ފަރެސްމާތޮޑާ ޒުވާނަކު ހާލުބޮޑުވެގެން ވިލިނގިލި ކޮވިޑް ފެސިލިޓީއަށް ބަދަލުކޮށްފި
ފަރެސްމާތޮޑާ އިން ކޮވިޑް ޖެހުނީ 30 އަހަރުގެ ޒުވާނެއް
ގއ. ވިލިނގިލީ ކޮވިޑް ފެސިލިޓީއަށް ބަލި މީހަކު ގެންދަނީ
ގދ. ފަރެސްމާތޮޑާ އިން ކޮވިޑް ޖެހުނު 30 އަހަރުގެ ޒުވާނެއް ހާލުބޮޑުވެގެން ގއ. ވިލިނގިލި ކޮވިޑް ފެސިލިޓީއަށް ބަދަލުކޮށްފިއެވެ.
ގއ. އަތޮޅު ހޮސްޕިޓަލްގެ މެނޭޖަރ ޝަރީފް އަހުމަދު ރާއްޖެޓީވީއަށް ވިދާޅުވީ އަންގާރަ ދުވަހުގެ ރޭ ފަރެސްމާތޮޑާއިން ކޮވިޑަށް ޕޮޒިޓިވްވި ޒުވާނަކު ނޭވާލުމަށް އުނދަގޫވެގެން ކޮވިޑް ފެސިލިޓީއަށް ގެނެސްފައިވާ ކަމަށެވެ. ޝަރީފް ވިދާޅުވީ އޭނާ ކޮވިޑް ފެސިލިޓީއަށް ގެންގޮސްފައިވަނީ އެޗްޕީއޭގެ އިރުޝާދުގެ ދަށުން ކަމަށެވެ.
ގއ. އަދި ގދ. އަތޮޅުގައި ކޮވިޑް-19 ގެ ބަލިމަޑުކަން ފާއިތުވި ދެ ހަފްތާގެ ތެރޭގައި މައްޗަށް ދިޔަ ނަމަވެސް މިހާރު އެ ސަރަހައްދުގެ އާންމު ހާލަތު އަންނަނީ ރަނގަޅުވަމުންނެވެ.
ޝަރީފް ވިދާޅުވީ ވިލިނގިލީ ކޮވިޑް ފެސިލިޓީގައި މި މަހުގެ 8 ވަނަ ދުވަހު ގދ. ހޯނޑެއްދޫއިން ގެނައި އުމުރުން ދުވަސްވީ ދެމަފިރިން މިހާރުވެސް އެ ފެސިލިޓީގައި އެބަތިބި ކަމަށެވެ. އޭނާ ވިދާޅުވީ އެ ދެމަފިރިންގެ 14 ދުވަހުގެ މުއްދަތު ހަމަވި ނަމަވެސް، އެމީހުންނަކީ އުމުރުން ދުވަސްވެފައި ތިބި ދެމީހުން ކަމުން އިތުރު 21 ދުވަސް ވަންދެން ކޮވިޑް ފެސިލިޓީގައި ބޭތިއްބުމަށް ނިންމާފައިވާ ކަމަށެވެ.
ވިލިނގިލީ ކޮވިޑް ފެސިލިޓީއަށް މިހާތަނަށް ފަސް މީހުން ފަރުވާ ދިނުމަށް ގެންގޮސްފައިވާއިރު، އޭގެ ތެރެއިން ދާންދޫއިން ގެންދިޔަ ދެމައިން ވަނީ މި މަހުގެ 15 ވަނަ ދުވަހު ބަލިން ރަނގަޅުވުމުން ދޫކޮށްލާފައެވެ.
މާލެ ނުގެނެސް ކޮވިޑަށް ފަރުވާ ދިނުމުގެ ކަންކަން ކުރިއަށް ގެންދިއުމުގެ ގޮތުން ރާއްޖޭގެ 5 ސަރަހައްދެއްގައި ވަނީ ކޮވިޑް ފެސިލިޓީތައް ގާއިމުކޮށްފައެވެ.
