ޔުވެންޓަސްއިން ސުއަރޭޒްގެ ސޮއި ނުހޯދާނެކަން ހާމަކޮށްފި

ޔުވެންޓަސްއިން ބާސެލޯނާއަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒްގެ ސޮއި ނުހޯދާނެ ކަމަށް އެ ކުލަބުގެ ސްޕޯޓިންގ ޑިރެކްޓަރު ފަބިއޯ ޕަރާޓިޗީ ބުނެފިއެވެ.

މީގެ ކުރިން މީޑިއާތަކުން ވަނީ އުމުރުން 33 އަހަރުގެ ސުއަރޭޒް ޔުވެންޓަސްއާއެކު ތިން އަހަރުގެ އެއްބަސްވުމެއް ހަދަން ނިންމި ކަމަށް ރިޕޯޓުކޮށްފައެވެ. އެކަމަކު ސުއަރޭޒަށް އިޓަލީގެ ރަށްވެހިކަން ނުލިބުމާ ގުޅިގެން އެ ޑީލް ހުއްޓުމުކަށް އައިސްފައިވާ ކަމަށް ދާދި ފަހުން ވަނީ ރިޕޯޓުކޮށްފައެވެ.

"ސްކައި ސްޕޯޓްސް" އަށް ދިން އިންޓަވިއުއެއްގައި ފަބިއޯ ޕަރާޓިޗީ ބުނީ އިޓަލީގެ ރަށްވެހިކަން ހޯދަން ސުއަރޭޒަށް ގިނަ ދުވަސްތަކެއް ނަގާނެ ކަމަށާއި، އެހެންކަމުން ޓްރާންސްފާ ބާޒާރު ނިމޭއިރުވެސް ޔުވެންޓަސްއަށް ސުއަރޭޒްގެ ސޮއި ނުހޯދޭނެ ކަމަށެވެ. އެހެންކަމުން މިހާރު ސުއަރޭޒް ހޯދުމަށް ޔުވެންޓަސްއިން ކުރަމުން އައި މަސައްކަތް ހުއްޓާލާފައިވާ ކަމަށްވެސް އޭނާ ވަނީ ބުނެފައެވެ.

މީގެ ކުރިން ޔުވެންޓަސްގެ ކޯޗު އަންދްރެއާ ޕިރްލޯ ބުނީ ސުއަރޭޒަށް އިޓަލީގެ ރަށްވެހިކަން ނުލިބުމުން، ޔުވެންޓަސްއަށް އޭނާގެ ސޮއި ހޯދުން ވާނީ އުނދަގޫ ކަމަކަށް ކަމަށެވެ. އަދި ބުނީ ޔުވެންޓަސްއިން ފޯވާޑެއް ހޯދުމަށް މަސައްކަތް ކުރަމުން އަންނަ ކަމަށާއި، އެކަމަކު އެއީ އަވަސް އަރުވާލައިގެން ކުރާނެ ކަމެއް ނޫން ކަމަށެވެ. އެކަމަކު މި ޓްރާންސްފާ ބާޒާރު ނިމުމުގެ ކުރިން ޔުވެންޓަސްއާ ފޯވާޑެއް ގުޅޭނެ ކަމަށްވެސް އޭނާ ވަނީ ބުނެފައެވެ.

ޔުވެންޓަސްއިން ސުަރޭޒް ހޯދުމަށް ކުރަމުން އައި މަސައްކަތް ހުއްޓާލިއިރު، މިހާރު އޭނާ ހޯދުމަށް މަސައްކަތް ކުރަމުން އަންނަނީ އެތުލެޓިކޯ މެޑްރިޑުންނެވެ. ބާސާގެ އައު ކޯޗު ރޮނާލްޑް ކޫމަންގެ ޕްލޭނުގައި ސުއަރޭޒް ނުހިމެނޭތީ އޭނާ ވިއްކާލަން ބާސާއިން މަސައްކަތް ކުރަމުން އަންނައިރު، ސުއަރޭޒް މިވަގުތު ބާސާގެ އެއްބަސްވުމުގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. އެހެންކަމުން ބާސާއިން ސުއަރޭޒް ވިއްކާލާނަމަ އޭނާގެ ފުރިހަމަ މުސާރަ ކަމަށްވާ 14 މިލިޔަން ޔޫރޯ ބާސާއިން ދައްކަން ޖެހޭނެ ކަމަށް ރިޕޯޓުތައް ބުނެއެވެ.

ބާސާއިން ސުއަރޭޒް ވިއްކާލުމަށް މަސައްކަތް ކުރަމުންދާއިރު، ލިވަޕޫލް ދޫކޮށް 2014 ވަނަ އަހަރު 65 މިލިޔަން ޕައުންޑަށް ބާސާއާ ގުޅުނު ފޯވާޑް ވަނީ މިހާތަނަށް ބާސާއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ސުއަރޭޒް މިހާތަނަށް ބާސާއަށް ކުޅެދިން 283 މެޗުގައި 198 ލަނޑު ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު ހަތަރު ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.