ކޯޗިންގ ކެރިއަރު ނިންމާލުމުގެ ކުރިން ޕޯޗުގަލުގެ ގައުމީ ފުޓްބޯޅަ ޓީމަށް ކޯޗުކަން ކޮށްދޭން ބޭނުންވާ ކަމަށް ޓޮޓެންހަމް ހޮޓްސްޕާއަށް އިރުޝާދު ދެމުން އަންނަ ހޯސޭ މޮރީނިއޯ ބުނެފިއެވެ.
މިހާތަނަށް ގައުމެއްގެ ފުޓްބޯޅަ ޓީމަށް މޮރީނިއޯ ކޯޗުކަން ކޮށްދީފައި ނުވި ނަމަވެސް، ޕޯޗުގަލަށް އުފަން މޮރީނިއޯ ވަނީ ކުލަބު ލެވެލްގައި ގިނަ ކާމިޔާބީތަކެއް ހޯދާފައެވެ. އަދި އޭނާ ވަނީ 2010 ވަނަ އަހަރު ފީފާއިން ހޮވި އަހަރުގެ އެންމެ މޮޅު ކޯޗުގެ މަގާމުވެސް ހޯދާފައެވެ.
ދާދި ފަހުން މޮރީނިއޯ ބުނީ އޭނާގެ ކޯޗިންގ ކެރިއަރު ނިންމާލަން ބޭނުންވަނީ ގައުމެއްގެ ފުޓްބޯޅަ ޓީމަކަށް ކޯޗުކަން ކޮށްދިނުމަށްފަހު ކަމަށާއި، އެގޮތުން އެންމެ ބޭނުން ވަނީ އަމިއްލަ ގައުމު ކަމަށްވާ ޕޯޗުގަލުިގެ ގައުމީ ފުޓްބޯޅަ ޓީމަށް ކޯޗުކަން ކޮށްދިނުމަށް ކަމަށެވެ. އެކަމަކު ޕޯޗުގަލް ވެގެންދާނީ ކޯޗުކަން ކޮށްދޭން އުނދަގޫ ޓީމަކަށް ކަމަށްވެސް މޮރީނިއޯ ބުންޏެވެ.
މޮރީނިއޯ ބުނީ އޭނާގެ ކެރިއަރު ނިންމާލުމުގެ ކުރިން ފީފާ ވޯލްޑް ކަޕެއްގައި އާއި ޔުއެފާ ޔޫރޯ ފުޓްބޯޅަ މުބާރާތެއް ތަޖުރިބާ ކުރަން ބޭނުންވާ ކަމަށާއި، އަދި އެކަން ކުރުމަށް އެންމެ ރަނގަޅުވާނީ އަމިއްލަ ގައުމު ޕޯޗުގަލާއެކުގައި ކަމަށެވެ.
އުމުރުން މިހާރު 57 އަހަރުގެ މޮރީނިއޯ ވަނީ މިހާތަނަށް ޔޫރަޕްގެ ބޮޑެތި ކުލަބުތަކަށް ކޯޗުކަން ކޮށްދީފައެވެ. އެގޮތުން ބެންފިކާ، ޕޯޓޯ، ޗެލްސީ، މެންޗެސްޓާ ޔުނައިޓެޑް، ރެއާލް މެޑްރިޑް އަދި އިންޓަ މިލާނަށް ވަނީ އިރުޝާދު ދީފައެވެ. އަދި މޮރީނިއޯ ވަނީ ޕޯޓޯ އާއި އިންޓަ މިލާނަށް ޔުއެފާ ޗެމްޕިއަންސް ލީގު ކާމިޔާބުކޮށްދީފައެވެ.
