"ކޮވިޑަކީ ސިޔާސީ ފުޓުބޯޅައަކަށް ނުހައްދަވާ"

މުޅި ދުނިޔެއަށް ދިމާވެފައިވާ ކޮވިޑް-19 ގެ ބަލިމަޑުކަމަކީ "ސިޔާސީ ފުޓުބޯޅަ" އަކަށް ނުހެދުމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.

ކޮވިޑަށް ވެކްސިނެއް ހޯދުމަށް ކުރެވެމުންދާ މަސައްކަތުގައި އެމެރިކާގެ ރައީސް ޑޮނަލްޑް ޓްރަމްޕާއި، އެ ޤައުމުގެ ސިއްޙީ އޮފިޝަލުންނާ ޙިޔާލު ތަފާތުވުންތައް އުފެދިފައިވާއިރު، އެކަމާ ގުޅޭގޮތުން ޑަބްލިއުއެޗްއޯގެ އިމަރޖެންސީ އެކްސްޕާރޓް މައިކް ރަޔަން ވަނީ ބޭރުގެ ނޫސްތަކަށް މައުލޫމާތު ދެއްވާފައެވެ.

އެގޮތުން އެކަމާ ގުޅިގެން ކުރި ސުވާލަކަށް ޖަވާބު ދެއްވަމުން ރަޔަން ވިދާޅުވީ، މިކަމުގައި ސަރުކާރުތަކާއި، ސައިންސް އެއް މަގަކުން މަސައްކަތް ކުރަން ޖެހޭ ކަމަށެވެ. ޚާއްސަކޮށް ކޮވިޑަކީ އޭގެ އެންމެ ފުރިހަމަ މައުލޫމާތު ސައިންސްވެރިން ވެސް އަދިވެސް ދެނެގަންނަމުންދާ ވައިރަސް އަކަށްވާއިރު، ރައްޔިތުންނަށް ވެސް އެންމެ ފުރިހަމަ ސައްޙަ މައުލޫމާތުތައް ދޭން ޖެހޭނެ ކަމަށް ރަޔަން ވިދާޅުވިއެވެ.

ރަޔަން ވަނީ ކޮވިޑުގެ މި ޙާލަތަކީ ސިޔާސީ ފުޓުބޯޅައަކަށް ނުހެއްދެވުމަށް ޤައުމުތަކަށް އިލްތިމާސް ކުރައްވާފައެވެ.

ރަޔަން އެހެން ވިދާޅުވެފައިވާއިރު، އެމެރިކާގެ ސެންޓަރ ފޯރ ޑިޒީޒް ކޮންޓްރޯލް (ސީޑީސީން) ބުނަމުންދަނީ އެމެރިކާ އިން އެންމެ އަވަހަށް ވެސް ކޮވިޑް-19 އަށް އެކަށީގެންވާ ވެކްސިނެއް ލިބޭނެ ކަމަށް ބެލެވެނީ އަންނަ އަހަރުގެ މެދުތެރޭގައި ކަމަށެވެ. އެހެން ނަމަވެސް، ޓްރަމްޕް ވަނީ އަންނަ އޮކްޓޯބަރު މަހުގެ ތެރޭގައި ވެކްސިން ބަހަން ފައްޓަވާނެ ކަަމަށާއި، ސީޑީސީގެ އޮފިޝަލަށް އެހެން ވިދާޅުވެވުނީ "އޮޅުމަކުން" ކަމަށް ބެލެވޭ ކަމަށް ވިދާޅުވެ، ރިޔާސީ އިންތިޚާބުގެ ކުރިން ވެކްސިނެއް ލިބޭނެ ކަމަށް ވިދާޅުވެފައެވެ.