ރަން ވަނަ އެވޯޑް މި އަހަރު ނުދޭ ގޮތަށް ނިންމައިފި
10 ސެޕްޓެމްބަރު 2020 | ބުރާސްފަތި 18:13އިތުރު ކެޓަގަރީތަކެއް ވަނީ ކުރިން އިއުލާން ކޮށްފައި
އިންފޮމޭޝަން ކޮމިޝަނަރުގެ އޮފީހުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ކޮވިޑް-19 ގެ ސަބަބުން މައުލޫމާތު ހާމަ ކުރުމުގެ ރަންވަނަ އެވޯޑާއި މީޑިއާތަަކަށް ދޭ އެވޯޑް މި އަހަރު ނުދޭ ގޮތަށް ނިންމައިފިއެވެ.
ބުރާސްފަތި ދުވަހު އިންފޮމޭޝަން ކޮމިޝަނަރުގެ އޮފީހުން ނެރެފައިވާ ބަޔާނެއްގައި ބުނީ، މި އަހަރުގެ އެވޯޑް ނުދެވުނަސް އަންނަ އަހަރުން ފެށިގެން އެ އެވޯޑުތައް ގަވާއިދުން ދެމުންދާނެ ކަމަށެެވެ.
ރަން ވަނަ އެވޯޑަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުގެ މަތިން ދައުލަތުގެ އިދާރާތަކުން، އެ އިދާރާއެއްގެ އަމިއްލަ އިސްނެގުމުގެ މަތިން ވީހާ ވެސް ގިނައިން މައުލޫމާތު އާންމު ކުރުމަށް ހިތްވަރު ދިނުމަށާއި، ފަސޭހަ ކަމާއެކު މައުލޫމާތު ލިބޭނެ ގޮތަށް މައުލޫމާތު ބެލެހެއްޓުމަށް ބާރުއެޅުމަށްޓަކައި އިންފޮމޭޝަން ކޮމިޝަނަރުގެ އޮފީހުން ދޭ އެވޯޑެކެވެ.
މީގެ ކުރިން މި އެވޯޑް ދެމުން އައި ދައުލަތުގެ އިދާރާތަކުން ވިޔަސް މި އަހަރުން ފެށިގެން "ރަން ވަނަ އެވޯޑް" ނޫސްވެރިންނަށާއި ނޫސް އެޖެންސީތަކަށް ވެސް ދޭ ގޮތަށް އިންފޮމޭޝަން ކޮމިޝަނުން ވަނީ ނިންމާފައެވެ.
މައުލޫމާތު ހޯދުމުގެ ރަން ވަނައިގެ އެވޯޑް، ތަފާތު 10 ކެޓަގަރީއަކުން ދޭން ވަނީ ނިންމާފައެވެ. އެގޮތުން، އަލަށް ތައާރަފު ކުރެވޭ ހަތަރު އެވޯޑާއެކު، ރައީސް އޮފީހާއި ސަރުކާރުގެ ވުޒާރާތައް ހިމެނެނީ ވަކި ކެޓަގަރީއެއްގައެވެ.
ރައްޔިތުންގެ މަޖިލީހާއި މިނިވަން މުއައްސަސާތައް ވަކި ކެޓަގަރީއެއްގައި ހިމެނޭއިރު، ޝަރުއީ ދާއިރާއަށް ވެސް ވަކި ކެޓަގަރީއެއް ހާއްސް ކޮށްފައިވާ ކަމަށް އިންފޮމޭޝަން ކޮމިޝަނަރު ހުސެއިން ފިޔާޒް މޫސާ ވަނީ ވިދާޅުވެފައެވެ.
