މިހާތަނަށް ބެލި ބެލުމުން ހޯނޑެއްދޫގައި ކޮމިއުނިޓީ ސްޕްރެޑެއް އޮތް ކަމަށް ނުބެލެވޭ: ޑރ ނަޒްލާ
13 ސެޕްޓެމްބަރު 2020 | އާދީއްތަ 00:13މިހާތަނަށް އެ ރަށުގައި ކޮމިއުނިޓީ ސްޕްރެޑެއް އޮތް ކަމަށް ނުބެލެވޭ
އެޗްއީއޯސީގެ ތަރުޖަމާނު ޑޮކްޓަރ ނަޒްލާ ރަފީޤު- ޑރ ނަޒްލާ ވިދާޅުވީ، މިހާތަނަށްވެސް އެރަށުން ޕޮޒިޓިވްވެފައި ތިބީ އެންމެ ފުރަތަމަ ޕޮޒިޓިވްވި މީހުންނާ ގުޅުންހުރި މީހުން ކަމަށް
ގދ ހޯޑެއްދޫގައި ކޮވިޑް-19 ގެ ކޭސްތަކެއް ފެނިފައިވާއިރު، މިހާތަނަށް ބެލި ބެލުމުން އެ ރަށުގައި ކޮމިއުނިޓީ ސްޕްރެޑެއް އޮތް ކަމަށް ނުބެލެވޭ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
ހޮނިހިރު ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެ ސެންޓަރުގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ، ގދ. ހޯޑެއްދޫގެ ޙާލަތަށް ބަލާއިރު، މިހާތަނަށް އެ ރަށުގައި ކޮމިއުނިޓީ ސްޕްރެޑެއް އޮތް ކަމަށް ނުބެލެވޭ ކަމަށެވެ.
އޭގެ އިތުރުން، ރެންޑަމް ސާމްޕްލިންގެ ތެރެއިންނާއި، ކޮންޓެކްޓް ޓްރޭސިންގ ގެ ތެރެއިން އެ ރަށުން ގިނަ ސާމްޕަލްތަކެއް ނެގިފައިވާކަން ފާހަގަ ކުރައްވައި ޑޮކްޓަރ ނަޒްލާ ވިދާޅުވީ، މިހާތަނަށް ވެސް އެ ރަށުން ޕޮޒިޓިވްވެފައި ތިބީ އެންމެ ފުރަތަމަ ޕޮޒިޓިވްވި މީހުންނާ ގުޅުން ހުރި މީހުން ކަމަށެވެ. އަދި ކޮމިއުނިޓީ ސްޕްރެޑެއް ކަމަށް ބަލާނީ ޕޮޒިޓިވްވި މީހުންނާ ގުޅުމެއް ނެތި އެތަނުގައި ބަލި ފެތުރެމުންދާނަމަ ކަމަށް ވެސް ޑރ ފާހަގަ ކުރެއްވިއެވެ.
ހޯނޑެއްދޫ އިން އެންމެ ފުރަތަމަ ކޮވިޑް ކޭހެއް ފެނިފައިވަނީ ސެޕްޓެމްބަރ 3 ވަނަ ދުވަހުއެވެ. އެއީ ހޯމް ކަރަންޓީނުގައި ހުއްޓާ ޕޮޒިޓިވްވި ހަތަރު މީހެކެވެ. އެއާއެކު އެޗްޕީއޭއިން ކޮންޓެކްޓް ޓްރޭސިންގ ގެ މަސައްކަތްތައް ކުރިއަށް ގެންގޮސްފައިވާއިރު މިހާތަނަށް އެ ރަށުން ޕޮޒިޓިވްވެފައިވަނީ 37 މީހެކެވެ.
