ރޯމާއަށް ކުޅެމުން އަންނަ އިޓަލީގެ ޑިފެންޑަރު އަލެސަންދްރޯ ފްލޮރެންޒީ ލޯނު އެއްބަސްވުމެއްގެ ދަށުން ޕީއެސްޖީއާ ގުޅިއްޖެއެވެ.

އުމުރުން 29 އަހަރުގެ ފްލޮރެންޒީ ޕީއެސްޖީއާ ގުޅުނީ ލޯނު އުސޫލުން މި ސީޒަނުގެ ނިޔަލަށެވެ. އަދި މި އެއްބަސްވުމުގެ ދަށުން ޕީއެސްޖީން ބޭނުންވެއްޖެ ނަމަ، ލޯނު އެއްބަސްވުން ހަމަވުމާއެކު ފްލޮރެންޒީގެ އެއްބަސްވުން ދާއިމީ ކުރެވޭނެއެވެ.

ޕީއެސްޖީއަށް ބަދަލުވުމަށްފަހު އެޓީމުގެ އޮފިޝަލް ވެބްސައިޓަށް ދިން އިންޓަވިއުއެއްގައި ފްލޮރެންޒީ ބުނީ ޕީއެސްޖީގެ ކުޅުންތެރިއަކަށް ވެވުމުން ފަޚުރުވެރިވާ ކަމަށާއި، ޕީއެސްޖީއަކީ ޔޫރަޕްގައި މިވަގުތު އޮތް އެންމެ ބޮޑު އެއް ކުލަބު ކަމަށެވެ. އަދި ޕީއެސްޖީގައި އޭނާގެ އެންމެ ފުރިހަމަ ކުޅުން ދެއްކުމަށް މަސައްކަތް ކުރާނެ ކަމަށާއި، ބޭނުމަކީ ޕީއެސްޖީއާއެކު ގިނަ ކާމިޔާބީތަކެއް މި ސީޒަނުގައި ހޯދުން ކަމަށްވެސް ބުންޏެވެ.

ލޯނު އެއްބަސްވުމެއްގެ ދަށުން ފްލޮރެންޒީ ޕީއެސްޖީއާ ގުޅުނުއިރު، އޭނާ ވަނީ މިދިޔަ ސީޒަނުގެ ފަހު ހާފުގައި ލޯނު އުސޫލުން ވެލެންސިއާއަށްވެސް ކުޅެފައެވެ. އެގޮތުން ޖެނުއަރީ މަހު ވެލެންސިއާއާ ގުޅުނު ފްލޮރެންޒީ ވަނީ އެޓީމަށް 14 މެޗު ކުޅެދީފައެވެ.

ރޯމާގެ ޔޫތު ޓީމަށްވެސް ކުޅުނު ފްލޮރެންޒީ އޭނާގެ ސީނިއާ ކެރިއަރު ރޯމާއިން ފެށީ 2011 ވަނަ އަހަރުގެ މެއި މަހުގެ ތެރޭގައެވެ. މިހާތަނަށް ރޯމާގައި ހޭދަކުރި ނުވަ ސީޒަނުގައި ފްލޮރެންޒީ ވަނީ އެޓީމަށް ކުޅެދިން 280 މެޗުގައި 28 ލަނޑު ކާމިޔާބުކޮށްފައެވެ. އަދި އިޓަލީގެ ގައުމީ ފުޓްބޯޅަ ޓީމުންވެސް ޖާގަ ހޯދާފައިވާ ފްލޮރެންޒީ ވަނީ ގައުމީ ޓީމުގެ ޖާޒީގައި މިހާތަނަށް 36 މެޗު ކުޅެދީފައެވެ.

ލޯނު އުސޫލުން ފްލޮރެންޒީ ފްރެންޗް ލީގުގެ ޗެމްޕިއަނުންނާ ގުޅުނުއިރު، މި ސީޒަނުގެ ފްރެންޗް ލީގު ވަނީ މިދިޔަ މަހު ފަށާފައެވެ. އަދި ލީގުގައި ކުޅުނު ފުރަތަމަ މެޗުގައި މިދިޔަ ބުރާސްފަތި ދުވަހު ޕީއެސްޖީ ވަނީ އަލަށް ޕްރޮމޯޓްވި ލެންސް އަތުން 1-0 ން ބަލިވެފައެވެ.