ލީޑްސްގެ އެއްބަސްވުން ބިއެލްސާ އާކޮށްފި

ލީޑްސް ޔުނައިޓެޑްގެ އެއްބަސްވުން އެ ޓީމުގެ އާޖެންޓީނާގެ ކޯޗު މާސެލޯ ބިއެލްސާ އާކޮށްފިއެވެ.

16 އަހަރަށްފަހު ލީޑްސް ޔުނައިޓެޑް އިނގިރޭސި ޕްރިމިއާ ލީގުގެ ޖާގައެއް ހޯދިއިރު، މިދިޔަ ސީޒަނުގައިވެސް އެޓީމަށް އިރުޝާދު ދީފައިވަނީ ބިއެލްސާއެވެ. ހައި ޕްރެސް އެޓޭކިންގ ފުޓްބޯޅަ ކުޅުވުމުގައި މަޝްހޫރު ބިއެލްސާ ވަނީ މިދިޔަ ސީޒަނުގައި ލީޑްސްގައި ރަނގަޅު މަސައްކަތެއް ކޮށްފައެވެ.

އެހެންކަމުން ކުރިއަށް އޮތް ސީޒަނުގެ ނިޔަލަށް ލީޑްސް ޔުނައިޓެޑުން ވަނީ އުމުރުން 65 އަހަރުގެ ބިއެލްސާ އެޓީމުގައި ބެހެއްޓުމަށް ނިންމާ އެއްބަސްވުން އާކޮށްފައެވެ. ގިނަ ދުވަސްތަކަކަށްފަހު ޕްރިމިއާ ލީގުގެ ޖާގައެއް ލީޑްސް ހޯދީ މިދިޔަ ސީޒަނުގެ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގެ ޗެމްޕިއަންކަން ހޯދައިގެންނެވެ.

މީގެ 30 އަހަރު ކުރިން އުފަން ގައުމު އާޖެންޓީނާގައި ކޯޗިންގ ކެރިއަރު ފެށި ބިއެލްސާ ވަނީ އާޖެންޓީނާ ގައުމީ ޓީމާއި، ޗިލީ އާއި، އެތުލެޓިކް ބިލްބާއޯ އަދި އޮލިމްޕިކް މާސޭއަށްވެސް ކޯޗުކޮށްދީފައެވެ. އަދި އާޖެންޓީނާއަށް 2004 ވަނަ އަހަރުގެ އޮލިމްޕިކްސްގެ ފުޓްބޯޅަ އިވެންޓުގައި ރަން މެޑަލް ހޯދައިދިނީ ބިއެލްސާގެ އިރުޝާދުގެ ދަށުންނެވެ.

ލީޑްސް ޔުނައިޓެޑުން އައު ސީޒަނަށް އެޓީމުގެ ސްކޮޑު ވަރުގަދަ ކުރުމުގެ މަސައްކަތް ކުރަމުން އަންނައިރު، އެޓީމުން މިހާތަނަށް ވަނީ ވެލެންސިއާއަށް ކުޅެމުން އައި ސްޕެއިންގެ ފޯވާޑް ރޮޑްރިގޯ މޮރޭނޯގެ ސޮއި ހޯދާފައެވެ.

މީގެ ކުރިން އިނގިރޭސި ފުޓްބޯޅައިގެ ވަރުގަދަ ބާރެއްގެ ގޮތުގައި އޮތް ލީޑްސް ޔުނައިޓެޑް ދެވަނަ ޑިވިޝަނަށް ރެލިގޭޓްވީ 2004 ވަނަ އަހަރުއެވެ. މީގެ ކުރިން ލީޑްސް ޔުނައިޓެޑުން ވަނީ ތިން ފަހަރެއްގެ މަތިން ފުރަތަމަ ޑިވިޝަނުގެ ޗެމްޕިއަންކަން ހޯދާފައެވެ. އަދި ވަނީ 2001 ވަނަ އަހަރުގެ ޔުއެފާ ޗެމްޕިއަންސް ލީގުގެ ސެމީ ފައިނަލްގައިވެސް ކުޅެފައެވެ.