ނާޕޮލީއަށް ކުޅެމުން އަންނަ ޕޮލެންޑްގެ ފޯވާޑް އަރްކަޑިއުސް މިލިކް ހޯދުމަށް ޓޮޓެންހަމް ހޮޓްސްޕާއިން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން ޓޮޓެންހަމުން އުމުރުން 26 އަހަރުގެ މިލިކް ހޯދުމަށް މަސައްކަތް ފަށާފައިވަނީ އެ ޓީމުގެ ކޯޗު ހޯސޭ މޮރީނިއޯގެ އެދުމުގެ މަތިންނެވެ. އަދި މޮރީނިއޯ ބޭނުންވަނީ ބޮޑު ހޭދައެއް ކޮށްގެން ނަމަވެސް މިލިކްގެ ސޮއި ހޯދުމަށް ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން ޓޮޓެންހަމުން މިލިކް ހޯދުމަށް 28 މިލިޔަން ޕައުންޑް ޚަރަދުކުރުމަށް އޮތީ ތައްޔާރަށެވެ. އެކަމަކު ނާޕޮލީން މިލިކްގެ އެއްބަސްވުން އާކުރުމަށް މަސައްކަތް ކުރަމުން އަންނަ ކަމަށާއި، އެ ޓީމުން މިލިކްގެ މުސާރަ ދެ ގުނައަށް ބޮޑު ކުރުމަށް މިހާރު ހުށަހަޅާފައިވާ ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފައެވެ.

މޮރީނިއޯގެ އެދުމުގެ މަތިން މިލިކް ހޯދުމުގެ މަސައްކަތް ޓޮޓެންހަމުން ކުރަމުން އަންނައިރު، ދާދި ފަހުން ދިން އިންޓަވިއުއެއްގައި މޮރީނިއޯ ވަނީ އެޓީމަށް އިތުރު ފޯވާޑެއް މި ޓްރާންސްފާ ބާޒާރުގައި ބޭނުންވާ ކަމަށް ބުނެފައެވެ.

މީގެ ކުރިން ބަޔާ ލެވަކޫސެން އާއި އޯގްސްބާގްގެ އިތުރުން އަޔަކްސްއަށްވެސް ކުޅުނު މިލިކް ނާޕޮލީއާ ގުޅުނީ 2016 ވަނަ އަހަރު 32 މިލިޔަން ޕައުންޑްގެ އަގަކަށެވެ. ނާޕޮލީގައި މިލިކް މިހާތަނަށް ހަތަރު ސީޒަން ހޭދަކޮށްފައިވާއިރު، އޭނާ ވަނީ ނާޕޮލީއަށް ކުޅެދިން 122 މެޗުގައި 48 ލަނޑު ކާމިޔާބުކޮށްފައެވެ. އަދި ވަނީ ނާޕޮލީއާއެކު މިދިޔަ ސީޒަނުގެ އިޓާލިއަން ކަޕް ކާމިޔާބުކޮށްފައެވެ.