އިދިކޮޅު މުޒާހަރާ ތެރެއިން 41 މީހަކު ފުލުހުންގެ ބެލުމުގެ ދަށަށް
41 މީހަކު ފުލުހުންގެ ބެލުމުގެ ދަށަށް ގެންގޮސްފައިވަނީ އެޗްޕީއޭގެ ގައިޑްލައިންތަކާއި ހިލާފުވުމުގެ ސަބަބުން
އިދިކޮޅުން ޒުވާނުން ނެރެ ބޭއްވި މުޒާހަރާގެ ތެރެއިން ޒުވާނުންތަކެއް ފުލުހުންގެ ބެލުމުގެ ދަށަށް ގެންދަނީ
ހޮނިހިރު ދުވަހު ޕީޕީއެމް/ޕީއެންސީން ބޭއްވި މުޒާހަރާގެ ތެރެއިން 41 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
އިދިކޮޅުން ރާވައިގެން ޒުވާނުން ބައިވެރިވި އެއްވުމުގައި 41 މީހަކު ފުލުހުންގެ ބެލުމުގެ ދަށަށް ގެންގޮސްފައިވަނީ އެޗްޕީއޭގެ ގައިޑްލައިންތަކާއި ހިލާފުވުމުގެ ސަބަބުންނެވެ. މިކަމާއި ގުޅިގެން ފުލުހުން ބުނެފައިވަނީ އާންމު ސިއްހަތުގެ ކުއްލި ނުރައްކަލުގެ ހާލާތުގައި ރައްޔިތުން ނުރައްކަލެއްގެ ތެރެއަށް ހުށަހެޅޭ ގޮތަށް އެޗްޕީއޭގެ ގައިޑްލައިންތަކާއި ހިލާފަށް އެއްވުމާއި ގުޅިގެން 41 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި ރައްޔިތުންގެ ސަލާމަތާއި ރައްކާތެރިކަން އިސްކުރުމަށް ފުލުހުން ވަނީ އިލްތިމާސްކޮށްފައެވެ.
އެޗްޕީއޭގެ އެންގުންތަކާއި ހިލާފަށް އެއްވުންތައް ބާއްވާ ފަރާތްތަކާއި އެއްވުންތަކުގައި ބައިވެރިވާ ފަރާތްތަކާމެދު ގާނޫނީ ފިޔަވަޅު އަޅާނެކަމަށް ހޮނިހިރު ދުވަހު ފުލުހުން ވަނީ ބުނެފައެވެ. މިކަން ހާމަކޮށް ފުލުހުން ނެރުނު ބަޔާނެއްގައި ބުނީ، އާންމު ސިއްހަތުގެ ކުއްލި ނުރައްކަލުގެ މި ހާލަތުގައި، އެޗްޕީއޭގެ އެންގުންތަކާ ހިލާފު ނުވުމަށާއި، ރައްކާތެރިކަން އިސްކޮށް، ހުރިހާ ބޭފުޅުންވެސް އެޗްޕީއޭއިން ނެރެފައިވާ އިރުޝާދުތަކާ އެއްގޮތަށް އަމަލުތައް ބެހެއްޓުމަށް އިލްތިމާސްކުރާ ކަމަށެވެ. އަދި އެންގުންތަކާއި ހިލާފަށް އެއްވުންތައް ބާއްވާ ފަރާތްތަކާއި އެއްވުންތަކުގައި ބައިވެރިވާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށް ފުލުހުން ވަނީ ބުނެފައެވެ.
ފުލުހުން އަންގާ އިންޒާރު ދީފައިވަނިކޮށް ސަރުކާރަށް ޕްރެޝަރ ކުރުމަށްޓަކައި އިދިކޮޅު ޕްރޮގްރެސިވް ކޯލިޝަނުން ހޮނިހިރު ދުވަހުގެ ހަވީރު މާލެތެރެ ހަލަބޮލި ކުރުމަށް ސައިކަލު ބުރެއް ވަނީ ބާއްވާފައެވެ. އިދިކޮޅުން ބާއްވާ ސައިކަލު ބުރެއް ނޫން ކަމަށް ބުނެފައިވީ ނަމަވެސް، މިއީ ސީދާ އިދިކޮޅުން މާލެތެރެ ހަލަބޮލި ކުރުމަށް ބޭއްވި ސައިކަލު ބުރެއް ކަމުގެ މައުލޫމާތު "ރާއްޖެއެމްވީ"އަށް ލިބިފައެވެ. ކޮވިޑް-19 ގެ ބަލިމަޑުކަން ރާއްޖޭގައި ފެތުރި، އެކަމުގެ އަސަރު ރައްޔިތުންނަށް އިންތިހާއަށް ކުރަމުންދާއިރު، މިއީ ޕެންޑެމިކް ތެރޭގައި އިދިކޮޅުން މިގޮތަށް ބާއްވާފައިވާ 3 ވަނަ އެއްވުމެވެ.
