ޖަލުތައް ބެލެހެއްޓުމުގައި ގެންގުޅޭ މަންޑޭލާ ރޫލްސްގެ ދިވެހި ތަރުޖަމާ ކަރެކްޝަންސްއާ ހަވާލުކޮށްފި

ޖަލުތަކުގައި ގައިދީންނާ މެދު އަމަލު ކުރާނެ ގޮތުގެ އެންމެ ދަށް މިންގަނޑުތައް ކަނޑައަޅާފައިވާ ދި ޔުނައިޓެޑް ނޭޝަނަލް ސްޓޭންޑަޑް މިނިމަމް ރޫލްސް ފޯރ ދި ޓްރީޓްމަންޓު އޮފް ޕްރިޒަންސް، ދި ނެލްސަން މަންޑޭލާ ރޫލްސް ފޮތުގެ ދިވެހި ތަރުޖަމާ ރަސްމީކޮށް ކަރެކްޝަނަލް ސާވީސްއާ ހަވާލުކޮށްފިއެވެ.

މި ފޮތް ދިވެހި ބަހަށް ތަރުޖަމާ ކޮށްފައިވާނީ ހޯމް މިނިސްޓްރީއާ ރާއްޖޭގައި ހުންނަ ޔުނައިޓެޑް ނޭޝަންސް އޮފީސް އޮން ޑްރަގް އެންޑް ކްރައިމްސް (ޔޫއެންއޯޑީސީ) އާ ގުޅިގެންނެވެ. ބުރާސްފަތި ދުވަހު މާލޭ ޖަލުގައި ބޭއްވި ރަސްމިއްޔާތެއްގައި ފޮތުގެ ދިވެހި ތަރުޖަމާ ރަސްމީކޮށް ކަރެކްޝަންސްއާ ހަވާލު ކޮށްދެއްވި ހޯމް މިނިސްޓަރު އިމްރާން އަބްދުﷲ އެވެ. މި ފޮތް ކަރެކްޝަންސްގެ އޮފިސަރުންގެ އިތުރުން ގައިދީންނަށް ބެހުމަށް ވަނީ ހަމަޖެހިފައެވެ. އަދި ކުރިޔަށް އޮތް ހަފްތާއެއްގެ ތެރޭގައި މި ފޮތުގައި ހިމެނޭ ކަންތައްތަކުގެ ތަމްރީނުތައް ކަރެކްޝަންގެ އޮފިސަރުންނަށް ދިނުމަށް ހަމަޖެހިފައިވާ ކަމަށް ކަރެކްޝަނުން މައުލޫމާތުދެއެވެ.

ގައިދުރުކަމާއި އެކު ކުރިޔަށް ގެންދިޔަ ފޮތް ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން ކޮމިޝަނަރ އޮފް އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ، މި ފޮތުގައި ހުރި ކަންތައްތަކަށް އޮފިސަރުން އަހުުލުވެރި ކުރުން އެއީ މުހިއްމު މަސައްކަތެއްގެ ގޮތުގައި ދެކިވަޑައިގަންނަވާ ކަމަށެވެ. އަދި މިފަދަ ފޮތެއް ނެރުމުން އެނގިގެން ދަނީ ސަރުކާރުން ޖަލުތައް އިސްލާހު ކުރުމަށް އަމާޒު ހިފާފައިވާ މިންވަރު ކަމަށެވެ. ރާއްޖޭގައި ހުންނަ ޔޫއެންޑީސީގެ ގޮފީގެ ފަރާތުން ވާހަކަ ދައްކަވަމުން ތާއިބާ ސައީދު ވިދާޅުވީ، ޖަލުތައް އިސްލާހު ކުރުމަށް ކުރަމުންދާ މަސައްކަތްތަކަށް އަބަދުވެސް އެ ޖަމިއްޔާގެ އެއްބާރުލުން ލިބެމުންދާނެ ކަމަށެވެ.

"ނެލްސަން މަންޑޭލާ ރޫލްސް،" މި ފޮތަކީ ދެކުނު އެފްރިކާގެ ކަޅު ނަސްލުގެ ފުރަތަމަ ރައީސްކަމުގައިވާ ނެލްސަން މަންޑޭލާގެ ޝަރަފުގައި ލިޔެފައިވާ، އެއިރު ދެކުނު އެފްރިކާގައި ހިނގަމުންދިޔަ ނަސްލީ ތަފާތު ކުރުންތަކާއި ދެކޮޅަށް އޭނާ ކުރެއްވި ބުރަ މަސައްކަތްތައް ފާހަގަކުރުމުގެ ގޮތުން ލިޔެފައިވާ ފޮތެކެވެ.

ދެކުނު އެފްރިކާގެ "އެޕާތައިޑް" ވެރިކަމާއި ދެކޮޅަށް ކުރެއްވި މަސައްކަތުގެ ތެރެއިން ނެލްސަން މަންޑޭލާ 27 ދިގު އަހަރު ޖަލުގައި ހޭދަ ކުރައްވަން ޖެހިވަޑައިގެންނެވި އިރު، މި ފޮތުގައި ގައިދީންނާއި މެދު އިންސާފާއި، އިންސާނީ ކަރާމާތް ނުގެއްލޭ ގޮތައް ޢަމަލުތައް ބަހައްޓާނެ ގޮތް ވަރަށް ތަފްސީލުކޮށް ލިޔެފައިވެއެވެ.