އިކޮނަމިކް ރެސްޕޯންސަށް 1000 މިލިއަނަށްވުރެ ގިނަ ރުފިޔާ ހަރަދުކޮށްފި
އެންމެ ގިނަ ހަރަދެއް ހިނގާފައިވަނީ ރިކަވަރީ ލޯނަށް
ފިހާރައެއްގެ ތެރޭގައި އާންމުން އެއްވެހި ގަންނަން ގޮސް ކިއު ޖެހިގެން
ކޮވިޑް-19 ފެތުރެން ފެށިފަހުން އިކޮނަމިކް ރެސްޕޯންސަށް 1000 މިލިއަނަށް ވުރެ ގިނަ ރުފިޔާ ހަރަދުކޮށްފިއެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން، މިހާތަނަށް 1013.7 މިލިއަން ރުފިޔާ ވަނީ ހަރަދުވެފައެވެ. މިއީ މިދިޔަ މަހުގެ 24 ވަނަ ދުވަހާ ހަމައަށް ހަރަދުކޮށްފައިވާ އަދަދެވެ. މި 1013.7 މިލިއަން ރުފިޔާގެ ތެރެއިން އެންމެ ބޮޑުބައެއް ހޭދަ ކޮށްފައިވަނީ ކޮވިޑް-19 ރިކަވަރީ ލޯން ސްކީމަށެވެ. އެގޮތުން ލޯން ސްކީމްތަކަށް މިހާތަނަށް އައި އިރު 900 މިލިއަން ރުފިޔާ ވަނީ ހަރަދުކޮށްފައެވެ.
ކޮވިޑް-19 ރިކަވަރީ ލޯން ސްކީމް ދެނީ ރާއްޖޭގައި ރަޖިސްޓްރީކޮށްފައިވާ ރިސޯޓްތައް އަދި ވިޔަފާރިތަކުގެ ތެރެއިން 2019 ވަނަ އަހަރު 10 މިލިއަން ރުފިޔާއަށްވުރެ އިތުރަށް އާމްދަނީ ލިބިފައިވާ ވިޔަފާރިތަކުން ކޮވިޑް-19 ގެ ބަލިމަޑުކަމާ ގުޅިގެން މާލީ ގޮތުން ނޭދެވޭ އަސަރުކޮށްފައިވާނަމައެވެ. އަދި މި ސްކީމްގެ ދަށުން ލޯނު ދޫކުރުމަށް ހަމަޖެހިފައިވަނީ ރަހުނަކާ ނުލައި %6 އިންޓަރެސްޓްގައި، ގިނަވެގެން 6 މަސް ދުވަހުގެ ގްރޭސް ޕީރިއަޑްއަކާ އެކުއެވެ.
ރިވަރީ ލޯންގެ ގޮތުގައި މިހާތަނަށް ބީއެމްއެލް މެދުވެރިކޮށް 375 ވިޔަފާރިއަކަށް 530 މިލިއަން ރުފިޔާއާއި، 7.5 މިލިއަން ޑޮލަރު ވަނީ ދޫކޮށްފައެވެ. މީގެ އިތުރުން އެސްޑީއެފްސީ މެދުވެރިކޮށް 1768 ވިޔަފާރިއަކަށް 291 މިލިއން ރުފިޔާ ވަނީ ދޫކޮށްފައެވެ.
ދެން އެންމެ ގިނަ އަދަދަކަށް ހަރަދުކޮށްފައިވަނީ އިންކަމް ސަޕޯޓް އެލަވަންސަށެވެ. އިންކަމް ސަޕޯޓް އެލަވަންސްގެ ގޮތުގައި 89.8 މިލިއަން ރުފިޔާ ވަނީ ދޫކޮށްފައެވެ. ސެޕްޓެމްބަރު މަހުގެ 24 ވަނަ ދުވަހުގެ ނިޔަލަށް 21,182 މީހުން އެދިފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތައް ދައްކައެވެ. އަދި އެލަވަންސަށް އެދުނު މީހުންގެ ތެރެއިން 8,648 މީހުންނަށް މިހާރު މި އެލަވަންސް ވަނީ ދޫކޮށްފައެވެ.
އިންކަމް ސަޕޯޓް އެލަވަންސް ދިނުމަށް ސަރުކާރުން ނިންމީ ކޮވިޑް-19 ގެ ސަބަބުން ރާއްޖޭގެ އިގްތިސާދަށް ކުރި އަސަރާއި އެކު ވަޒީފާ ގެއްލުނު މީހުންނަށް އެހީތެރިވުމުގެ ގޮތުންނެވެ. އެގޮތުން މި އެލަވަންސް މެއި މަހުގެ 20 ވަނަ ދުވަހު ދޫކުރަން ފަށާފައިވާ އިރު، އިންކަމް ސްޕޯޓް އެލަވެންސް ދޫކޮށްފައިވާ ކޮންމެ މީހަކަށް ވެސް ގިނަވެގެން ލިބޭނީ 5،000 ރުފިޔާ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ފާހަގަކުރައްވާފައެވެ.
އިކޮނަމިކް ރެސްޕޯންސް ސްޕެންޑިންގެ ތެރެއިން 24 ސެޕްޓެމްބަރުގެ ނިޔަލަށް ކަރަންޓް ޑިސްކައުންޓުގެ ގޮތުގައި 17 މިލިއަން ރުފިޔާ ވަނީ ދޫކޮށްފައެވެ. ނަމަވެސް މެއި މަހުގެ ނިޔަލަށް ކަރަންޓާއި ފެނުގެ ޑިސްކައުންޓުން ޖުމްލަ 58.4 މިލިއަން ރުފިޔާ ވަނީ ހަރަދުކޮށްފައެވެ.
