އިންޓަ ދޫކޮށް ގޮޑިން ކަލިއާރީއަށް

އިންޓަ މިލާން ދޫކޮށް އުރުގުއޭގެ ތަޖުރިބާކާރު ޑިފެންޑަރު ޑިއޭގޯ ގޮޑިން ކަލިއާރީއަށް ބަދަލުވެއްޖެއެވެ.

އުމުރުން 34 އަހަރުގެ ޑިފެންޑަރު ކަލިއާރީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަދި އޭނާ ވަނީ ކަލިއާރީއާއެކު ތިން އަހަރުގެ އެއްބަސްވުމެއް ހަދާފައެވެ. މިދިޔަ އަހަރުގެ ޖުލައި މަހު ތިން އަހަރުގެ އެއްބަސްވުމެއްގެ ދަށުން ގޮޑިން އިންޓައާ ގުޅުނު ނަމަވެސް، ރިޕޯޓުތައް ބުނާ ގޮތުން އިންޓައިން ވަނީ މި ސީޒަން ނިމުމުން ގޮޑިންގެ އެއްބަސްވުން އުވާލާފައެވެ.

މިދިޔަ ސީޒަނުގައި ގޮޑިން ވަނީ އިންޓައަށް 36 މެޗު ކުޅެދީ އެ ޓީމަށް ދެ ލަނޑު ކާމިޔާބުކޮށްދީފައެވެ. އަދި މިދިޔަ ސީޒަނުގެ ޔުއެފާ ޔޫރޮޕާ ލީގުގެ ފައިނަލުގައި އިންޓަ ވާދަކުރިއިރު ގޮޑިން ވަނީ އެ ޓީމުގެ ފަހަތުގައި މުހިންމު ދައުރެއް އަދާކޮށްފައެވެ.

މީގެ ކުރިން ވިޔަރެއާލަށްވެސް ކުޅުނު ގޮޑިން އެންމެ ފުރަތަމަ ވިދާލީ އެތުލެޓިކޯއިންނެވެ. އެތުލެޓިކޯގައި ގޮޑިން ނުވަ ސީޒަން ހޭދަކުރިއިރު، އޭނާ ވަނީ އެތުލެޓިކޯއަށް 389 މެޗު ކުޅެދީ 27 ލަނޑު ޖަހާފައެވެ. އަދި ވަނީ އެތުލެޓިކޯއާއެކު ސްޕެނިޝް ލީގާއި ސްޕެނިޝް ކަޕްގެ އިތުރުން ޔުއެފާ ޔޫރޮޕާ ލީގު ދެ ފަހަރު އަދި ޔުއެފާ ސުޕަ ކަޕް ތިން ފަހަރު ކާމިޔާބުކޮށްފައެވެ.

އަދި އުރުގުއޭގެ ގައުމީ ފުޓްބޯޅަ ޓީމަށް ކުޅުނު 135 މެޗުގައި އަށް ލަނޑު ކާމިޔާބުކޮށްފައިވާ ގޮޑިން ވަނީ އެޓީމާއެކު 2011 ވަނަ އަހަރު އޮތް ކޮޕަ އެމެރިކާ ފުޓްބޯޅަ މުބާރާތްވެސް ކާމިޔާބުކޮށްފައެވެ.

މި ސީޒަނަށް ގޮޑިން ކަލިއާރީއާ ގުޅުނުއިރު، ހޮނިހިރު ދުވަހުގެރޭ އިޓާލިއަން ލީގުގައި ކަލިއާރީން ލާޒިއޯއާ ދެކޮޅަށް ނުކުންނާނެއެވެ.