މިއަދުގެ އަލި ރަސްގެފާނު އޮންނެވީ ހިލިހިލާ ޖަހާ ޖަލުގައި: އަދުރޭ
އަބްދުއްރަހީމް ވަނީ އިންޑިއާ އާއި ރާއްޖޭގެ ގުޅުމަށް ވަރަށް ބޮޑަށް ފާޑު ކިޔުއްވާފައި
ޕީޕީއެމް، ޕީއެންސީ ކޯލިޝަނުން ބޭއްވި ހަފްލާއެއްގެ ތެރެއިން ޕީއެންސީގެ ރައީސް އަބްދުރަހީމް އަބްދުﷲ
ކޮރަޕްޝަނުގެ ކުށް ސާބިތުވެ ފަސް އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުން އަންނަ ކުރީގެ ރައީސް އަބްދުﷲ ޔާމީން އަކީ މިހާރުގެ އަލި ރަސްގެފާނު ކަމަށާއި، އެ މަނިކުފާނު އޮންނެވީ ހިލިހިލާ ޖަހާ ޖަލުގައި ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ހޮނިހިރު ދުވަހު ޕީޕީއެމް އޮފީހުގައި އިދިކޮޅު ކޯލިޝަނުން ބޭއްވި ބައްދަލުވުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ ދިވެހި ގައުމުގައި އަމިއްލަ ވެރިކަމެއް ކުރަން ފެށީއްސުރެ، ދިވެހި ގައުމާއި، ރައްޔިތުންގެ ހައްގުގައި އެންމެ ބޮޑު ގުރުބާނީއެއް ވެވަޑައިގެންނެވީ ކުރީގެ ރައީސް އަބްދުﷲ ޔާމީން ކަމަށެވެ.
އަބްދުއްރަހީމް އިތުރަށް ވިދާޅުވީ އަލި ރަސްގެފާނަކީ ދިވެހިން އެބޭފުޅަކަށްޓަކައި ފަހުރުވެރިވާނެ ބޭފުޅެއް ކަމަށާއި، އަލި ރަސްގެފާނަކީ ދިވެހިންގެ ހައްގުގައި ޖެހިލުމެއް ނެތި ހަނގުރާމައަށް ނުކުންނެވި ބޭފުޅެއް ކަމަށެވެ. އޭގެ އެތައް އަހަރެއް ފަހުން މިއަދު ދިވެހި ގައުމު ދެކެމުން މި އަންނަނީ އެ ދުވަސް ކަމަށް ވިދާޅުވަމުން އަބްދުއްރަހީމް ވިދާޅުވީ މިއަދު އަލި ރަސްގެފާނެއް ނެތީމަ އެކަމާއި، ހިތާމަ ކުރައްވާ ކަމަށާއި، މިއަދުގެ އަލި ރަސްގެފާނު އޮންނެވީ ހަތަރެސް ފައިގައި ހިލިހިލާ ޖަހާ މާފުށީ ޖަލުގައި ބަންދު ކޮށްފައި ކަމަށެވެ.
އަބްދުއްރަހީމް ވިދާޅުވީ މިއަދު ރައީސް ޔާމީން ސަލާމަތުން ހުރި ނަމަ ދިވެހި ރައްޔިތުންގެ ހައްގުގައި ނުކުންނަވާނެ ކަމަށެވެ.
އިދިކޮޅުން ހޮނިހިރު ދުވަހު ބޭއްވި ބައްދަލުވުމުގައި އަބްދުއްރަހީމް ވަނީ އިންޑިއާ އާއި ރާއްޖޭގެ ގުޅުމަށް ވަރަށް ބޮޑަށް ފާޑު ކިޔުއްވާފައެވެ.
