އަލާމާތްތައް ފެނިގެން ހޯނޑެއްދޫއިން އިތުރު ހަތް މީހެއްގެ ސާމްޕަލް ނަގައިފި
ހޯނޑެއްދޫ އިން 38 މީހަކު ވަނީ ކޮވިޑް-19 އަށް ޕޮޒިޓިވްވެފައި
ގދ. ހޯނޑެއްދޫ މަތިން ނަގާފައިވާ މަންޒަރެއް
ކޮވިޑް-19 ގެ އަލާމާތްތައް ފެނިގެން ގދ. ހޯނޑެއްދޫއިން އިތުރު ހަތް މީހެއްގެ ސާމްޕަލް ނަގާފައިވާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީޤް ވިދާޅުވެއްޖެއެވެ.
ހޯމަ ދުވަހުގެރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި ހޯނޑެއްދޫގެ ހާލަތު ހިއްސާކުރައްވަމުން ޑރ. ނަޒްލާ ވިދާޅުވީ ހޯނޑެއްދޫއިން ޕޮޒިޓިވްވި މީހުންގެ އަދަދާއި ކޮންޓެކްޓުންގެ އަދަދު އިތުރުނުވާ ކަމަށެވެ. އަދި މި ވަގުތު އެ ރަށުގެ 64 ގެއެއްގައި މީހުން ކަރަންޓީނުގައި އެބަތިބި ކަމަށާއި، އެ ރަށުގައި ހަރަކާތްތެރިވަމުން އަންނަ އެޗްޕީއޭ ޓީމުން ގޭގެއަށް ޒިޔާރަތްކޮށް ހާލު ބަލާފައިވާ ކަމަށް ވިދާޅުވިއެވެ.
ހޯނޑެއްދޫއިން މިހާތަނަށް 38 މީހަކު ޕޮޒިޓިވްވެފައިވާއިރު މީގެ ތެރެއިން އަށް މީހުންނަކީ ހައި ރިސްކު މީހުން ކަމަށް އެޗްޕީއޭއިން ވަނީ މައުލޫމާތު ދީފައެވެ. މިއީ މާލެ ފިޔަވައި ރާއްޖޭގެ ރަށަކުން މިހާތަނަށް އެންމެ ގިނަ އަދަދެއްގެ މީހުން ޕޮޒިޓިވްވީ ރަށެވެ. އެ ރަށުން އެންމެ ފުރަތަމަ މި ބަލި ފެނިފައިވަނީ ސެޕްޓެމްބަރު 3 ގައެވެ.
