތަކުގެ ޤާބިލުކަމުގެ ބޭނުން ކޮށްގެން ކަމަށެވެ.
އައްޑޫގައި ހިންގި އޮޕަރޭޝަނަށް ފަހު އެ މައްސަލައިގެ ތަހުޤީޤު މިހާރު ފުލުހުން ދަނީ ކުރަމުންނެވެ. އެގޮތުން އެ މައްސަލައިގެ ފަހުގެ ތަފްސީލުތައް ހިއްސާ ކުރައްވައި އާދިއްތަ ދުވަހު ހަމީދު ޕޮލިސް ކޮމިޝަނަރ ވިދާޅުވެފައިވަނީ މިއީ ރާއްޖޭގެ އިންޓެލިޖެންސް އާއި ފުލުހުން ހިންގި އޮޕަރޭޝަނެއް ކަމަށެވެ.
މިއީ ފުލުހުންގެ ޑްރަގް އެންފޯސްމަންޓް ޑިޕާރޓްމަންޓާއި، ޑެރަގް އިންޓެލިޖެންސް ޔުނިޓު އަދި ޑިވިޜަނަލް އިންޓެލިޖެންސް ޑިޕާރޓްމަންޓުގެ އިތުރުން، މެރިން ޕޮލިސް އަދި ދެކުނު ފުލުހުން ގުޅިގެން ހިންގި ޚާއްސަ އޮޕަރޭޝަނެއް ކަމަށް ސީޕީ ވަނީ ވިދާޅުވެފައެވެ.
