އެކައުންޓުތަކުން ކެނޑެނީ ކެނޑެން ޖެހޭ ފައިސާ: ބީއެމްއެލް
6 ސެޕްޓެމްބަރު 2020 | އާދީއްތަ 13:42އެއީ ބޭންކުން ފައިސާ ނުކަނޑައި "ހޯލްޑް" ކުރެވިފައިވާ މުއާމަލާތްތަކުގެ ފައިސާ
ބީއެމްއެލްގެ އޭޓީއެމް- ބޭންކުން ބުނެފައިވަނީ ކަނޑަމުން ދަނީ ކުރީގެ ޓްރާންސެކްޝަން ތަކުގެ ފައިސާކަމަށް
ބޭންކް އޮފް މޯލްޑިވްސް (ބީއެމްއެލް) ގެ އެކައުންޓުތަކުން ކެނޑެމުންދަނީ ކެނޑެން ޖެހޭ ފައިސާ ކަމަށް އެ ބޭންކުން ބުނެފިއެވެ.
ބީއެމްއެލްގެ ކަސްޓަމަރުންގެ އެކައުންޓުތަކުން ގިނަ އަދަދެއްގެ ފައިސާތަކެއް ކެނޑެމުންދާ މައްސަލަ ފެންމަތިވެފައި ވަނިކޮށް ބޭން ކުރި ކުރި ޓްވީޓެއްގައި ބުނީ، ފާއިތުވި ދުވަސްތަކުގައި ބީއެމްއެލް ކަސްޓަމަރުންގެ އެކައުންޓުތަކުން އެފަދައިން ކެނޑިފައިވަނީ ކެނޑެން ޖެހޭ ފައިސާ ކަމަށެވެ. އެގޮތުން އެއީ ކުރީގެ މުއާމަލާތްތަކަށް ބޭންކުން ފައިސާ ނުކަނޑައި "ހޯލްޑް" ކުރެވިފައި ތިބި މުއާމަލާތްތަކުގެ ފައިސާ ކަމަށް ބީއެމްއެލްއިން ބުނެއެވެ.
އޭގެ އިތުރުން، އިންޓަރނެޓު ބޭންކިންގ މެދުވެރިކޮށް އެކަމާ ގުޅޭ ތަފްސީލުތަކާއި، ޓްރާންސެކްޝަން ތަކުގެ ތާރީޚުތައް ބަލާލެވޭނެ ކަމަށް ބީއެމްއެލްއިން ބުނެފައިވެއެވެ. އަދި އެކަމާ ގުޅިގެން ކުރިމަތިވަމުންދާ ދަތިތަކަށް ބީއެމްއެލްއިން ވަނީ ކަސްޓަމަރުންގެ ކިބައިން މާފަށް އެދިފައެވެ.
ބީއެމްއެލް އިން އިތުރަށް ބުނީ، އޮޅުވާލައިގެން ފައިސާ ހޯދުމަށް ބޭނުން ކުރާ "ސްކޭމް" އީމެއިލްތައް އިތުރުވަމުންދާކަން ފާހަގަ ކުރެވޭ ކަމަށެވެ. އެގޮތުން އެކައުންޓް ވެރިފައި ކުރުމަށް ކަމަށް ބުނެ ކަސްޓަމަރުންނަށް ބީއެމްއެލްގެ ނަމުގައި މެއިލްތައް ފޮނުވަމުންދާ ކަމަށް ބުނެފައިވެއެވެ. އެހެން ނަމަވެސް، އެފަދަ މެއިލްތަކަށް ޖަވާބުދާރީ ނުވުމަށް ބޭންކުން ވަނީ އިލްތިމާސް ކޮށްފައެޗެ.
އޭގެ އިތުރުން، ޓްރާންސެކްޝަންތަކާ ގުޅިގެން އެއްވެސް މައްސަލައެއް އުޅޭނަމަ، "ކާރޑް ޓްރާންސެކްޝަން ޑިސްޕިއުޓް ފޯމް" ފުރުމަށްފަހު ހުށައެޅުމަށް ބީއެމްްއެލްއިން ވަނީ އެދިފައެވެ.
ފާއިތުވި ދުވަސްތަކުގައި މިފަދަ ގިނަ މައްސަލަތަކެއް ފެންމަތިވެފައިވާއިރު، ބީއެމްއެލްއިން އެއް ޓްރާންސެކްޝަނަކަށް ދެފަހަރަށް ފައިސާ ކަނޑަމުންދާ ކަމަށް ގިނަ އަދަދެއްގެ އާންމުން ދަނީ ތުހުމަތު ކުރަމުންނެވެ. އެހެން ނަމަވެސް ބީއެމްއެލް އިން ބުނެފައިވަނީ އެއީ ކުރިން ކާޑުން ކަނޑާފައިވާ ފައިސާގެ މުއާމަލާތްތަކަށް ބޭންކުގައި "ސެޓެލް" ނުކުރެވި ހޯލްޑް ކުރެވިފައިވާ މުއާމަލާތްތައް ކަމަށެވެ. އަދި އޭރު ހޯލްޑް ކުރެވިފައިވާއިރު، އެކައުންޓުން އެ ފައިސާ ކަނޑާފައި ނުވާނެ ކަމަށް ބީއެމްއެލްއިން ބުނެފައިވެއެވެ.
އެހެން ނަމަވެސް ބައެއް ކަސްޓަމަރުންނަށް އޯގަސްޓް މަހުގެ ކުރީކޮޅުގެ ޓްރާންސެކްޝަންތަކަށް ސެޕްޓެމްބަރު މަހުގެ ތެރޭގައި ވެސް ފައިސާ ކަނޑާފައިވެއެވެ. އެއާއެކު، އެހާ ގިނަ ދުވަސްތަކަށްފަހު ކުރިން ކޮށްފައި ހުރި މުއާމަލާތްތަކަކަށް ފައިސާ ކަނޑަމުންދާތީ ކަސްޓަމަރުން ދަނީ އެކަމުގެ ނުރުހުން ފާޅު ކުރަމުންނެވެ.
