ޑިފެންސް މިނިސްޓަރ މާރިޔާ ހާޒިރުކުރެއްވި ކޮމެޓީ ބައްދަލުވުން ސިއްރު ކޮށްފި

ރައްޔިތުންގެ މަޖިލީހުގެ ސަލާމަތީ ހިދްމަތްތަކާބެހޭ ކޮމެޓީއަށް ހުށަހެޅިފައިވާ މައްސަލައަކާ ގުޅިގެން ޑިފެންސް މިނިސްޓަރ މާރިޔާ އަހުމަދުދީދީ ހާޒިރު ކުރެއްވި ކޮމެޓީގެ ބައްދަލުވުން ސިއްރު ކޮށްފި އެވެ.

ބުރާސްފަތި ދުވަހު 10:00 އަށް ތާވަލް ކޮށްގެން ކުރިއަށް ގެންދާ މި ކޮމެޓީގެ ބައްދަލުވުން ސިއްރު ކުރި ވަކި ސަބަބެއް މަޖިލީހުގެ އިދާރާއިން ހާމަ ނުކުރި ނަމަވެސް، ސައުމީ ސަލާމަތާ ގުޅުންހުރި ސިއްރުތައް ހިފެހެއްޓުމުގެ ގޮތުން މިފަދަ ކޮމެޓީތައް މީގެކުރިން ވެސް ސިއްރުކޮށްފައި ވެއެވެ.

Advertisement

ޑިފެންސް މިނިސްޓަރ މާރިޔާ ކޮމެޓީން ބައްދަލު ކުރައްވަނީ، އެކޮމެޓީއަށް ހުށަހެޅިފައިވާ މައްސަލައަކާ ގުޅިގެން ކަމަށް ބުނެފައި ވީނަމަވެސް، އެއީ ކޮން މައްސަލައަކާ ގުޅިގެން ކަމެއް ބަޔާން ކޮށްފައެއް ނުވެއެވެ.

ސަލާމަތީ ހިދްމަތްތަކާބެހޭ ކޮމެޓީއަށް ޑިފެންސް މިނިސްޓަރު މާރިޔާ ހާޒިރުކޮށްފައިވާއިރު، އިދިކޮޅު ޕީޕީއެމް-ޕީއެންސީ ކޯލިޝަނުން ދަނީ މިސަރުކާރުން އިންޑިއާއާއެކު އޮތް ގުޅުން ވަރުގަދަކޮށް، އިންޑިއާއިން ގިނަ އެހީތަކެއް ވަމުންދާތީ ކަންބޮޑުވުން ފާޅު ކުރަމުން ނެވެ.

އެގޮތުން ޕީއެންސީގެ ޕާލަމެންޓްރީ ގްރޫޕްގެ އަދި މަޑުއްވަރީ ދާއިރާގެ މެމްބަރު، ކުރީގެ ރައީސް އަބްދުﷲ ޔާމީންގެ ވެރިކަމުގައި އެންމެ ބޮޑެތި ޖަރީމާތައް ހިންގަމުން ދިޔަ ދުވަސްވަރު، ޑިފެންސް މިނިސްޓަރަކަށް ހުންނެވި، އާދަމް ޝަރީފް އުމަރު ވިދާޅުވެފައިވަނީ، ރާއްޖޭގެ ސިޔާދަތީ ބާރުތައް ގެއްލޭގޮތަށް އިންޑިއާ އާއެކު ހަދާ އެގްރީމެންޓްތަކާއި ކުރަމުންދާ "ޑީލް" ތަކުގެ ސަބަބުން ސަރުކާރުގެ އިތުބާރު ގެއްލިފައިވާ ކަމަށެވެ.

މީގެއިތުރުންވެސް އާދަމް ޝަރީފް ވިދާޅުވެފައިވަނީ، ރާއްޖެ އޮންނަތަނުގެ ގޮތުން ބޭރުގެ ސަމާލުކަމާއި އެހީތެރިކަން އަބަދުވެސް ރާއްޖެއަށް ލިބޭ ކަމަށެވެ. ރާއްޖެއަކީ މިސަރަހައްދުގެ މެރިޓައިމްގެ މައި ލޭނާރު ކަމަށެވެ. "ހަލާ ދަނޑީގެ ދެކޮޅު ނުބަލާ" ހުއްޓައި، ގައުމު މިދަނީ އަޅުވެތިވަމުން ކަމަށެވެ. މިސަރުކާރުގެ ސިޔާސަތު ބަދަލުކުރަންޖެހޭ ކަމަށްވެސް އާދަމް ޝަރީފް ވިދާޅުވެފައި ވެއެވެ.

އިދިކޮޅު ކޯލިޝަނުން އެންމެ ބޮޑަށް ކަންބޮޑު ވަނީ އިންޑިއާ ސިފައިންގެ ބަޔަކު ރާއްޖޭގައި އުޅެމުންދާތީ އެވެ. ނަމަވެސް އިންޑިއާގެ އެ ސިފައިން ރާއްޖޭގައި ތިބެނީ، އިންޑިއާއިން ރާއްޖޭގެ އަސްކަރިއްޔާއަށް ހަދިޔާކުރި، ހެލިކޮޕްޓަރާއި ޑޯނިޔާ ފްލައިޓް އޮޕަރޭޓް ކުރުމުގަ އެވެ. އަދި އެ މީހުންނާއި އެމީހުން ހިންގާ މައިގަނޑު އޮޕަރޭޝަންތަކުގެ ޚަރަދު ބަލަހައްޓަނީ ވެސް އިންޑިއާއިން ނެވެ.

ރާއްޖޭގެ ކަނޑުގެ ސަރަހައްދު ބެލެހެއްޓުމުގައި ވެސް އިންޑިއާގެ އެހީތެރިކަން އަބަދުވެސް ރާއްޖެއަށް ލިބެމުންދެއެވެ.