ޗެލްސީން ޚަރަދުކުރާ ގޮތަށް ލިވަޕޫލުން ޚަރަދެއް ނުކުރާނެ: ކްލޮޕް

މި ފަހަރުގެ ޓްރާންސްފާ ބާޒާރުގައި ކުޅުންތެރިން ގެންނަން ޗެލްސީން ޚަރަދުކުރާ ގޮތަށް ލިވަޕޫލުން ޚަރަދު ނުކުރާނެ ކަމަށް އެ ޓީމުގެ ކޯޗު ޔާގެން ކްލޮޕް ބުނެފިއެވެ.

ފްރޭންކް ލަމްޕާޑްގެ އިރުޝާދުގެ ދަށުން ކުޅެމުން އަންނަ ޗެލްސީން އަންނަނީ މި ފަހަރުގެ ޓްރާންސްފާ ބާޒާރުގައި ވަރަށް ބޮޑަށް ހަރަކާތްތެރިވަމުންނެވެ. އެގޮތުން މިހާތަނަށް އެ ކުލަބުން ވަނީ ހަތް ކުޅުންތެރިއެއްގެ ސޮއި ހޯދާފައެވެ. އެއީ ބަޔާ ލެވަކޫސެނަށް ކުޅެމުން އައި ޖަރުމަންގެ ޒުވާން ތަރި ކައި ހަވާޓްޒް އާއި، ޒުވާން ޑިފެންޑަރު މަލަންގް ސާ އާއި، ލެސްޓާ ސިޓީގެ ޑިފެންޑަރު ބެން ޗިލްވެލް އާއި، އާރްބީ ލެއިޕްޒީގްގެ ފޯވާޑް ޓިމޯ ވާނާ އާއި، އަޔަކްސްގެ ހަކީމް ޒިޔެކް އާއި ޕީއެސްޖީއަށް ކުޅުނު ބްރެޒިލްގެ ޑިފެންޑަރު ތިއާގޯ ސިލްވާގެ އިތުރުން ނެދަލެންޑްސްގެ ޒުވާން ޑިފެންޑަރު ވިއޭ އެމްބުޔަމްބާއެވެ.

މި ހަތް ކުޅުންތެރިންނަށް ޗެލްސީން 200 މިލިޔަން ޕައުންޑް ޚަރަދުކުރި ކަމަށް ރިޕޯޓުތައް ބުނެއެވެ. އޭގެ ބަދަލުގައި ޗެމްޕިއަންކަން ލިވަޕޫލުން މި ފަހަރުގެ ޓްރާންސްފާ ބާޒާރުގައި ގެނައި ހަމައެކަނި ކުޅުންތެރިޔަކީ އޮލިމްޕިއާކޯސްއަށް ކުޅެމުން އައި ގްރީސްގެ ޒުވާން ޑިފެންޑަރު ކޮސްޓަސް ސިމިކާސްއެވެ. އުމުރުން 24 އަހަރުގެ ޑިފެންޑަރު ލިވަޕޫލަށް ބަދަލުވީ 11.75 މިލިއަން ޕައުންޑަށެވެ.

ދާދި ފަހުން ބީބީސީއަށް ދިން އިންޓަވިއުއެއްގައި ކްލޮޕް ބުނީ ލިވަޕޫލްގެ ވިސްނުން އެންމެ ރެޔަކުން ބަދަލުކުރުމަށްފަހު، ޗެލްސީން ކުރާ ގޮތަށް ކަންތައްތައް ކުރާށޭ ނުބުނެވޭނެ ކަމަށެވެ. އަދި ޗެލްސީން ގިނަ ކުޅުންތެރިންތަކެއްގެ ސޮއި ހޯދިއިރު، އެކަމުގެ ފައިދާ ޗެލްސީއަށް ކޮށްފާނެ ކަމަށާއި، އެކަމަކު ދުނިޔޭގެ އެންމެ މޮޅަށް ކުޅޭ 11 ކުޅުންތެރިން ގަނެގެން، ޖެހިގެން އަންނަ ހަފުތާގައި އެ މީހުން އެންމެ މޮޅު ފުޓްބޯޅަ ކުޅޭނެ ކަމަށް އުއްމީދު ނުކުރެވޭނެ ކަމަށްވެސް ކްލޮޕް ބުންޏެވެ.

ކްލޮޕް އިތުރަށް ބުނީ ޗެލްސީން ކުރާ ގޮތަށް ލިވަޕޫލުން ޚަރަދު ނުކުރާނެ ކަމަށާއި، ލިވަޕޫލަށް އޮތް ފައިދާއަކީ އެކުގައި ގިނަ ތަމްރީނުތަކެއް ކުރި ގްރޫޕެއް އޮތުން ކަމަށެވެ. އަދި އޭނާ ބޭނުންވާ މަގާމަކަށް ކުޅުންތެރިން ހޯދައިގެން ކުރިއަށް ދިއުމުގެ އުސޫލު މާ ކަމުދާ ކަމަށްވެސް ކްލޮޕް ބުންޏެވެ.

އައު ސީޒަނަށް ލިވަޕޫލުން މިހާތަނަށް އެންމެ ކުޅުންތެރިއެއް އެޓީމަށް ގެނައިރު، މިހާރު އަންނަނީ ބަޔާން މިއުނިކަށް ކުޅެމުން އަންނަ ސްޕެއިން މިޑްފީލްޑަރު ތިއާގޯ އަލްކަންޓާރާ ހޯދުމުގެ މަސައްކަތް ކުރަމުންނެވެ. އަދި މި ޓްރާންސްފާ ބާޒާރުގައި ލިވަޕޫލަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް ބާސެލޯނާއަށް ވިއްކާލާނެ ކަމަށްވެސް ރިޕޯޓުތައް ބުނެއެވެ.