އިންޑިއާގައި 60 މިލިއަނަށް ވުރެ ގިނަ މީހުން ކޮވިޑަށް ޓެސްޓްކޮށްފި
17 ސެޕްޓެމްބަރު 2020 | ބުރާސްފަތި 08:47ބުދަ ދުވަހުގެ ނިޔަލަށް 6,05,65,728 ސާމްޕަލް ވަނީ ޓެސްޓް ކުރެވިފައި
ކޮވިޑް-19 އަށް ސާމްޕަލް ނަގަނީ
ފާއިތުވި އަށް މަސް ތެރޭ އިންޑިއާއިން 60 މިލިއަނަށްވުރެ ގިނަ މީހުންގެ ސާމްޕަލް ކޮވިޑް-19 އަށް ޓެސްޓް ކުރެވިފައިވާ ކަމަށް ރިޕޯޓްތައް ބުނެފިއެވެ.
ހިންދުސްތާން ޓައިމްސްގައި ރިޕޯޓްކޮށްފައިވާ ގޮތުގައި، މިދިޔަ ޖެނުއަރީ މަހުން ފެށިގެން 60،565,728 ސާމްޕަލް ވަނީ ޓެސްޓް ކުރެވިފައެވެ. އަދި އެއީ ދުވާލެއްގެ މައްޗަށް ޓެސްޓް ކުރެވޭ އަދަދަށް ބަލާކަމަށް ވަނީނަމަ 1،136,613 އެވެ.
އިންޑިއާގައި އެންމެ ފުރަތަމަ ކޮވިޑް ޓެސްޓް ހަދަން ފަށާފައިވަނީ މިއަހަރުގެ ޖެނުއަރީ މަހުގެ 23 ވަނަ ދުވަހު ޕޫނޭގައި ހުންނަ އިންޑިއާ ކައުންސިލް އޮފް މެޑިކަލް ރިސާރޗްގެ ނެޝަނަލް އިންސްޓިޓިއުޓް އޮފް ވައިރޮލޮޖީ (އެންއައިވީ) ގައެވެ. އޭގެފަހުން ނެޓްވޯކް ފުޅާވެ ސަރުކާރާއި އަދި އަމިއްލަ ފަރާތްތަކުގެ 1751 ލެބޯޓްރީއެއްގައި މިހާރު ދަނީ ޓެސްޓް ހަދަމުންނެވެ.
ރިޕޯޓްތައް ބުނާގޮތުން ފާއިތުވި ތިން ހަފްތާއެއްހާދުވަހުގެ ތެރޭގައި ދުވާލެއްގެ މައްޗަށް ހެދޭ ޓެސްޓްތައް ވަނީ މިލިއަނަށްވުރެ މައްޗަށް އަރާފައެވެ. އޭގެ ތެރޭގައި ރިވާރަސް ޓްރާންސްކްރިޕްޝަން ޕޮލިމަރެސް ޗެއިން ރިއެކްޝަން (އާރުޓީ- ޕީސީއާރު) އަދި ރެޕިޑް އެންޓީޖެން ޑިޓެކްޝަން (އާރުއޭޑީ) ޓެސްޓް ހިމެނެއެވެ.
ޑޭޓާތަކުން ދައްކާގޮތުން މިދިޔަ އެޕްރީލް މަހުގެ 8 އާ ހަމައަށް 10،000 ސާމްޕަލް ވަނީ ޓެސްޓް ކުރެވިފައެވެ. އަދި އެ އަދަދު މަތިވަމުންގޮސް މިދިޔަ މެއި މަހުގެ 3 އާ ހަމައަށް ޓެސްޓް ކުރެވޭ އަދަދު ވަނީ މިލިއަނަކަށް އަރާފައެވެ.
