ކޮވިޑްގެ ކޭސްތައް މަދުވަން ފެށިތާ ހަފްތާއެއް، އިދިކޮޅުން މާދަމާ މާލެތެރެ ހަލަބޮލި ކުރުމަށް ގްރޫޕްތައް ނެރެނީ
11 ސެޕްޓެމްބަރު 2020 | ހުކުރު 13:01ފާއިތުވި ހަފްތާގައި ކޭސްތަކުގެ އަދަދު ވަނީ މަޑުމަޑުން ދަށަށް ދާން ފަށާފަ
ޕްރޮގްރެސިވް ކޯލިޝަނުން އެޗްޕީއޭގެ މިންގަނޑުތަކާ ޚިލާފަށް މާލޭގައި ބޭއްވި ސައިކަލު ބުރުގެ ތެރެއިން
ސަރުކާރަށް ޕްރެޝަރ ކުރުމަށްޓަކައި އިދިކޮޅު ޕްރޮގްރެސިވް ކޯލިޝަނުން ހޮނިހިރު ދުވަހުގެ ހަވީރު މާލެތެރެ ހަލަބޮލި ކުރުމަށް ސައިކަލު ބުރެއް ބޭއްވުމަށް ރާވަމުންދާ ކަމުގެ މައުލޫމާތު "ރާއްޖެއެމްވީ"އަށް ލިބިއްޖެއެވެ.
ރާއްޖެއެމްވީއަށް އެނގިފައިވާ ގޮތުގައި މާލެ ތެރެ ހަލަބޮލި ކުރުމަށް ސައިކަލު ބުރެއް ބޭއްވުމަށް ތައްޔާރު ވަމުންދާއިރު، އެކަން ރޭވުމުގެ އަޑީގައި ހުންނެވީ އިދިކޮޅު ޕީޕީއެމް/ޕީއެންސީ ކޯލިޝަންގެ ހަރަކާތްތަކުގައި އިސްކޮށް އުޅުއްވާ ކުރީގެ މަޖިލިސް މެމްބަރެކެވެ. އަދި ސައިކަލު ބުރުގައި ބައިވެރިވުމަށް މާލޭގެ އެކި ސަރަޙައްދުތަކުގެ ގްރޫޕުތަކަށް ގިނަ އަދަދެއްގެ ފައިސާ ބަހަމުންދާކަމުގެ މައުލޫމާތު ވެސް ރާއްޖެއެމްވީއަށް ވަނީ ލިބިފައެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އިދިކޮޅުން އަޑީގައި ތިބެގެން ރާވަމުންދާ މި އެއްވުމުގައި ސްލޯގަންއެއްގެ ގޮތުން "އިންޑިއާ އައުޓް" ބޭނުން ކުރުމަށް ބައިވެރިންނަށް އިރުޝާދު ދެމުން ގެންދަނީ ވެސް ޕްރޮގްރެސިވް ކޯލިޝަންގެ ލީޑަރޝިޕްގެ އިސް ފަރާތްތަކުންނެވެ. އެގޮތުން ޕީޕީއެމް/ޕީއެންސީގެ އިސްފަރާތްތަކުން އެފަދަ އިރުޝާދުތަކެއް ލިބުނުކަން ނަން ނުޖެހުމަށް ޝަރުތުކޮށް އެކަމުގެ މައުލޫމާތު އެނގޭ މީހަކު ރާއްޖެއެމްވީއަށް ކިޔާދީފައި ވެއެވެ.
އަދި މިއީ ޕީޕީއެމް/ޕީއެންސީ އިން ރާވަމުންދާ ކަމެއް ނޫންކަން ދެއްކުމަށް މަސައްކަތް ކުރަނީ އިންޑިއާ އާއެކު އެ ޕާޓީތަކުން އޮންނަ ގުޅުން ރަނގަޅުކަން ދެއްކުމަށްކަން ރާއްޖެއެމްވީއަށް މައުލޫމާތު ލިބެއެވެ.
