ކޮވިޑު ޖެހުނުތާ ތިން މަސް ދުވަހުގެ ތެރޭގައި ރާއްޖެ އައި ނަމަވެސް ޕީސީއާރު ޓެސްޓު ހަދަން ޖެހޭ

ކޮވިޑު-19 ޖެހުނު ތާ ތިން މަސް ދުވަހުގެ ތެރޭގައި ރާއްޖެ އައި ނަމަވެސް ޕީސީއާރު ޓެސްޓު ހަދަން ޖެހޭނެ ކަމަށް ޑރ. އަހުމަދު ޝަހީދު ވިދާޅުވެއްޖެއެވެ.

ހޯމަ ދުވަހުގެ ރޭ ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ޝަހީދު ވިދާޅުވީ ރާއްޖެ އަންނަ ހުރިހާ ފަތުރުވެރިންގެ އަތުގައި ނެގެޓިވް ޕީސީއާރު ޓެސްޓެއް އޮތުމަކީ މަޖުބޫރު ކަމެއް ކަމަށެވެ.

ޑރ. ޝާހިދު ވިދާޅުވީ ކޮވިޑު ޖެހުމަށްފަހު ތިން މަސް ދުވަސް ވަންދެން ބައްޔަށް އިމިއުންވި ނަމަވެސް އެ ފަރާތްތަކުގެ އަތުގައި ވެސް ނެގެޓިވް ނަތީޖާއެއް އޮތުމަކީ މުހިއްމު ކަމެއް ކަމަށެވެ.

ޑރ. ޝަހީދު ވިދާޅުވީ ފާއިތުވި ތިން މަސްދުވަހުގެ ތެރޭގައި ބަލި ޖެހުނު މީހުންނާމެދު ބައެއް ހާލަތްތަކުގައި އަމަލު ކުރާ ގޮތް ތަފާތުވާނެ ކަމަށެވެ. އެގޮތުން ކޮވިޑަށް ޕޮޒިޓިވްވެފައިވާ މީހަކާއި ކޮންޓެކްޓުވި ނަމަވެސް ކޮންޓެކްޓުވި ފަރާތުގެ ކިބައިން އަލާމާތް ނުފެންނަ ނަމަ ޓެސްޓު ކުރަން ނުޖެހޭނެ ކަމަށެވެ.

އެހެންނަމަވެސް އެ ތިން މަސް ދުވަހުގެ ތެރޭގައި ރާއްޖެއިން ފުރާއިރު ޓެސްޓު ކުރާއިރު ދެވަނަ ފަހަރަށް ނަތީޖާ ޕޮޒިޓިވްވުމުގެ ފުރުސަތު ބޮޑު ކަމަށް ވެސް ވިދާޅުވިއެވެ.