އިންކަމް ސަޕޯޓް އެލަވެންސް ގޮތުގައި ދޫކުރި އަދަދު 79.2 މިލިއަނަށް
22 ސެޕްޓެމްބަރު 2020 | އަންގާރަ 19:5618،724 މީހުން އެދިފައިވޭ
އިންކަމް ސަޕޯޓް އެލަވެންސްގެ ގޮތުގައި ދޫކުރަނީ 5000 ރުފިޔާ
އިންކަމް ސަޕޯޓް އެލަވަންސްގެ ގޮތުގައި 79.2 މިލިއަން ރުފިޔާ ދޫކޮށްފިއެވެ.
ފިނޭންސް މިނިސްޓްރީ އިން އާންމުކޮށްފައިވަ ތަފާސްހިސާބުތައް ދައްކާ ގޮތުން މި މަހުގެ 17 ގެ ނިޔަލަށް 7،742 ފަރާތަކަށް އިންކަމް ސަޕޯޓް އެލަވަންސް ވަނީ ދޫކޮށްފައެވެ. އެ އެލަވަންސް އަށް 18،724 މީހުން އެދިފައިވާ ކަމަށް ފިނޭންސް އިން ބުނެއެވެ.
އިންކަމް ސަޕޯޓް އެލަވަންސް ދޭން ސަރުކާރުން ނިންމީ ކޮވިޑް-19 ގެ ސަބަބުން ވަޒީފާ ގެއްލުނު މީހުންނަށް އެހީވުމުގެ ގޮތުންނެވެ. އިންކަމް ސަޕޯޓް އެލަވެންސް ދޫކުރަން ފެށީ މޭ މަހުގެ 20 އިން ފެށިގެންނެވެ. އެލަވެންސްގެ ގޮތުގައި ދޫކުރަނީ 5000 ރުފިޔާއެވެ.
މި އެލަވަންސް ދެނީ، ވަޒީފާ އަދާކުރާ ނުވަތަ އަމިއްލަ މަސައްކަތް ކުރާ ދިވެހިންގެ ތެރެއިން، މާޗް މަހުގެ އެކެއްގެ ފަހުން ވަޒީފާއިން ވަކިކޮށް ނުވަތަ މުސާރަ ނުލިބޭ ގޮތަށް ސަސްޕެންޑް ކޮށްފައިވާ ފަރާތްތަކަށެވެ. މުސާރަ ނުލިބޭގޮތަށް ނޯޕޭއަށް ފޮނުވާލާފައިވާ ނުވަތަ މުސާރައިން ބައެއް އުނިކޮށްފައިވާ ފަރާތްތަކަށް ލިބޭނެ ކަމަށް ފިނޭންސުން ވަނީ ބުނެފައެވެ.
ފިނޭންސް މިނިސްޓްރީން ވަނީ ކޮވިޑް-19 އާ ގުޅިގެން ޑިސެމްބަރު މަހުގެ ފަހުން ވަޒީފާ އަށް އަސަރު ކޮށްފައިވާ ފަރާތްތަކުގެ ތެރެއިން އެލަވެންސް ލިބޭ ޝަރުތު ހަމަވާ މީހުންނަށް އެލަވެންސް ދޭން ވަނީ ނިންމާފައެވެ.
ކޮވިޑުގެ ސަބަބުން އެންމެ ބޮޑަށް ވަޒީފާގެ އަަސަރުކޮށްފައިވަނީ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށެވެ. ގިނަ އަދަދެއްގެ މުވައްޒަފުންތަކެއް ވަޒީފާއިން ވަކިކުރުމުގެ އިތުރުން ނޯޕޭ އަށް ވަނީ ފޮނުވާލާފައެވެ.
