އަމިއްލަ މަސައްކަތްކުރާ 489 އަންހެނުންނަށް ލޯނު ދޫކޮށްފި
އެސްޑީއެފްސީ އިން ވަނީ އަންހެނުންނަށް 104 މިލިއަން ރުފިޔާގެ ލޯނު ދޫކޮށްފައި
އަންހެނުންތަކެއް ފެހުމުގެ މަސައްކަތުގައި ހަރަކާތްތެރިވަނީ
ކުދި އަދި މެދު ފަންތީގެ ވިޔަފާރި ހިންގާ އަންހެނުންނާއި އަމިއްލަ މަސައްކަތްކުރާ އަންހެނުންގެ ތެރެއިން 489 އަންހެނުންނަށް ރިކަވަރީ ސްކީމްގެ ދަށުން ލޯނު ދޫކޮށްފައިވާކަމަށް ފިނޭންސް މިނިސްޓްރީ އިން ބުނެފިއެވެ.
ފިނޭންސް މިނިސްޓްރީ އިން އާންމުކޮށްފައިވާ ތަފާސްހިސާބުތައް ދައްކާގޮތުން އެސްއެމްއީ ޑޮވެލޮޕްމެންޓް ފައިނޭންސިން ކޯޕަރޭޝަން (އެސްޑީއެފްސީ) އިން ވަނީ ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް 489 އަންހެނުންނަށް 104 މިލިއަން ރުފިޔާގެ ލޯނު ދޫކޮށްފައެވެ. އެގޮތުން ކުދި އަދި މެދު ފަންތީގެ ވިޔަފާރި ހިންގާ 393 ފަރާތަކަށް 101.1 މިލިއަން ރުފިޔާގެ ލޯނު އެސްޑީއެފްސީ އިން ވަނީ ދޫކޮށްފައެވެ. އަދި އަމިއްލަ މަސައްކަތް ކުރާ 96 އަންހެނުންނަށް 2.9 މިލިއަން ރުފިޔާ ވަނީ ދޫކޮށްފައެވެ.
ފިނޭންސް އިން އާންމުކޮށްފައިވާ ތަފާސް ހިސާބުތަކުން ދައްކާގޮތުން ޖުުމްލަ 758 އަންހެނުން ވަނީ މި ލޯނަށް އެދި މިހާތަނަށް ހުށައަޅާފައެވެ. މިއި 156.9 މިލިއަން ރުފިޔާގެ ލޯނެވެ. އެއީ 504 ވިޔަފާރިއަކަށް 150.4 މިލިއަން ރުފިޔާ އާއި އަމިއްލަ މަސައްކަތްކުރާ 254 ފަރާތަކަށް 6.5 މިލިއަން ރުފިޔާގެ ލޯނެވެ.
ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް އެސްޑީއެފްސީ އިން ވަނީ 1,640 ފަރާތަކަށް 268.3 މިލިއަން ރުފިޔާގެ ލޯނު ދޫކޮށްފައެވެ. އަންހެނުންނަށް ދޫކޮށްފައިވާ ލޯނުތަކަކީ މިއަދަދުގެ 29.8 އިންސައްތައެވެ.
