ކޮމަންވެލްތް ޔޫތު އެވޯޑަށް ކުރިމަތިލުމުގެ ފުރުޞަތު ހުޅުވާލައިފި

ކޮމަންވެލްތް ޔޫތު އެވޯޑް 2021 އަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ޔޫތް މިނިސްޓްރީން ބުނީ ކޮމަންވެލްތުގެޔޫތު އެވޯޑް2021 އަށް ކުރިމަތިލުމުގެ ފުރުޞަތު ދިވެހިރާއްޖެއަށް ލިބިފައިވާ ކަމަށެވެ. މި އެވޯޑަށް ބައިވެރިން ހޮވުމުގައި އިންސާފުކުރުމަށް ހަމަޖެހިފައިވަނީ ޤައުމުގެ ކުރިއެރުމާއި، ދެމެހެއްޓެނިވި ގޮތެއްގައި މުޖުތަމަޢަށް ހެޔޮ ބަދަލެއް ގެނައުމަށްޓަކައި އެ މީހެއްގެ ފަންނީ ޤާބިލްކަން ބޭނުންކޮށްގެން ކޮށްފައިވާ މަސައްކަތްތަކަށެވެ.

މި އެވޯޑަށް ކުރިމަތިލުމަށް ހުޅުވާލެވިފައިވާ ދާއިރާތަކުގެ ތެރެއިން ސަރަޙައްދީ ދާއިރާތަކަކީ އެފްރިކާ، އޭޝިޔާ، ކެރީބިއަން، ޔޫރަޕާއި ކެނެޑާ އަދި ޕެސިފިކެވެ. މި ސަރަޙައްދުތަކުގެ ކޮމަންވެލްތް މެމްބަރު 54 ޤައުމުގެ ޒުވާނުންނަށް މި އެވޯޑަށް ކުރިމަތިލެވޭނެއެވެ.

އެވޯޑަށް ކުރިމަތިލުމުގެ ޝަރުތުތަކުގެ ތެރޭގައި ހިމެނެނީ ކޮމަންވެލްތް މެމްބަރު ޤައުމެއްގެ އުމުރުން 15 އަހަރާއި 29 އަހަރުގެ ރައްޔިތެއްކަމުގައިވުމާއި ތަރައްޤީގެ އެކި މަސައްކަތްތަކުގައި މަދު ވެގެން 12 މަސްދުވަސް ވަންދެން ވޮލަންޓިއަރކޮށް ނުވަތަ ފަންނީ ބޭފުޅެއްގެ ހައިސިއްޔަތުން ހަރަކާތްތެރިވެފައިވުމާއި ދެމެހެއްޓެނިވި ތަރައްޤީގެ ލަނޑުދަނޑިތަކުގެ ތެރެއިން ކޮންމެވެސް 1 ލަނޑުދަނޑިއެއް ޙާސިލްކުރުމަށް މަސައްކަތްކޮށްފައިވުމެވެ.

ޔޫތް މިނިސްޓްރީން ބުނީ މިއެވޯޑަށްކުރިމަތިލުމަށް ޝައުގުވެރިވެލައްވާ ފަރާތްތައް މި މަހުގެ 21 ވަނަ ދުވަހުގެ ކުރިން ލިންކު މެދިވެރިކޮށް އެވޯޑަށް ނަން ހުށަހެޅުމުގެ ފުރުޞަތު ހުޅުވާލާފައިވާ ކަމަށެވެ.