ފޯކައިދޫ ރައްޔިތުން އެދޭގޮތަށް ބަނދަރުގެ މަސައްކަތް ވީހާވެސް އަވަހަކަށް ނިންމާނަން: އާޒިމް

ށ. ފޯކައިދޫގައި ސަރުކާރުން ތަރައްގީކުރަމުން އަންނަ ބަނދަރުގެ މަސައްކަތް އެރަށުގެ ރައްޔިތުން އެދިލައްވާގޮތަށް ވީހާވެސް އަވަހަކަށް ނިންމަވާނެ ކަމަށް ބަނދަރުގެ މަސައްކަތުގެ ކޮންޓްރެކްޓަރ އެމްޓީސީސީން ބުނެފިއެވެ.

ރާއްޖެޓީވިގެ ގައުމީ ތަރައްގީ ޕްރޮގްރާމުގައި ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ އެރަށުގެ ރައްޔިތުން ކީ ހޫނު މަރުހަބާ ބަލައިގަންނާނީ މަސައްކަތް ނިންމަންވާ ދުވަހަށް ކޮލިޓީ ރަނގަޅު މަސައްކަތެއް ނިންމާ ރައްޔިތުންނާއި ހަވާލުކުރައްވަމުން ކަމަށެވެ. އާޒިމް ވިދާޅުވީ ބަނދަރުގެ މަސައްކަތް ފެށިފައިވާ ކަމަށާއި، މި މަސައްކަތުގެ ދަށުން އެރަށުގައި 1200 ފޫޓުގެ ދިގު ބަނދަރެއް ހެދިގެންދާނެ ކަމަށެވެ.

Advertisement

މިހާރު ބަނދަރު ހަދާފައި އޮންނަ ތަނުގެ ގޮތުން ގޮންޖެހުންތަކާއި ދިމާވާކަން ފާހަގަ ކުރައްވާ އާޒިމް ވިދާޅުވީ އާ ބަނދަރު ހެދިގެންދަނީ، ރަށުގެ ރައްޔިތުންނާއި، އެންވަޔަރަމަންޓް މިނިސްޓްރީ އާއި، ކޮންސަލްޓެންޓުންނާއި ވާހަކަ ދެކެވިގެން ރަށުގެ ރައްޔިތުން ބޭނުންވާ ސަރަހައްދެއްގައި ކަމަށެވެ.

އާޒިމް ވިދާޅުވީ ބަނދަރު ނިންމުމަށް ދީފައިވާ މުއްދަތަކީ 500 ދުވަސް ނަމަވެސް، ޓާގެޓަކީ އެއަށްވުރެ އަވަހަށް ބަނދަރުގެ މަސައްކަތް ނިންމުން ކަމަށެވެ. އެގޮތުގެ މަތިން އަންނަ އަހަރުގެ ތެރޭގައި ބަނދަރުގެ މަސައްކަތް އެއްކޮށް ނިންމާ ރައްޔިތުންނަށް ބަނދަރު ބޭނުންކުރެވޭވަރުކޮށްދެއްވާނެ ކަމަށް އާޒިމް ވިދާޅުވިއެވެ.

ފޯކައިދޫ ބަނދަރު ތަރައްގީ ކުރުމުގެ މަޝްރޫޢުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި، 507 މީޓަރ ބޮޑުހިލައިގެ ބޭރުތޮށި ޖެހުމާއި، 464 މީޓަރ އެއްގަމުތޮށި ޖެހުމާއި، 2320 ސްކެއަރ މީޓަރ ޕޭވްމަންޓް ހެދުމާއި، 12 މޫރިން ބްލޮކްސް ޖެހުމާއި، 39,995 ކިއުބިކް މީޓަރ ބަނދަރު ފުންކުރުމާއި، 4,000 ކިއުބިކް މީޓަރ ނެރު ފުންކުރުމާއި، 100 މީޓަރ ރިވެޓްމަންޓް ޖެހުމާއި 2 ނެރުބައްތި ޖެހުމުގެ އިތުރުން 24 ބަނދަރު ބައްތި ޖެހުން ހިމެނެއެވެ.

55,974,940.88 ރުފިޔާ ހަރަދުކޮށްގެން ކުރިއަށްގެންދާ މި މަޝްރޫޢުއަކީ 500 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ.