ސިވިލް މުވައްޒަފުން ވަޒީފާ އިން ވަކިނުކޮށް އެއް ވުޒާރާއިން އަނެއް ވުޒާރާއަށް ބަދަލު ކުރެވޭނެ ނިޒާމެއް ގާއިމް ކުރުމާމެދު މަޝްވަރާ ކޮށްފި
14 ސެޕްޓެމްބަރު 2020 | ހޯމަ 14:14ސިވިލް މުވައްޒަފުންގެ އޮނިގަނޑު މިހާރު އެކުލަވާލެވިފައިވާ ގޮތުން ދިމާވާ ދަތިތަކާ ބެހޭ ގޮތުން މަޝްވަރާކުރެއްވި
ހޯމަ ދުވަހު އެޑިއުކޭޝަން މިނިސްޓްރީގައި ބޭއްވި ބައްދަލުކުރެއްވުމުގެ ތެރެއިން
ސިވިލް ސަރވިސް މުވައްޒަފުން ވަޒީފާއިން ވަކިނުކޮށް އެއް ވުޒާރާއިން އަނެއް ވުޒާރާއަށް ވަޒީފާ ބަދަލު ކުރެވޭނެ ނިޒާމެއް ގާއިމް ކުރުމާމެދު މަޝްވަރާ ކޮށްފިއެވެ.
މި މަޝްވަރާތައް ކޮށްފައިވަނީ މިނިސްޓަރ އޮފް ހަޔަރ އެޑިޔުކޭޝަން ސިވިލް ސަރވިސް ކޮމިޝަންގެ މެމްބަރުންނާއި އެކު ބޭއްވި ބައްދަލު ކުރެއްވުމުގައެވެ. މި ބައްދަލުވުން ބާއްވާފައިވަނީ މިނިސްޓްރީ އޮފް ހަޔަރ އެޑިޔުކޭޝަންގެ މީޓިންގް ރޫމްގައި ހޯމަ ދުވަހުގެ ހެނދުނު 11:00 ގައެވެ.
މި ބައްދަލުވުމުގައި މިނސްޓަރު ޑރ އިބްރާހިމް ހަސަން ވަނީ ސިވިލް ސަރވިސް މުވައްޒަފުންގެ އޮނިގަނޑު މިހާރު އެކުލަވާލެވިފައިވާ ގޮތުން ދިމާވާ ދަތިތަކާއި ބެހޭގޮޮތުން ވާހަކަ ދައްކަވާފައެވެ.
މީގެ ތެރޭގައި ސިވިލް ސަރވިސް މުވައްޒަފުން ވަޒީ ފާއިން ވަކިނުކޮށް އެއް ވުޒާރާ އިން އަނެއް ވުޒާރާއަށް ވަޒީފާ ބަދަލު ކުރެވޭނެ ނިޒާމެއް ހޯދައި ދިނުމާއި، މޯލްޑިވްސް ޕޮލިޓެކްނިކް އަދި ޓިވެޓް އޮތޯރިޓީ އަށް ބޭނުންވާ ޓެކްނިކަލް އަދި ޕްރޮފެޝަނަލް މުވައްޒަފުން ހޯދުމުގައި އޮނިގަނޑު އެކުލަވާލެވިފައިވާ ގޮތުން ހުރި ދަތިތައް ސިވިލް ސަރވިސް ކޮމިޝަންގެ މެމްބަރުންނާއި ހިއްސާ ކުރެއްވިއެވެ. ހައްލު ހޯދޭނެ ގޮތްތަކާ ބެހޭ ގޮތުން މަޝްވަރާ ކުރެއްވިއެވެ.
މޯލްޑިވްސް ޕޮލިޓެކްނިކަކީ ޓެކްނިކަލް ގިނަ މާއްދާތަކެއް ކިޔަވައިދެމުން ގެންދާ ތަނަކަށް ވާއިރު ޓެކްނިކަލް މާއްދާތައް ކިޔަވައި ދިނުމަށް ޓީޗަރުން ހޯދުމުގައި ދިމާވާ އެންމެ ބޮޑު އެއް ދަތިކަމަކީ ޓީޗިންގް ސަނަދެއް އޮތުން ލެކްޗަރަރސް އަށް ލާޒިމުވެފައި އޮތުމެވެ. މިހެން ވުމުގެ ސަބަބުން ބޭނުންވާ އަދަދަށް ލެކްޗަރާއިން ލިބުމުގައި ދަތިތައް ކުރިމަތިވާ ކަމަށް މިނިސްޓަރު ވިދާޅުވިއެވެ.
ސިވިލް ސަރވިސް ކޮމިޝަންގެ ރައީސްގެ ވާހަކަފުޅުގައި ސަރުކާރުގެ މަސައްކަތްތައް ތަންފީޒު ކުރުމަށް ސިވިލް ސަރވިސް ކޮމިޝަން މެމްބަރުންގެ ފުރިހަމަ އެއްބާރުލެއްވުން ދެއްވާނެ ކަމަށާއި އަދި ސިވިލް ސަރވިސް އޮނިގަނޑަށް ގެންނަން ޖެހޭ ބަދަލުތައް ގާނޫނު ތަންދިން އެންމެ ފުޅާމިނެއްގައި ގެންނަވާނެ ކަމަށް ވިދާޅުވިއެވެ.
މި ބައްދަލުވުމުގައި މިނިސްޓްރީ އޮފް ހަޔަރ އެޑިޔުކޭޝަންގެ ފަރާތުން ބައިވެރިވެ ވަޑައިގެންނެވީ ސްޓޭޓް މިނިސްޓަރ އަދި ކުރީގެ ސިވިލް ސަރވިސް ކޮމިޝަންގެ މެމްބަރު ޚަދީޖާ އާދަމް އަދި ޑެޕިއުޓީ މިނިސްޓަރ އިސްމާއިލް ޒަބީހް އެވެ.
