ސަޢޫދީއިން ޙައްޖުގެ މަތިވެރި އަޅުކަން ސިޔާސީ ކޮށްފި: އިންޑޮނީޝިއާގެ ޒުވާނުން

ސަޢޫދީ ޢަރަބިއްޔާއިން ޙައްޖުގެ މަތިވެރި އަޅުކަން ސިޔާސީ ކޮށްފައިވާކަމަށް ދުނިޔޭގެ މުސްލިމުންގެ އާބާދީ އެންމެ ބޮޑު އިންޑޮނީޝިއާގެ ޒުވާނުން ބުނެފިއެވެ.

އިންޑޮނީޝިއާއިން މިހެން ބުނެފައިވަނީ އެޤައުމުގެ މުސްލިމް ސްޓޫޑަންޓް އެސޯސިއޭޝަންގެ ބައްދަލުވުމެއްގައެވެ. މުސްލިމް ސްޓޫޑަންޓް އެސޯސިއޭޝަންގެ ރައީސް ޒިޔާދު އަބްދުލް މާލިކް ބުނީ ސަޢޫދީއިން ހައްޖުގެ އަޅުކަން ސިޔާސީކޮށް، ދެޙަރަމްފުޅު ސަޢޫދީގައި ހުންނާތީ އެކަމުގެ ނާޖާއިޒު ފައިދާ ނަގަމުންދާކަމަށެވެ. އަދި ސަޢޫދީގެ ސިޔާސަތު ގަލްފުގެ ޤައުމުތަކާއި މުސްލިމް ޤައުމުތަކަށް ފަތުރަން ޙައްޖުގެ އަޅުކަން، ސަޢޫދީއިން ސިޔާސީ ހަތިޔާރަކަށް ހަދާފައިވާކަމަށް އޭނާ ތުހުމަތުކުރިއެވެ.

އިންޑޮނީޝިއާގެ ވެރިރަށް ޖަކާޓާގައި މުސްލިމް ސްޓޫޑަންޓް އެސޯސިއޭޝަނުން ބޭއްވި މި ބައްދަލުވުމުގެ މައުޟޫއަކީ؛ "އިސްލާމުންގެ މުޤައްދަސް ތަންތަން މުޅި އުއްމަތަށް،" މިއެވެ.

މާލިކް ވަނީ އެ ބައްދަލުވުމަށްވެސް ސަޢޫދީއިން ނުފޫޒު ފޯރުވާފައިވާކަމަށް ތުހުމަތުކޮށްފައެވެ. މި ކޮންފަރެންސް އެންމެ ފުރަތަމަ ބާއްވަން ނިންމީ ޖަކާޓާގައި ހުންނަ ސްޓޭޓް އިސްލާމިކް ޔުނިވަރސިޓީގައެވެ. އެހެންނަމަވެސް އިންޑޮނީޝީއާގައި ހުންނަ ސަޢޫދީ އެމްބަސީގެ އެދުމުގެ މަތިން އެތަނުގައި ބައްދަލުވުން ބޭއްވުމަށް ހުއްދަ ދީފައެއް ނުވެއެވެ.

"އަހަރެމެންނަކީ ދަރިވަރުން. ދަރިވަރުން ކަންކަން މަޝްވަރާކުރާނެ. އެކަން ސަޢޫދީއަށް މައްސަލައަކަށްވާންވީ ކީއްވެ؟،" މާލިކް ބުންޏެވެ.

މި ބައްދަލުވުމުގައި ވާހަކަ ދެއްކި ގިނަ ބަޔަކު ވަނީ ސަޢޫދީއިން ޔަމަން، އީރާން، ސޫރިޔާ އަދި ޤަތަރުގެ މައްސަލައިގައި އުފެދިފައިވާ ސިޔާސީ މައްސަލަތަކުގެ ތެރެއަށް ޙައްޖުގެ އަޅުކަން ވައްދައި، އެޤައުމުތަކުގެ ރައްޔިތުންގެ މައްޗަށް ހައްޖާއި ގުޅޭ ވަކި ޤަވާޢިދުތަކެއް ހިންގާކަމަށް ތުހުމަތުކޮށްފައެވެ.

މި ބައްދަލުވުމުގައި ވާހަކަ ދެއްކި އެހެން ބައެއް ފަރާތްތަކުން ވަނީ ސަޢޫދީއިން ދެ ޙަރަމްގެ ބެލެނިވެރި ފަރާތުގެ ހައިސިއްޔަތުގެ ބޭރުން ކަންކަންކުރާކަމަށްވެސް ތުހުމަތުކޮށްފައެވެ. އަދި ޙައްޖަށް ނުދެވޭނެ މީހުން ސަޢޫދީއަށް ކަނޑަނޭޅޭ ކަމަށާއި، އެކަމުގައި ﷲ ސުބުޙާނަހޫ ވަތަޢާލާ ގޮތްތަކެއް މުސްލިމުންނަށް އަންގަވާފައިވާ ކަމަށެވެ.

ދާޚިލީ ހަނގުރާމަތައް ހިނގަމުންދާ ޔަމަނާއި ސޫރިޔާއިން ޙައްޖަށް އަންނަ މީހުންނަށް ވިސާ ދެވެނީ ހަމައެކަނި ސަޢޫދީއިން މަދަދުވެރިވާ ޖަމާޢަތްތަކަށެވެ. އެހެންކަމުން އެޖަމާޢަތްތަކާއި ވާދަވެރި ޖަމާޢަތްތަކަށް ނިސްބަތްވާ ނުވަތަ އެޖަމާޢަތްތަކާއި ގުޅުން ނެތް ބަޔަކަށް ވިސާ ނުދީ ހިފަހައްޓަމުންދާކަމަށް ރިޕޯޓްތައް ބުނެއެވެ.

އިންޑޮނީޝިއާގެ ދަރިވަރުންގެ ޖަމާޢަތްތަކުން ސަޢޫދީއަށް ފާޑުކިޔަމުންދާއިރު، އިންޑިއާގެ މިފަދަ ޖަމާޢަތްތަކުންވެސް ސަޢޫދީއަށް އަންނަނީ ފާޑުކިޔަމުންނެވެ.