ރާއްޖޭގައި ޕޮޒިޓިވްވި މީހުންގެ އަދަދު 9000ށް

ކޮވިޑް-19 ފެތުރެން ފެށި ފަހުން ރާއްޖޭގައި މި ބައްޔަށް ޕޮޒިޓިވްވި މީހުންގެ އަދަދު 9000ށް ވުރެ އިތުރު ވެފައިވާ ކަމަށް ހެލްތް ޕްރޮޓެކްޝަން އެޖެންސީން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ މައުލޫމާތު ދައްކާ ގޮތުން އަދީއްތަ ދުވަހުގެ އިރުއޮއްސި 6:00ން ހޮނިހިރު ދުވަހުގެ އިރުއޮއްސި 6:00 އާ ހަމައަށް ޕޮޒިޓިވްވީ 62 މީހުންނެވެ. މީގެ ތެރެއިން މާލެ ސަރަހައްދުން ޕޮޒިޓިވްވި މީހުންގެ އަދަދަކީ 51 އެވެ. އަތޮޅު ތެރެއިން 11 މީހަކު ވަނީ މި މުއްދަތުގައި ޕޮޒިޓިވްވެފައެވެ. ހޮނިހިރު ދުވަހު ޕޮޒިޓިވްވި ދިވެހިންގެ އަދަދަކީ 44އެވެ. އަދި ބިދޭސީންގެ އަދަަދަކީ 18 އެވެ.

އެޗްޕީއޭ އިން ބުނީ ހޮނިހިރު ދުވަހު ޕޮޒިޓިވްވި 62 މީހުންނާއެކު ރާއްޖޭގައި ޕޮޒިޓިވްވި ޖުމަލް އަދަދު 9052ށް އަރާފައިވާ ކަމަށެވެ. އަދި ބަލިން ރަނގަޅުވި މީހުންގެ އަދަދު ވެސް ވަނީ އިތުރުވެ 7055ށް އަރާފައެވެ. ހޮނިހިރު ދުވަހު މި ބަލިން 209 މީހަކު ވަނީ ރަނގަޅުވެފައެވެ. އެޗްޕީއޭގެ އެންމެ ފަހުގެ ތަފާސް ހިސާބުތައް ދައްކާ ގޮތުން މިވަގުތު އެކްޓިވް ކޭސްގެ އަދަދަކީ 1960އެވެ. އަދި ހޮސްޕިޓަލުގައި އެޑްމިޓް ކޮށްގެން ފަރުވާ ދެމުން އަންނަ މީހުންގެ އަދަދު ވެސް ދަށްވެފައެވެ. އެގޮތުން ހޮނިހިރު ދުވަހާ ހަމައަށް އެޑްމިޓް ކޮށްގެން ފަރުވާ ދެމުން އަންނަނީ 116 މީހުންނަށެވެ.

އެޑްމިޓްކޮށްގެން ފަރުވާ ދެމުން އަންނަ މީހުންގެ ތެރެއިން ޑީއެޗް 11 ގައި ވެންޓިލޭޓަރުގައި 2 މީހަކަށް ފަރުވާ ދެމުން އަންނަ އިރު 66 މީހަކަށް ފަރުވާ ދެމުން އަންނަނީ އައިސީޔޫގައެވެ. އަތޮޅު ކޮވިޑް ފެސިލިޓީތަކުގެ ތެރެއިން 2 ފެސިލިޓީއެއްގައި 5 މީހަކަށް ފަރުވާ ދެމުން އަންނަ އިރު ބާކީ ތިބި މީހުންނަށް ފަރުވާ ދެމުން އަންނަނީ ހުޅުމާލޭ މެޑިކަލް ފެސިލިޓީގައެވެ.

31 މީހަކު ވަނީ މި ބަލީގައި ނިޔާވެފައެވެ. އައޮސޮލޭޝަން ފެސިލިޓީގައި ތިބި މީހުންގެ އަދަދު 908ށް ދަށްވެފައިވާ އިރު، ރާއްޖޭގައި ޓެސްޓް ކުރެވުނު މިންވަރު ވަނީ 129،055ށް އަރާފައެވެ.

މިހާތަނަށް ރާއްޖޭގެ 30 ރަށަކުން 113 ކޭސް ފެނިފައިވާ އިރު، މިވަގުތު އެކްޓިވް ކޭސް ފެނިފައިވަނީ 28 ރަށަކުންނެވެ. އެގޮތުން 28 ރަށުގައި 109 އެކްޓިވް ކޭސް އުޅޭ އިރު، މީގެ ތެރޭގައި ހިމެނެނީ 90 ދިވެހިންނާއި 18 ބިދޭސީންނެވެ. މޮނިޓަރިންގެ ހާލަތުގައި މިވަގުތު އޮތީ ގދ. މަޑަވެލި އަދި ހޯނޑެއްދޫއެވެ.