ނޫސްވެރިކަމުގެ އިނާމަށް 11 ދާއިރާއަކުން 80 ހުށަހެޅުމެއް
އެންމެ ގިނަ ނޫސްވެރިން ނަން ހުށަހަޅާފައިވާ ދާއިރާއަކީ ފީޗަރ ނުވަތަ ރިޕޯޓު
މިދިޔަ އަހަރު ބޭއްވި ނޫސްވެރިކަމުގެ އެވޯރޑްގެ ތެރެއިން އެވޯޑް ލިބުނު ނޫސްވެރިން
މޯލްޑިވްސް މީޑިޔާ ކައުންސިލް (އެމްއެމްސީ)ން އިންތިޒާމު ކޮށްގެންދޭ ނޫސްވެރިކަމުގެ އިނާމަށް 80 ހުށަހެޅުމެއް ހުށަހަޅާފައިވާ ކަމަށް އެމްއެމްސީން ބުނެފިއެވެ.
ނޫސްވެރިކަމުގެ އިނާމަށް އެދި ހުށަހެޅުމުގެ ފުރުސަތު ހުޅުވާލާފައިވަނީ މިމަހުގެ 10ން ފެށިގެން 24 ވަނަ ދުވަހާ ހަމައަށެވެ. އެމްއެމްސީން ބުނީ އިނާމަށް ނަން ހުށަހެޅުމުގެ މުއްދަތު ހަމަވިއިރު 11 ދާއިރާއަކަށް 80 ހުށަހެޅުން ހުށަހަޅާފައިވާ ކަމަށެވެ.
މިފަހަރުގެ އިނާމަށް އެމްއެމްސީން ހުޅުވާލާފައިވަނީ އަލަށް 2 ދާއިރާއެއް އިތުރު ކުރުމަށްފަހުއެވެ. މި ފަހަރު އަލަށް އިތުރު ކޮށްފައިވަނީ ތަޙްޤީގީ ނޫސްވެރިކަން ނުވަތަ އިންވެސްޓިގޭޓިވް ޖާރނަލިޒަމް އާއި ތިމާވެއްޓާއި ދެމެހެއްޓެނެވި ތަރައްޤީ މި 2 ދާއިރާއެވެ.
ޕްރިންޓް ނުވަތަ އޮންލައިނާއި ބްރޯޑްކާސްޓިންގ ގެ ކެޓަގަރީ ވަކިން ކުރިޔަށްގެންދާ ގޮތަށް ހަމަޖެހިފައިވާއިރު އެންމެ ގިނަ ހުށަހެޅުން ހުށަހަޅާފައިވަނީ ޕްރިންޓް ނުވަތަ އޮންލައިން ކެޓަގަރީއަށެވެ. މުޅި ޖުމްލަ އެކެޓަގަރީއަށް 61 ހުށަހެޅުމެއް ހުށަަހަޅާފައިވާއިރު ބްރޯޑްކާސްޓިންގ ކެޓަގަރީއަށް 14 ހުށަހެޅުމެއް ވަނީ ހުށަަހަޅާފައެވެ.
ދާއިރާތަކަށް ބަލާއިރު އެންމެ ގިނަ ނޫސްވެރިން ނަން ހުށަހަޅާފައިވާ ދާއިރާ އަކީ ފީޗަރ ނުވަތަ ރިޕޯޓެވެ. އެދާއިރާއަށް އޮންލައިން ނުވަތަ ޕްރިންޓް ކެޓެގަރީން 24 ހުށަހެޅުމެއް ހުށަހެޅިއިރު ބްރޯޑްކާސްޓިންގ ކެޓަގަރީން 5 ނޫސްވެރިއަކު ވަނީ އެދާއިރާއަށް ކުރިމަތިލާފައެވެ. ދެން އެންމެ ގިނަ ނޫސްވެރިން ކުރިމަތިލާފައިވަނީ އިޖުތިމާއީ ދާއިރާއަށެވެ. އެދާއިރާއަށް އޮންލައިން ނުވަތަ ޕްރިންޓްގެ ކެޓަގަރީން 10 ނޫސްވެރިއަކު ކުރިމަތިލާފައިވާއިރު ބްރޯޑްކާސްޓިންގ ކެޓަގަރީން އެއް ނޫސްވެރިއަކު ވަނީ ކުރިމަތިލާފައެވެ. ތިން ވަނަ އަށް އެންމެ ގިނަ ނޫސްވެރިން ކުރިމަތިލާފައިވަނީ ސިޔާސީ ދާއިރާއަށެވެ. އެދާއިރާއަށް އޮންލައިން ނުވަތަ ޕްރިންޓްގެ ކެޓަގަރީން 6 ނޫސްވެރިއަކު ކުރިމަތިލާފައިވާއިރު ބްރޯޑްކާސްޓިންގ ކެޓަގަރީން 3 ނޫސްވެެރިއަކު ވަނީ ކުރިމަތިލާފައެވެ.
މީގެއިތުރުން ތަހުގީގީ ނޫސްވެރިކަމުގެ ދާއިރާއަށް ބްރޯޑްކާސްޓިންގ ކެޓަގަރީން އެއްވެސް ނޫސްވެރިއަކު ނަން ހުށަހަޅާފައި ނުވާއިރު ޝަރުޢީ އަދި ޤާނޫނީ ދާއިރާއަށް ވެސް ބްރޯޑްކާސްޓިންގ ކެޓަގަރީން އެއްވެސް ނޫސްވެރިއަކު ކުރިމަތިލާފައިނުވެ އެވެ.
މިފަހަރު އެންމެ އުންމީދީ ނޫސްވެރިޔާއަށް 5 ނޫސްވެރިއެއް ވަނީ ކުރިމަތިލާފައެވެ.
ނޫސްވެރިންގެ އަގު ވަޒަން ކުރުމުގެ ގޮތުން އެމްއެމްސީން އަންނަނީ 2014 ވަނަ އަހަރުން ފެށިގެން ނޫސްވެރިކަމުގެ އިނާމް ދެމުންނެވެ.
