ކެއަރ ޕެކޭޖުތަކުން ރަމްޒުކޮށްދެނީ ސަރުކާރުގެ އޯގާތެރިކަން: ފިރުޝާން

ގދ. ހޯނޑެއްދޫގައި ކޮވިޑް-19 ފެތުރެމުންދިއުމާ ގުޅިގެން ޖެންޑަރ މިނިސްޓްރީއާއި ހެލްތު މިނިސްޓްރީން ފޮނުވި ކެއާރ ޕެކޭޖުތަކާއި އެހެނިހެން ސާމާނުތައް ލިބިފައިވާ ކަމަށާއި މިކަމުގެ ސަބަބުން ސަރުކާރުގެ އޯގާތެރިކަން ރަމްޒުކޮށްދޭ ކަމަށް މަޑަވެލި ދާއިރާގެ މެންބަރު ހުސައިން ފިރުޝާން ވިދާޅުވެއްޖެއެވެ.

މެންބަރު ހުސައިން ފިރުޝާންގެ ފޭސްބުކް ޕޭޖުގައި އަންގާރަ ދުވަހު ކޮށްފައިވާ ޕޯސްޓެއްގައި ބުނެފައިވަނީ ހޯނޑެއްދޫގައި ކޮވިޑް-19 ބަލި ފެތުރެމުން ދިއުމާއެކު ޖެންޑަރ މިނިސްޓްރީއާއި ހެލްތު މިނިސްޓްރީން ފޮނުވި ކެއާރ ޕެކޭޖުގެ ތެރޭގައި 196 ބަސްތާ ހަނޑުލާއި، 196 ބަސްތާ ހަކުރު އަދި 33 ބަސްތާ މުގުގެ އިތުރުން ބަލި މީހުން އައިސޮލޭޓް ކުރުމަށް ބޭނުންވާ 11 އެނދާއި ގޮދަޑި ހިމެނޭ ކަމަށެވެ. މީގެ އިތުރުން ހާއްސަ އެހީއަށާއި އުމުރުން ދުވަސްވީ ފަރާތްތަކަށް ބޭނުންވާ ޕެކޭޖްތަކުގެ އިތުރުން ސެނިޓައިޒާ އާއި އަންގި އަދި ފޭސް މާސްކު ވެސް އެރަށަށް ފޮނުވި ކެއަރ ޕެކޭޖުގެ ތެރޭގައި ހިމެނޭ ކަމަށް ފިރުޝާން ވިދާޅުވެފައިވެއެވެ.

ރާއްޖެއެމްވީއަށް މައުލޫމާތު ދެއްވަމުން ކެއަރ ޕެކޭޖުގެ ތެރޭގައި ހިމެނޭ ހަނޑުލާއި، ހަކުރު އަދި މުގު ހޯނޑެއްދޫގެ ގެތަކަށް ބަހާ ނިމިފައިވާ ކަމަށެވެ.

ފިރުޝާން އިތުރަށް ވިދާޅުވެފައިވަނީ މި ބަލިމަޑުގެ ސަބަބުން ހޯނޑެއްދޫއަށް ދިމާވެފެވައިވާ ދަތި އުނދަގޫ ހާލަތުން އަރައިގަތުމަށް ސަރުކާރުން ކުރައްވަމުންގެންދަވާ މަސައްކަތަށް ޝުކުރު އަދާކުރައްވާ ކަމަށެވެ. އަދި ވަކިން ހާއްސަކޮށް ރައީސް އިބްރާޙިމް މުހައްމަދު ޞާލިހުގެ ފަރާތުން ދެއްވާ އެއްބާރުލުމާ އެހީތެރިކަމަށް ހޯނޑެއްދޫ އެންމެހާ ރައްޔިތުންގެ ނަމުގައި ޝުކުރުއަދާކުރައްވާ ކަމަށެވެ.

މީގެ އިތުރުން މެންބަރު ފިރުޝާން ވަނީ ހޯނޑެއްދޫ ހެލްތު ސެންޓަރާއި ކައުންސިލް އަދި ފްރޮންޓު ލައިންގައި މަސައްކަތް ކުރައްވާ ފަރާތްތަކުން ކުރަމުންދާ ބުރަ މަސައްކަތް ފާހަގަކޮށް އެފަރާތްތަކަށްވެސް ޝުކުރުއަދާކުރައްވާފައެވެ.

ގދ. ހޯނޑެއްދޫއަކީ އަތޮޅު ތެރޭގައި މިހާތަނަށް އެންމެ ގިނަ އަދަދަކަށް ކޮވިޑަށް ޕޮޒިޓިވްވި މީހުން ހިމެނޭ ރަށެވެ. އެރަށުން މިހާތަނަށް ވަނީ ކޮވިޑް-19 އަށް 44 މީހުން ޕޮޒިޓިވްވެފައެވެ. ނަމަވެސް މިހާރު އޭގެ ތެރެއިން 25 ވަނީ ރަނގަޅުވެފައެވެ. އަދި 19 މީހަކަށް ފަރުވާދެމުން އަންނަ ކަމަށް ހެލްތް ޕޮރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފައެވެ.

މެންބަރު ފިރުޝާން ވަނީ ކޮވިޑް-19 އާއި ގުޅިގެން މަޑަވެލި ދާއިރާގައި ހިމެނޭ ރަށްތަކަށް ބޭނުންވާ މާސްކާއި ސެނިޓައިޒާވެސް ފޯރުކޮށްދީފައެވެ.