އިތުރު 66 މީހަކު ޕޮޒިޓިވްވެ، 271 މީހަކު ބަލިން ފަސޭހަވެއްޖެ

ކޮވިޑް-19 އަށް އިތުރު 66 މީހަކު ޕޮޒިޓިވްވެ، 271 މީހަކު ބަލިން ފަސޭހަ ވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުރާސްފަތި ދުވަހުގެ އިރުއޮއްސި 6:00 ގެ ނިޔަލަށް ޕޮޒިޓިވްވި 66 މީހުންގެ ތެރެއިން 50 މީހުންނަކީ ދިވެހިން ކަމަށާއި، 16 މީހުންނަކީ އެހެން ގައުމުތަކަށް ނިސްބަވްތާ މީހުން ކަމަށެވެ. އަދި 63 ކޭސް ރިޕޯޓު ކޮށްފައިވަނީ މާލެ ސަރަހައްދުން ކަމަށާއި، ތިން ކޭސް ރިޕޯޓު ކުރެވިފައިވަނީ އަތޮޅު ތެރެއިން ކަމަށް އެޗްޕީއޭއިން ބުނެއެވެ.

Advertisement

އެޗްޕީއޭ އިން ހާމަކޮށްފައިވާ މައުލޫމާތަށް ބަލާއިރު، މިހާތަނަށް ރާއްޖޭގައި ޕޮޒިޓިވްވި މީހުންގެ ޖުމްލަ އަދަދު ވަނީ 8900ށް އަރާފައެވެ. ރާއްޖޭގައި ބަލިން ރަނގަޅުވި މީހުންގެ އަދަދު ވަނީ 6559ށް އަރާފައެވެ. އަދި މިވަގުތު އެކްޓިވް ކޭސްގެ ގޮތުގައި ރިޕޯޓް ކޮށްފައިވަނީ 2304 ކޭސް އެވެ.

މީގެ އިތުރުން 1029 މީހަކަށް އައިސޮލޭޝަން ފެސިލިޓީތަކުގައި ފަރުވާ ދެމުންދާއިރު، 134 މީހަކަށް ހޮސްޕިޓަލްގައި ފަރުވާ ދެމުންދާ ކަަމށް އެޗްޕީއޭއިން ބުނެއެވެ.

126،675 ސާމްޕަލްއެއް މިހާތަނަށް ނަގާފައިވާއިރު، މިބަލީގައި ރާއްޖެއިން މިހާތަނަށް 31 މީހަކު ވަނީ މަރުވެފައެވެ. މަރުވި މީހުންގެ ތެރޭގައި ގިނައީ އުމުރުން ދުވަސްވީ މީހުންނެވެ.

އެޗްޕީއޭގެ ފަހުގެ ތަފާސްހިސާބުތައް ދައްކާގޮތުން ކޭސްތަކުގެ ޕީކް އަންނާނެ ދުވަސްވަރަކީ ނިމިދިޔަ އޮގަސްޓް މަހުގެ ފަހުކޮޅާއި މި ހިނގާ ސެޕްޓެމްބަރު މަހުގެ ފުރަތަމަ ހަފުތާތަކެވެ. މިހާރު 100ށްވުރެ ކޭސްތައް ރިޕޯޓު ކުރާ މިންވަރު ދަށްވި ނަމަވެސް ބަލީގެ ނުރައްކާ ކުޑަ ނުވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ. ނަޒްލާ ރަފީގު ވިދާޅުވެފައިވެއެވެ.

އެގޮތުން ރައްކާތެރިކަމަށް އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށް ޑރ. ނަޒްލާ އިލްތިމާސް ކޮށްފައިވެއެވެ.

ކޮވިޑް ކޭސްތައް ކޮންޓްރޯލް ކުރުމުގެ ގޮތުން އަޅާފައިވާ ބައެއް ފިޔަވަޅުތައް އިތުރަށް ވަރުގަދަ ކޮށްފައިވާއިރު، އާންމު ސިއްހަތުގެ ކުއްލި ނުރައްކަލުގެ ހާލަތު ވަނީ އަންނަ މަހުގެ 6 ވަނަ ދުވަހާ ހަމައަށް އިތުރު ކޮށްފައެވެ.