ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލާގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ ޅ. ހިންނަވަރު، ބޮޑުހިޔާގެ، އަދުހަމް މުހައްމަދު (21 އ)ގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި ބުރާސްފަތި ދުވަހު ބާއްވައިފި އެވެ.

ބުރާސްފަތި ދުވަހުގެ އަޑުއެހުމުގައި އަދުހަމް ވަނީ، މީގެކުރިން ދައުލަތުން އޭނާ އަށް ހަމަޖައްސާދިން ގާނޫނީ ވަކީލާއެކު މި މައްސަލާގައި ކުރިއަށް ދިއުމުގެ ބަދަލުގައި، އަމިއްލައަށް ގާނޫނީ ވަކީލެއް އައްޔަން ކުރުމަށްފަހު، މައްސަލާގައި ކުރިއަށް ދިއުމަށް ބޭނުންވާ ކަމަށް ބުނެފަ އެވެ.

އަދުހަމް ބުނީ، ގާނޫނީ ވަކީލެއް ހަމަޖެއްސުމަށް ގާނޫނީ ވަކީލަކާއެކު ވާހަކަ ދެކެވެމުންދާ ކަމަށާއި، ތިން ދުވަސްތެރޭގައި ވަކީލެއް ހަމަޖެހޭނެ ކަމަށް އުއްމީދު ކުރާ ކަމަށެވެ.

މި މައްސަލަ ބައްލަވާ ގާޒީ އިސްމާއީލް ރަޝީދު ވަނީ އަދުހަމަށް ގާނޫނީ ވަކީލެއް ހަމަޖެއްސުމަށް ފަސް ދުވަހުގެ މުއްދަތެއް ދެއްވާފަ އެވެ. އަދި ފަސް ދުވަސްފަހުން، ވީއެންމެ އަވަހަކަށް މި މައްސަލައިގެ އަޑުއެހެއް ބޭއްވޭނެ ކަމަށް ގާޒީ ވިދާޅުވި އެވެ.

މި މައްސަލާގައި މި ހަފްތާގެ ހޯމަ ދުވަހު ވެސް އަޑުއެހުމެއް ތާވަލް ކުރި އެވެ. ނަމަވެސް އެއަޑުއެހުން ކެންސަލް ކުރީ، ދިފާއީ ވަކީލަށް (އަދުހަމްގެ ގާނޫނީ ވަކީލް) ޝަރީއަތުގެ އަޑުއެހުމަށް ހާޒިރުވެވެން ނެތުމުން ކަމަށް ކްރިމިނަލް ކޯޓުން އެދުވަހު ބުނެފައި ވެއެވެ.

މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލްކޮށް ކުރިއަށް ގެންގޮސްފައި މިވަނީ މި މައްސަލައިގެ އަޑުއެހުމެއް ނުބާއްވާތާ 7 މަސް ދުވަސް ފަހުންނެވެ.

އަދުހަމް ދައުވާއަށް އިއުތިރާފް ވެފައިވަނީ މިއަހަރުގެ ފެބްރުއަރީ 12 ވަނަ ދުވަހު ބޭއްވި އިބްތިދާއީ އަޑުއެހުމުގައެވެ.

ގާސިމްގެ މަރުގެ މައްސަލާގައި އަދުހަމުގެ ޝަރީއަތުގެ އަޑުއެހުމެއް އެންމެފަހުން ބާއްވާފައިވަނީ މިއަހަރުގެ ފެބްރުއަރީ މަހުގެ 18 ވަނަ ދުވަހުއެވެ. އެދުވަހު ބޭއްވި ޝަރީއަތުގެ އަޑު އެހުމަކީ، ގާސިމް މަރާލުމާއި ގުޅިގެން، ގަސްތުގައި މީހަކު މެރުމުގެ ދައުވާއަށް އަދުހަމް އިއުތިރާފްވެފައިވާތީ އަވަސް ނިޔާގެ ޝަރީއަތުގެ އަޑުއެހުމެކެވެ. ނަމަވެސް އެ ޝަރީއަތުގެ އަޑުއެހުމުގައި ކުރިން ވެފައިވާ އިއުތިރާފް އަދުހަމް ވަނީ ގެންގޮސް، ދައުވާއަށް އިންކާރު ކޮށްފައެވެ. އެހެންކަމުން އަވަސް ނިޔާގެ ޝަރީއަތުގެ މަރުހަލާ އެވަނީ ނިމިފައެވެ. ދެން ކުރިއަށްދާނީ ޖިނާއީ އެހެން މައްސަލަތައް ވެސް ކުރިއަށްދާގޮތަށް އިބްތިދާއީ އަޑުހެންތަކަށްފަހު، ޝަރީއަތުގެ އަޑު އަޑުއެހުންތަކެވެ.

އަދުހަމްގެ މައްޗަށް ދައުލަތުން އުފުލާފައިވަނީ، ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އެވެ.

ގާސިމް މަރާލާފައި މަގުމަތީ އޮތްވާ ފެނިގެން މީހަކު، ފުލުހުންނަށް ރިޕޯޓް ކޮށްފައިވަނީ މިދިއަ އަހަރުގެ ޑިސެންބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.

ފުލުހުން ބުނެފައިވާގޮތުން، އަދުހަމަކީ މަސްތުވާތަކެތީގެ މައްސަލަތަކާއި ވައްކަމާއި، ފޭރުމާއި، މާރާމާރީގެ އިތުރުން ތަފާތު އެކިއެކި މައްސަލަތަކުގެ ރެކޯޑު އޮތް މީހެއް ކަމަށެވެ. އެގޮތުން ގާސިމް މަރާލި ދުވަހު ވެސް އޭނާ މަސްތުވުމަށާއި ޒަރޫރީ އެކިއެކި ބޭނުންތަކަށް ފައިސާ ހޯދުމަށް ފޭރުމަށް މަސައްކަތް ކުރި ކަމަށެވެ. އަދި މާލެއިންނާއި ހުޅުމާއިން ބަޔަކާއެކު މަސްތުވާތަކެތި ބޭނުންކޮށްފައިވާ ކަމަށް ފުލުހުން ބުނެފައިވެއެވެ.