އިމާރާތް ތެރޭގައި ވެސް މާސްކު އަޅަން ޖެހޭ ގޮތަށް ޗެކް ރިޕަބްލިކްގައި މަޖުބޫރު ކުރަނީ

އިމާރާތް ތެރޭގައި ވެސް މާސްކު އަޅަން ޖެހޭ ގޮތަށް ޗެކް ރިޕަބްލިކްގައި މަޖުބޫރު ކުރަން ނިންމައިފިއެވެ.

މިކަން ހާމަކޮށް އެގައުމުގެ ހެލްތު މިނިސްޓަރު އެޑަމް ވޯޗެޝް ކުރެއްވި ޓްވީޓެއްގައި ވިދާޅުވީ ބުރާސްފަތި ދުވަހުން ފެށިގެން މިގޮތަށް އަމަލު ކުރަން މަޖުބޫރު ކުރަން ނިންމާފައިވާ ކަމަށެވެ. އަދި އެގައުމުގައި ކޮވިޑް-19 ގެ ކޭސްތައް ފެންނަ މިންވަރު އިތުރުވަމުންދާ ކަމަށާއި މިގޮތަށް ނިންމީ އެ ޤައުމުގައި ބަލި ކޮންޓްރޯލު ކުރުމުގެ ގޮތުން ކަމަށެވެ. އަދި މި ނިންމުން ނިންމީ ކަމާބެހޭ މާހިރުންނާއި މަޝްވަރާ ކުރުމަށް ފަހު ކަމަށް ވެސް މިނިސްޓަރު ވަނީ ފާހަގަކުރައްވާފައެވެ.

ޗެކް ރިޕަބްލިކް ސަރުކާރުން މިގޮތަށް ނިންމާފައިވާއިރު، އަންގާރަ ދުވަހު އެކަނި ވެސް އެގަ އުމުން ވަނީ 1،1164 މީހުން ކޮވިޑް-19 އަށް ޕޮޒިޓިވްވެފައެވެ.

ތަފާސްހިސާބުތައް ދައްކާ ގޮތުން ޗެކް އިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު ވަނީ މިހާރު 29,877 އަށް އަރާފައެވެ. އަދި ބަލިޖެހުނު މީހުންގެ ތެރެއިން 20,164 މީހުން ބަލިން ރަނގަޅުވެފައިވާ އިރު، 441 މީހުން ވަނީ ބަލީގައި މަރުވެފައެވެ.