އުމްރާއަށް މީހުން ގެންދިއުމަށް ޝައުގުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައިފި
27 ސެޕްޓެމްބަރު 2020 | އާދީއްތަ 17:22ޕްރޮޕޯސަލް ފޮތުގެ އަގަކީ 5000 ރުފިޔާ
ހައްޖުގެ މަތިވެރި އަޅުކަން އަދާކުރުމަށް ފުރަން ތައްޔާރުވެފައިތިބި ހައްޖާޖީން
ދިވެހި ރާއްޖެއިން އުމްރާއަށް މީހުން ގެންދިއުމަށް ޝައުގުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައިފިއެވެ.
އިސްލާމިކް މިނިސްޓްރީން ބުނީ ދިވެހި ރާއްޖެއިން މީހުން އުމްރާއަށް ގެންދިއުމާ ބެހޭ ގޮތުން 24 ޖަނަވަރީ 2015 ގައި ގެޒެޓް ކޮށްފައިވާ "ދިވެހިރާއްޖެއިން އުމްރާއަށް މީހުން ގެންދިއުމާ ބެހޭ އުސޫލު" ގައިވާ ގޮތުގެ މަތިން އެކަމަށް އެދި ޕްރޮޕޯޒަލް ހުށަހެޅޭނީ، އެ އުސޫލުގެ 5 ވަނަމާއްދާގައި ބުނެފައިވާ ޝަރުތު ފުރިހަމަވާ ކުންފުނިތަކަށެވެ.
ޕްރޮޕޯޒަލް ފޮތް މި މަހުގެ 28 ވާ ހޯމަ ދުވަހުން ފެށިގެން 07 އޮކްޓޯބަރ ވާ ބުދަ ދުވަހާ ހަމައަށް ސަރުކާރު ބަންދު ނޫން ކޮންމެ ދުވަހަކު 09:00ން 12:00ށް މިނިސްޓްރީގެ ކައުންޓަރުން ގަންނަން ލިބޭނެ ކަމަށް އިސްލާމިކް މިނިސްޓްރީން ބުނެއެވެ.
ޕްރޮޕޯސަލް ފޮތުގެ އަގަކީ 5000 ރުފިޔާއެވެ. ޕްރޮޕޯޒަލް ހުށަހަޅާއިރު، ސިޓީ އުރައެއްގައި ބަންދު ކުރުމަށްފަހު ސިޓީ އުރައިގެ ބޭރުގައި" ދިވެހި ރާއްޖެއިން އުމްރާއަށް މީހުން ގެންދިއުމުގެ ހުއްދައަށް އެދި" މިހެން ލިއުމަށް މިނިސްޓްރީން ވަނީ އެދިފައެވެ.
މީގެ އިތުރުން އިސްލާމިކް މިނިސްޓްރީން ބުނީ ޕްރޮޕޯޒަލްތައް ބަލައިގަތުމަށް ހަމަޖެހިފައިވަނީ 1 އޮކްޓޯބަރު ވާ އާދިއްތަ ދުވަހުން ފެށިގެން 15 އޮކްޓޯބަރު ވާ ބުރާސްފަތި ދުވަހާ ހަމައަށް ސަރުކާރު ބަންދުނޫން ކޮންމެ ދުވަހަކު 09:00ން 12:00ށް މިނިސްޓްރީގެ ކައުންޓަރުން ކަމަށެވެ.
އަދި ޕްރޮޕޯސަލް ގަނެފައިނުވާ ކުންފުނިތަކުގެ ޕްރޮޕޯސަލް ބަލައިގަންނަ ގޮތަށް ހަމަޖެހިފައިނުވާ ކަމަށް މިނިސްޓްރީން ބުނެއެވެ.
