ރަޝިއާ އާއި ރާއްޖެއާ ދެމެދު ޝެޑިއުލް ދަތުރުތައް ފަށައިފި
ހުކުރު ދުވަހު ހެނދުނު ފުރަތަމަ ފްލައިޓް ވަނީ އައިސްފައި
އޭރޯފްލޮޓުގެ ފްލައިޓެއް، ކޮންމެ ހަފްތާއަކު ދަތުރުތައް އޮންނާނެ
ކޮވިޑް-19އާ ގުޅިގެން ދަތުރުތައް މެދުކަނޑާލުމަށްފަހު، އަލުން ރަޝިއާ އާއި ރާއްޖެ އާއި ދެމެދު ޝެޑިއުލް ދަތުރުތައް ފަށައިފިއެވެ.
އެގޮތުން ހުކުރު ދުވަހު ހެނދުނު އޭރޯފްލޮޓުގެ ފުރަތަމަ ފްލައިޓް ވެލާނާ އިންޓަނޭޝަނަލް އެއަރޕޯޓަށް ވަނީ ޖައްސާފައެވެ.
ރަޝިއާގެ ފްލެގް ކެރިއާ އޭރޯފްލޯޓުން ރަޝިއާ-މާލެ ހަފްތާއަކު ދެ ފްލައިޓު ބާއްވަން ވަނީ ނިންމާފައެވެ. އެގޮތުން ރަޝިޔާއިން ރާއްޖެއަށް ފްލައިޓް ބާއްވަން ހަމަޖެހިފައިވަނީ ބުރާސްފަތި އަދި އާދިއްތަ ދުވަހުއެވެ. މާލެއިން ރަޝިޔާއަށް ދަތުރުތައް ކުރާނީ ހުކުރު އަދި އާދިއްތަ ދުވަހުއެވެ.
ރާއްޖޭގެ ފަތުރުވެރިކަމުގެ ދާއިރާއަށް ރަޝިޔާ އަކީ މުހިންމު މާކެޓަކަށްވާއިރު، ކޮވިޑް-19ގެ ކުރިން ރަޝިއާ އަދި ވެލާނާ އިންޓަނޭޝަނަލް އެއަރޕޯޓާ ދެމެދު ދުވާލަކު އެއް ދަތުރު ބާއްވައެވެ.
ޓޫރިޒަމް މިނިސްޓްރީން ބުނީ ކޮވިޑް-19 އާ ގުޅިގެން ރާއްޖޭގެ ބޯޑަރުތައް މާރޗް މަހުގެ 27 ވަނަ ދުވަހު ބަންދު ކުރުމަށްފަހު އަލުން ހުޅުވާލީ ޖުލައި މަހުގެ 15 ވަނަ ދުވަހު ހުޅުވާލި ފަހުން މިހިނގާ ސެޕްޓެމްބަރު މަހުގެ 8 ވަނަ ދުވަހާ ހަމައަށް ރާއްޖެ އައިސްފައިވަނީ 11629 ފަތުރުވެރިން ކަމަށެވެ.
