އުރުގުއޭގެ ފޯވާޑް އެޑިންސަން ކަވާނީ މެންޗެސްޓާ ޔުނައިޓެޑަށް ސޮއިކުރުމަށް ނިންމާފައިވާ ކަމަށް ރިޕޯޓުތައް ބުނެފިއެވެ.

އުމުރުން 33 އަހަރުގެ ކަވާނީ ޕީއެސްޖީއާއެކު ހަދާފައިވާ އެއްބަސްވުން މިއަހަރުގެ ޖޫން މަހު ހަމަވިއިރު، މިހާތަނަށް އޭނާ ކުލަބަކާ ގުޅިފައެއް ނުވެއެވެ.

ރިޕޯޓުތައް ބުނާ ގޮތުން ކަވާނީ ހޯދުމަށް ޔުނައިޓެޑުން މިހާރު އަންނަނީ އޭނާގެ އޭޖެންޓާ މަޝްވަރާ ކުރަމުންނެވެ. އަދި ޔުނައިޓެޑާ ގުޅުމަށް ކަވާނީ އަމިއްލައަށް ނިންމާފައިވާ ކަމަށާއި، ޔުނައިޓެޑާއެކު ދެ އަހަރުގެ އެއްބަސްވުމެއް ކަވާނީ ހަދާނެ ކަމަށްވެސް ވަނީ ރިޕޯޓުކޮށްފައެވެ.

ޔުނައިޓެޑުން ކަވާނީއަށް އަހަރަކު 8 މިލިޔަން ޕައުންޑުގެ މުސާރައެއް ދިނުމަށް ހަށަހަޅާފައިވަނީ ނަމަވެސް، ކަވާނީ ބޭނުންވަނީ އަހަރަކު 10 މިލިޔަން ޕައުންޑް ލިބޭނެހެން އެއްބަސްވުން ހެދުމަށް ކަމަށް ރިޕޯޓުތައް ބުނެއެވެ.

ޔުަނއިޓެޑުން ކަވާނޯ ހޯދުމަށް މަސައްކަތް ކުރަމުން އަންނައިރު، މީގެ ކުރިން މި ސީޒަނުގެ އިނގިރޭސި ޕްރިމިއާ ލީގަށް ޕްރޮމޯޓުވި ލީޑްސް ޔުނައިޓެޑުންވެސް ވަނީ ކަވާނީއަށް ޝައުގުވެރިކަން ފާޅުކޮށްފައެވެ.

އިޓަލީގެ ނާޕޮލީން 2013 ވަނަ އަހަރު ޕީއެސްޖީއާ ގުޅުނު ކަވާނީ އެ ކުލަބު ދޫކޮށްލާފައިވާއިރު، އޭނާ ވަނީ ޕީއެސްޖީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޕީއެސްޖީއަށް ކުޅެދިން 301 މެޗުން 200 ލަނޑު ޖަހައިދީފައިވާ ކަވާނީ ވަނީ ޕީއެސްޖީއާއެކު ފްރެންޗް ލީގު ހަ ފަހަރު ހޯދާފައެވެ. އަދި ވަނީ އެ ކުލަބާއެކު ފްރެންޗް ކަޕް ހަތަރު ފަހަރު އަދި ފްރެންޗް ލީގު ކަޕް ފަސް ފަހަރު ކާމިޔާބުކޮށްފައެވެ.