މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން ނެރުނު ރިޕޯޓާ ގުޅިގެން ފިޔަވަޅު އެޅުމަށް ގޮވާލައި ބޭއްވި ޙަރަކާތެއްގައި ބައިވެރިވެފައިވާތީ ރ ހުޅުދުއްފާރުގެ އިސް މެޖިސްޓްރޭޓް ޢަލީ މުޞްޠަފާ އާމެދު ފިޔަވަޅު އެޅުމަށް ޖުޑީޝަލް ސަރވިސް ކޮމިޝަން (ޖޭއެސްސީން) ނިންމައިފިއެވެ.

އެމްޑީއެންއަށް ފިޔަވަޅު އެޅުމަށް ގޮވާލައި 15 އޮކްޓޫބަރ 2019 ގައި ރ. ހުޅުދުއްފާރުގައި ވަނީ ހަރަކާތެއް ބާއްވާފައެވެ. އެ ޙަރަކާތުގައި އިސް މެޖިސްޓްރޭޓް ޢަލީ މުޞްޠަފާ ބައިވެރިވެ ވަޑައިގެންނެވިކަން ސާބިތުވެފައިވާ ކަމަށް ޖޭއެސްސީން އަންގާރަ ދުވަހު ނެރުނު ބަޔާނެއްގައި ބުނެފައިވެއެވެ.

މި ޙަރަކާތުގައި ބައިވެރިވެ ވަޑައިގަންނަވާފައިވާތީ އިސްމެޖިސްޓްރޭޓް ޢަލީ މުޞްޠަފާ ދިވެހިރާއްޖޭގެ ފަނޑިޔާރުންގެ ޤާނޫނުނާއި، ފަނޑިޔާރުންގެ ސުލޫކީ މިންގަނޑާ ޚިލާފު ވެފައިވާ ކަމަށް ކޮމިޝަނުން ވަނީ ކަނޑައަޅާފައެވެ.

އަދި، މައްސަލައިގެ ތަޙްޤީޤުގައި ފާހަގަކުރެވުނު ކަންތައްތަކަށް ރިޢާޔަތްކޮށް، އިސްމެޖިސްޓްރޭޓް ޢަލީ މުސްޠަފާއާ މެދު އަޅާ ފިޔަވަޅެއްގެ ގޮތުގައި ނަޞޭހަތް ދިނުމާއެކު، ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމަށް، ޖޭއެސްސީން ވަނީ ނިންމާފައެވެ.

ފަނޑިޔާރުން އެފަދަ އެއްވުންތަކުގައި ބައިވެރިވުމަކީ ދިވެހިރާއްޖޭގެ ފަނޑިޔާރުންގެ ޤާނޫނުގެ 32 ވަނަ މާއްދާގެ (ހ)ގެ 5 ވަނަ ނަންބަރާއި، ފަނޑިޔާރުންގެ ސުލޫކީ މިންގަނޑުގެ 7.1 އާއި 1.8 އާއި އަދި 2.2 ވަނަ ނަންބަރާ ޚިލާފު އަމަލެކެވެ.