ޖީއެމްއައިޒެޑްއެލްގެ މުވައްޒަފުންނާއި މުދަލާއި ތަކެތި އެޗްޑީސީގެ ދަށަށް ބަދަލު ކުރުމަށް ނިންމައިިފި
ދެ ކުންފުނި އެއްކޮށްލަން ނިންމާފައިވަނި ހަރަދު ކުޑަކުރުމުގެ ގޮތުން
ގްރޭޓަރ މާލެ އިންޑަސްޓްރިއަލް ޒޯން ލިމިޓެޑްގެ އެމްޑީ އިބްރާހިމް ރަޝީދު، ރައީސް އިބްރާހިމް މުހައްމަދު ސޯލިހާއެކު
ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) ގެ މުވައްޒަފުންނާއި މުދަލާއި ތަކެތި ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ ދަށަށް ބަދަލު ކުރުމަށް ނިންމައިިފިއެވެ.
ޖީއެމްއައިޒެޑްއެލް އަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ތިލަފުއްޓާއި ގުޅިފަޅު މެނޭޖް ކުރުމަށް އުފެއްދި ކުންފުންޏެކެވެ. އެޗްޑީސީ އަކީ ހަމައެކަނި ހުޅުމާލޭގެ ކަންކަން މެނޭޖް ކުރުމަށް އުފައްދާފައިވާ ކުންފުންޏެކެވެ.
ސަރުކާރުން އެކުލަވާލައްވާފައިވާ ސިޔާސަތުތަކާ އެއްގޮތަށް ހުޅުމާލެ، ގުޅިފަޅު އަދި ތިލަފުށި ތަރައްގީ ކުރުމުގެ މަސައްކަތްތައް އެޗްޑީސީ އިން ކުރިއަށް ގެންދާނީ ސަރުކާރުގެ މަޝްވަރާ އާއި ލަފާގެ މަތިން ކަން ފާހަގަކޮށް ޖީއެމްއައިޒެޑްއެލް އިން ބުނީ އެ ނިންމުމާ ގުޅިގެން އެ ކުންފުންޏާއެކު ހެދިފައިވާ އެއްބަސްވުންތަކަށާއި ލިޔެކިޔުންތަކަށް ގެންނަން ޖެހޭ އެންމެހާ ބަދަލުތައް ގެނައުމަށް އެ ކުންފުނިން މުއާމަލާތް ކުރަމުން ގެންދާނެ ކަމަށެވެ.
ޖީއެމްއައިޒެޑްއެލް އެގޮތަށް ނިންމާފައިވަނީ ދެ ކުންފުނި އެއްކޮށްލުމުން މާލީ ގޮތުންނާއި އަދި ހިންގުމުގައި ލިބޭނެ ފައިދާ ތަކަށް ރިއާޔަތް ކުރުމަށްފަހު ހުޅުމާލެ، ތިލަފުށި، ގުޅިފަޅު ހިމެނޭ ގޮތަށް ގްރޭޓާ މާލޭ އޭރިއާ ތަރައްގީ ކުރަން ކުރަން ޖެހޭ އެންމެހައި މަސައްކަތްތައް އެއް ކުންފުންޏެއްގެ ދަށުން ކުރިއަށް ގެންދިޔުމަށް ކަމަށް ވަނީ ބުނެފައެވެ.
