ބަލި ފެތުރެމުންދާ މިންވަރު ދަށެއް ނުވޭ، އާރުވެލިއު މިހާރު ވެސް ހުރީ އެކަކަށް ވުރެ މަތީގައި!
13 ސެޕްޓެމްބަރު 2020 | އާދީއްތަ 08:58ބަލި ފެތުރޭ ރޭޓް އަދިވެސް މަތި
އެޗްއީއޯސީގެ ތަރުޖަމާނު ޑރ. ނަޒްލާ ރަފީީގު، ރައްކާތެރިކަމުގެ ފިޔަވަޅަށް ފަރުވާ ކުޑަ ނުކުރުމަށް ވަނީ އިލްތިމާސްކޮށްފައި
ރާއްޖޭގައި ކޮވިޑް-19 ފެތުރެމުންދާ މިންވަރު ދަށް ނުވާ ކަމަށާއި، އާރުވެލިއު މިހާރު ވެސް ހުރީ އެކަކަށް ވުރެ މަތީގައި ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
''އާރުވެލިއު'' އަކީ ދެވޭރިއަބަލް ދެމެދުގައި ސްޓެޓިސްޓިކަލް އެސޯސިއޭޝަން ކޯއެފިިޝިއެންޓް ކޯރިލޭޝަންގެ ގޮތުގައި ކަލްކިއުލޭޓް ކުރުމުން އަންނަ އަަދަދެވެ.
ހޮނިހިރު ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ. ނަޒްލާ ރަފީީގު ވިދާޅުވީ ކޮވިޑް-19 ފެތުރޭ މިންވަރު އަދިވެސް މަތި ކަމަށެވެ.
ޑރ.ނަޒްލާ ވިދާޅުވީ ހަފްތާއެއްގެ ތެރޭގައި ބަލި ފެތުރޭ މިންވަރަށް ބަލާއިރު އާރުވެލިއު އުޅެނީ 1.3 އެހާކަންވަރުގައި ކަމަށެވެ. މިއަދަދަށު އެކަކަށްވުރެ ދައްކުރަން ޖެހޭކަން ފާހަގަކުރައްވައި ޑރ.ނަޒްލާ ވިދާޅުވީ މިއަދަދު ކޮންމެ ދުވަހަކަށް ބަލާ ކަމަށްވާނަމަ ކޮންމެވެސް ވަރަކަށް ދަށްވާ ކަމަށެވެ.
ކޮވިޑް-19ގެ ކޭސްތައް އިތުރުވަމުންދާ މިދަނޑިވަޅުގައި ކުދިކުދި ގިނަ ކްލަސްޓަރ ވަރަށް ގިނައިން ފެންނަމުންދާ ކަމަށާއި، ނަން-ލިންކް ކޭސްތައް އިތުރުކަން އެޗްއީއޯސީން ފާހަގަކުރެއެވެ. ކޮންޓެކްޓުން މަދު ކުރެވުނު ކަމުގައި ވިޔަސް ކްލަސްޓަރ އިތުރުވުމަކީ ކަންބޮޑުވުމެއް ކަމަށް ވެސް އެސެންޓަރުން ބުނެއެވެ.
ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ފަރުވާ ކުޑަނުކުރުމަށް އެޗްއީއޯސީން ވަނީ އިލްތިމާސްކޮށްފައެވެ.
