އިންޑިއާގެ ފަތުރުވެރިން ރާއްޖެ އައުން އިތުރުކުރަންޖެހޭ: ޓޫރިޒަމް މިނިސްޓަރ
10 ސެޕްޓެމްބަރު 2020 | ބުރާސްފަތި 04:14ފަތުރުވެރިކަމުގެ ދާއިރާ ތަރައްގީކުރުމަށް ރާއްޖެއާއި އިންޑިއާ ދެމެދު މަޝްވަރާކުރެވުނު
ޓޫރިޒަމް މިނިސްޓަރާއި އިންޑިއާގެ ހައި ކޮމިޝަނަރ ބޭއްވެވި ބައްދަލުވުމުގެ ތެރެއިން
ފަތުރުވެރިކަމާއެކު ގިނަ ދާއިރާތަކެއް ތަރައްގީކުރުމަށް ރާއްޖެއާއި އިންޑިއާ ދެމެދު މަޝްވަރާތަކެއް ކުރިއަށްގެންގޮސްފިއެވެ.
ރާއްޖެއަށް އިންޑިއާގެ ފަތުރުވެރިން ގެނައުން އިތުރުކުރުމާއި ގުޅޭގޮތުން ބުދަ ދުވަހު ޓޫރިޒަމް މިނިސްޓަރ ޑރ. އަބްދުﷲ މައުސޫމާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރް ބޭއްވެވި ބައްދަލުވުމުގައި, އިންޑިއާގެ އިންވެސްޓަރުންގެ އެހީތެރިކަމާއެކަމާއެކު، ރާއްޖޭގެ ކުދި އަދި މެދު ފަންތީގެ ވިޔަފާރިތަކާއި ފަތުރުވެރިކަމުގެ ސިނާއަތުގައި އިންސާނީ ވަސީލަތް ތަރައްގީކުރުމާ ގުޅޭ ގޮތުން މަޝްވަރާކުރައްވާފައެވެ.
މި ބައްދަލުވުމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ޓޫރިޒަމް މިނިސްޓަރ މައުސޫމް ވިދާޅުވީ، އިންޑިއަކީ ކޮވިޑްގެ ކުރިން ރާއްޖެއަށް ދެވަނައަށް އެންމެ ގިނައިން ފަތުރުވެރިން އަންނަ ގައުމު ކަމަށެވެ. އަދި އިންޑިއާއަކީ ރާއްޖެއާ އެންމެ ކައިރި ގައުމުކަމަށްވާއިރު، އެ ގައުމުން ގިނަ އަދަދެއްގެ ފަތުރުވެރިން ރާއްޖެ ގެނައުމަކީ ޓޫރިޒަމް އިންޑަސްޓްރީ ފުޅާވެގެންދާނެ ކަމެއްގެ ގޮތުގައި ދެކޭ ކަމަށެވެ.
އިންޑިއާ އާއި ގުޅިގެން ފަތުރުވެރިކަމުގެ ދާއިރާ ކުރިއަރުވަން ގިނަ މަސައްކަތްތަކެއް ކުރުމަށް ނިންމާފައިވާކަން ފާހަގަކުރައްވާ މިނިސްޓަރ ވިދާޅުވީ، އެ ސިނާއަތުގައި މަސައްކަތްކުރާ މުވައްޒަފުން ތަމްރީނުކުރުމަށް ފުރުސަތުތައް ހޯދާ ދިނުމާއި މަތީ ވަޒީފާތަކަށް އަހުލުވެރިކުރުވުމަށް ބޭނުންވާ ތަމްރީނުގެ ފުރުސަތުތަކާ ގުޅޭގޮތުން މަޝްވަރާ ކުރެވުނު ކަމަށެވެ.
މިނިސްޓަރ ވިދާޅުވީ އިންޑިއާއަކީ މި ވަގުތު ކޮވިޑްގެ ބަލިމަޑުކަން ދުނިޔޭގައި ދެވަނައަށް އެންމެ ގިނަ ގައުމު ނަމަވެސް، އެގައުމުގެ ފަތުރުވެރިންނަށް ވެސް ރާއްޖޭގެ ބޯޑަރުން އެތެރެވެވޭނީ ހަދަންޖެހޭ ޓެސްޓްތައް ހަދައިގެން ކަމަށެވެ.
ރާއްޖެއަކީ މިވަގުތު ބޯޑަރ ޕީސީއާރު ތައާރަފްކޮށްފައިވާ ގައުމެއްކަން ފާހަގަކުރައްވާ މިނިސްޓަރ ވިދާޅުވީ، އެކި ގައުމުތަކުގެ ފަތުރުވެރިން ރާއްޖެ އެތެރެވާއިރު ކުރިއަށްވުރެން ބޮޑަށް އެފަރާތްތައް މޮނިޓަކޮށް، ބަލިހުރި ފަރާތްތައް ދެނެގަނެވޭނެ ކަމަށެވެ. އަދި އޭގެ ސަބަބުން ފަތުރުވެރިކަމުގެ ސިނާއަތުގައި މަސައްކަތްކުރައްވާ ފަރާތްތަކާއި އާންމު ރައްޔިތުންނަށްވެސް ވަރަށް ބޮޑު އިތުބާރެއް ލިބިގެންދާނެ ކަމަށް މިނިސްޓަރު ވިދާޅުވިއެވެ.
އިންޑިއާގެ ފަތުރުވެރިން ގެނައުން އިތުރުކުރަން ޓޫރިޒަމް މިނިސްޓަރާއި އިންޑިއާގެ ސަފީރު މަޝްވަރާކުރެއްވި އިރު، ކޮވިޑް-19 އާ ގުޅިގެން ރާއްޖޭގެ ބޯޑަރު ބަންދުކުރުމުގެ ކުރިން ރާއްޖެއަކީ އިންޑިއާގެ ފަތުރުވެރިންގެ މެދުގައި މަގްބޫލު މަންޒިލެކެވެ. އެގޮތުން މިދިޔަ އަހަރު އަހަރު ރާއްޖޭގެ ދެވަނަ އަށް އެންމެ ގިނައިން ފަތުރުވެރިން އައިސްފައިވަނީ އިންޑިއާ އިންނެވެ.