ކޮވިޑް-19 ގެ ބަލިމަޑުކަން ރާއްޖޭގައި ފެތުރި، އެކަމުގެ އަސަރު ރައްޔިތުންނަށް އިންތިހާއަށް ކުރަމުންދާއިރު، މިއީ ޕެންޑެމިކް ތެރޭގައި އިދިކޮޅުން މިގޮތަށް ބާއްވާ 3 ވަނަ އެއްވުމެވެ. އެގޮތުން މީގެ ކުރިން ވެސް އިދިކޮޅުން ވަނީ މާލޭގައި ސައިކަލު ބުރު ބާއްވާފައެވެ. އެފަހަރު ވެސް ސިއްޙީ ކުއްލި ނުރައްކަލުގެ ޙާލަތެއްގައި އަޅަންޖެހޭ ރައްކާތެރި ކަމުގެ ފިޔަވަޅުތައް ނާޅައި، އެޗްޕީއޭގެ ޤަވާއިދުތަކާ ޚިލާފަށް އެއްވުން ބާއްވާފައިވާތީ ގިނަ ބައެއްގެ ފާޑުކިއުން ވަނީ އަމާޒުވެފައެވެ.
އޭގެ އިތުރުން، ކޮވިޑް-19 ގެ ކޭސްތައް ފެންނަމުންދާ މިންވަރު މަދު ކުރުމަށް، ފަރުދީ ޒިންމާ އަދާ ކުރުމަށް ސިއްޙީ މާހިރުން ގޮވާލަމުންދާ މި ދަނޑިވަޅުގައި ޤައުމު ހަލަބޮލި ކުރުމަށް އެއްވުންތައް ބޭއްވުމާއި، އާންމު ރައްޔިތުންގެ ފުރާނަ ނުރައްކަލަކަށް ހުށައެޅުމަށް އިދިކޮޅުން ކުރަމުންދާ މަސައްކަތް ގިނަ ބަޔަކު ދަނީ ކުށްވެރި ކުރަމުންނެވެ.
ރާއްޖޭގައި ކޮވިޑް-19 ގެ ކޭސްތައް ޕީކް އަދަދަކަށް އިތުރުވުމަށްފަހު، ފާއިތުވި ހަފްތާގައި ކޭސްތަކުގެ އަދަދު ވަނީ މަޑުމަޑުން ދަށަށް ދާން ފަށާފައެވެ. އެއާއެކު، މި ދަނޑިވަޅުގައި ޚާއްސަ ސަމާލުކަމެއްދީ އަތޮޅު ތެރެއަށް ވެސް ވައިރަސް ފެތުރިގެން ނުދާނެ ގޮތަކަށް އަމަލު ކުރުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވެސް ވަނީ އިލްތިމާސް ކުރައްވާފައެވެ.
ވެރިކަމުގެ ދުވަސްވަރު ޕީޕީއެމް އަކީ އޭރުގެ އިދިކޮޅުން އެއްވުންތައް ބޭއްވުމަށް އިންތިހާއަށް ހުރަސް އެޅި ޕާޓީއެއްކަން ފާހަގަ ކުރެވެއެވެ. ރައީސް ސޯލިހް ވެރިކަމަށް ވަޑައިގެންނެވި ފަހުން ދިވެހިންނަށް އެއްވުމުގެ މިނިވަންކަމާއި ޚިޔާލުފާޅު ކުރުމުގެ މިނިވަންކަމަށް ވަނީ ވަރަށް ބޮޑަށް ފުރުސަތު ހުޅުވާލެވިފައެވެ. އަދި އެކަމުގެ ނާޖާއިޒް ފައިދާ މިހާރުގެ އިދިކޮޅު ފަރާތްތަކުން އަންނަނީ ވަރަށް ބޮޑަށް ނަގަމުންކަން ވެސް ފާހަގަ ކުރެވެއެވެ.
