ރާއްޖެ އަށް ސޭފް ޓޫރިޒަމް ސްޓޭމްޕް ލިބިއްޖެ
މި ސްޓޭމްޕް ވޯލްޑް ޓޫރިޒަމް އޯގަނައިޒޭޝަން އިން ބަލައިގަނެ
ރާއްޖެއަށް ޗުއްޓީ ހޭދަކުރުމަށް އައި ފަތުރުވެރިން ތަކެއް
ވޯލްޑް ޓްރެވަލް އެންޑް ޓޫރިޒަމް ކައުންސިލް (ޑަބްލިއުޓީޓީސީ) އިން ދޭ، ސޭފް ޓޫރިޒަމް ސްޓޭމްޕް ރާއްޖެއަށް ލިބިއްޖެއެވެ.
ޓޫރިޒަމް މިނިސްޓްރީ އިން ނެރެފައިވާ ނޫސްބަޔާނެއްގައިވާ ގޮތުން ޑަބްލިއުޓީޓީސީ އިން ވަނީ ރާއްޖެ އަކީ ފަތުރުވެރިންނަށް ރައްކާތެރިތަނެއްގެ ގޮތުގައި ހެދުމަށް ކުރަމުންދާ މަސައްކަތްތައް އެ ކައުންސިލުން ބަލައިގަނެފައިވާ ކަމަށެވެ.
އެގޮތުން ޑަބްލިއުޓީޓީސީގެ ގައިޑްލައިންތަކާއި އެއްގޮތަށް ރާއްޖެ އަންނަ ފަތުރުވެރިންނާއި އެޖެންޓުންގެ އިތުބާރު ހޯދުމަށްޓަކައި ރާއްޖެ އިން ކުރަމުން އަންނަ މަސައްކަތްތައް އެ ކައުންސިލުން ބަލައިގަނެފައިވާކަން މިނިސްޓްރީ އިން ފާހަގަކުރެއެވެ.
ޓޫރިޒަމް މިނިސްޓްރީ އިން ވަނީ މި ސްޓޭމްޕަކީ ވޯލްޑް ޓޫރިޒަމް އޯގަނައިޒޭޝަންގެ އިތުރުން، އިތުރު 200 ގައުމަކުން ބަލައިގަންނަ ސްޓޭމްޕެއްކަމަށް ބުނެފައެވެ. އަދި މި ސްޓޭމްޕްގެ ސަބަބުން ރާއްޖޭގެ ފަތުރުވެރިކަމާއި މެދު ބައިނަލްއަގްވާމީ މަޝްރަހުގައި އޮތް އިތުބާރު އިޔާދަވެގެން ދާނެ ކަމަށް މިނިސްޓްރީ އިން ގަބޫލު ކުރެއެވެ.
ކޮވިޑް-19 ގެ ސަބަބުން ތައާރަފް ކުރެވުނު މި ސްޓޭމްޕަކީ ފަތުރުވެރިކަމުގެ ސިނާއަތަށް ދެވޭ ފުރަތަމަ ސްޓޭމްޕެވެ. އަދި މި ސްޓޭމްޕް ތައާރަފް ކުރެވުމާއެކު ދުނިޔޭގެ ގިނަ ގައުމުތަކަކުން ވަނީ ސްޓޭމްޕް ހޯދުމަށް ބޭނުންވެ ސްޓޭމްޕް ހޯދާފައެވެ.
