މަނަފަރު ރިސޯޓުން މުވައްޒަފުން ވަކި ކުރާ މައްސަލައިގެ ކަންބޮޑުވުންތަކާއެކު މެންބަރުން މިނިސްޓަރުގެ އަރިހަށް

ރައްޔިތުންގެ މަޖިލީހުގައި ހއ. އަތޮޅު ތަމްސީލު ކުރައްވާ މެމްބަރުން އެ އަތޮޅުގެ ރިސޯޓަކުން ދިވެހިން ވަޒީފާއިން ވަކި ކުރަމުންދާތީވެ އެ ކަމުގެ ކަންބޮޑުވުން ޓޫރިޒަމް މިނިސްޓަރު ޑރ. މައުސޫމްްއާ ހިއްސާ ކުރައްވައިފިއެވެ.

ހޯރަފުށި ދާއިރާގެ މެމްބަރު އަހުމަދު ސަލީމް (ސައްލެ) އާއި ބާރަށު ދާއިރާގެ މެމްބަރު އަހުމަދު އަބްދުﷲ އާއި އިހަވަންދޫ ދާއިރާގެ މެމްބަރު މުހައްމަދު ޝިފާއު އާއި ކެލާ ދާއިރާގެ މެމްބަރު އިބްރާހިމް ޝަރީފް (އިބްރޭ) ގެ އިތުރުން ދިއްދޫ ދާއިރާގެ މެމްބަރު އަބްދުﷲ ވަހީދު ވަނީ އާދިއްތަ މިނިސްޓަރު އަރިހަށް ވަޑައިގެންފައެވެ.

އާދީއްތަ ދުވަހު ކުރިއަށް ދިޔަ އެ ބައްދަލުވުމުގައި ކުރެވުނު މަޝްވަރާތަކާއި ގުޅޭ ގޮތުން ރާއްޖެ.އެމްވީ އަށް މައުލޫމާތު ހިއްސާ ކުރައްވަމުން މެންބަރު ސަލީމް ވިދާޅުވީ، އެންމެ ބޮޑު އެއް ކަންބޮޑުވުމެއްގެ ގޮތުގައި މިނިސްޓަރާ ހިއްސާ ކުރެއްވީ، މަނަފަރުން ގިނަ އަދަދެއްގެ މުވައްޒަފުން ވަކި ކުރަމުންދާ މައްސަލަ ކަމަށެވެ.

އޭގެ އިތުރުން ސަރުކާރުން އެ އަތޮޅުގައި ޓޫރިޒަމް ތަރައްގީ ކުރަން ސަރުކާރުން ކުރަމުންދާ މަސައްކަތުގެ ތަފްސީލުތަކާއި މައުލޫމާތު ސާފު ކުރައްވާފައިވާ ކަމަށެވެ. ސަލީމް ވިދާޅުވި ގޮތުގައި މިނިސްޓްރީން އެކަންތައްތައް ހައްލު ކުރަން މަސައްކަތްތަކެއް ކުރަމުންދާ ކަމަށް މިނިސްޓަރު ހިއްސާ ކުރެއްވިއެވެ.

ކޮވިޑް-19 ގެ ބަލިމަޑުކަމުގެ ހާލަތު ކުރިމަތިވި ފަހުން ޓޫރިޒަމް ސިނާއަތް ވަރަށް ބޮޑަށް ހުއްޓި، ގިނަ ރިސޯޓްތަކުން މުވައްޒަފުން ވަކި ކުރަމުންދާ ކަމުގެ މައްސަލަ ވަރަށް ބޮޑަށް ފާހަގަ ކުރެވިފައިވެއެވެ.

މި ހާލަތުގައި ވަޒީފާ އިން ވަކިކުރަމުންދާ މުވައްޒަފުންނާއި ލިބޭ އާމްދަނީ އަށް އަސަރު ކޮށްފައިވާ މަސައްކަތްތެރިންނަށް ސަރުކާރުގެ ފަރާތުން ވަނީ އިންކަމް ސަޕޯޓް އެލަވަންސް ދޭން ފަށާފައެވެ.

ހއ. އަތޮޅުގައި ޓޫރިޒަމް ސިނާއަތް އިތުރަށް ތަރައްގީ ކުރުމާ ގުޅޭ ގޮތުން އެ އަތޮޅު މެންބަރުން ޓޫރިޒަމް މިނިސްޓަރާ މަޝްވަރާ ކުރެއްވިއިރު، ހއ. އަތޮޅާއި ހދ. އަތޮޅަކީ ޓޫރިޒަމް ވިޔަފާާރި އެންމެ ކުޑަކޮށް އޮތް ދެ އަތޮޅެވެ.

މި ސަރުކާރުގެ ސިޔާސަތަކީ ވެސް ޓޫރިޒަމްގެ ވިޔަފާރި އެންމެ ކުޑަކޮށް ހިނގަމުންދާ ސަރަހައްދުތަކަށް އިސްކަން ދީގެން ޓޫރިޒަމް ރިސޯޓާއި ވިޔަފާރިތައް ތަރައްގީ ކުރުމެވެ. އެގޮތުން މިދިޔަ އަހަރު ޓޫރިޒަމް ރިސޯޓްތައް ތަރައްގީ ކުރަން ބައެއް ރަށްތައް ކަނޑައަޅައި، ހުޅުވާލާފައި ވެސް ވެއެވެ.

މަނަފަރާއި ގުޅޭ ކަންބޮޑުވުންތަކެއް މެމްބަރުން މިނިސްޓަރާއި ހިއްސާ ކުރެއްވިއިރު، އެ ރިސޯޓުން ގިނަ އަދަދެއްގެ މުވައްޒަފުން ވަކި ކުރާ މައްސަލަ މީގެ ކުރިން ވެސް ވަނީ މުޒާހަރާތަކެއް ކޮށްފައެވެ. ރާއްޖޭގެ އަތޮޅުތަކަށް ބަލާއިރު ހއ އަދި ހދ. އަތޮޅަކީ އެންމެ ބޮޑަށް ޓޫރިޒަމް ތަރައްގީ ކުރަން ޖެހިފައިވާ އަތޮޅެވެ. އެހެން އަތޮޅުތަކާއި ބަލާއިރު އެ އަތޮޅުގައި ރިސޯޓުގެ ތަކުގެ އަދަދު މަދެވެ. ދާދި ފަހަކާއި ޖެހެންދެން ހދ. އަތޮޅުގެ ޒުވާނުންތަކެއް އިސްނަގައިގެން ޓޫރިޒަމް ޕްރޮމޯޓް ކުރަން ގިނަ ހަރަކާތްތަކެއް ވަނީ ހިންގާފައެވެ.