ކަރަންޓީނުގައި ތިބޭ ފަރާތްތަކަށް ހާއްސަ ޗުއްޓީއެއް ދިނުމަށް ކަނޑައަޅާ ގާނޫނު ފާސްކޮށްފި
6 ސެޕްޓެމްބަރު 2020 | އާދީއްތަ 07:23މެޑިކަލް ސެޓްފިކެޓެއް ހުށައަޅާކަށް ނުޖެހޭނެ
ވެލާނާގެ: ސަރުކާރުގެ ވަކި އޮފީސްތަކެއް ހުންނަ އިމާރާތެއް
ކަރަންޓީނުގައި ހުންނަން ޖެހޭ ހާލަތުގައި ހާއްސަ ޗުއްޓީއެއް ދޭންޖެހޭ ގޮތަށް ކަނޑައަޅާ 'އާއްމު ސިއްހަތުގެ ކުއްލި ނުރައްކަލުގެ ބިލު 2020' ފާސްކޮށްފިއެވެ.
މި ބިލަށް އިޖްތިމާއީ ކޮމިޓީން ގެނައި އިސްލާހުތަކާއި އެކު މަޖިލީހުން ބިލު ފާސްކުރީ 57 މެމްބަރުންގެ ވޯޓާއި އެކުއެވެ.
މި ބިލުގައި ކަރަންޓީނުގައި ހުންނަން ޖެހޭ ހާލަތުގައި ހާއްސަ ޗުއްޓީއެއް ހަމަޖައްސަދިނުމާއި ގުޅޭ މާއްދާގައިވާގޮތުން ރާއްޖޭގައި އިއުލާނުކޮށްފައިވާ އާއްމު ސިއްހަތުގެ ކުއްލި ނުރައްކަލުގެ ހާލަތުގެ ތެރޭގައި ރާއްޖެއިން ބޭރަށް ދަތުރުކުރުމަށްފަހު އަނބުރާ އައުމުގެ ސަބަބުން ނުވަތަ، ރާއްޖޭގައި ވަކި ރަށެއްގައި ހުރުމަށްފަހު އެ ރަށް ދޫކޮށް ދިއުމުގެ ސަބަބުން ކަރަންޓީނު ވާންޖެހޭ މުވައްޒަފުންނަށް، އެފަދަ މަރުކަޒެއްގައި ނުވަތަ، މެޑިކަލް ސެޓްފިކެޓެއް ހުށައަޅަން ޖެހުމަކާ ނުލާ، މުސާރަ ލިބޭ ގޮތަށް ހާއްސަ ޗުއްޓީއެއް ވަޒީފާދޭ ފަރާތުން ހަމަޖައްސަދޭންވާނެ އެވެ.
އަދި ބައްޔަށް ޝައްކުކުރެވޭ އަލާމާތެއް ފެނިގެން ކަރަންޓީނުވާންޖެހޭ މުވައްޒަފުންނަށް އެ މުއްދަތަށް އެމްސީއެއް ހުށައެޅުމަކާއި ނުލާ މުސާރަ ލިބޭ ގޮތަށް ޗުއްޓީއެއް ހަމަޖައްސަދޭންޖެހޭނެ ކަމަށް ވެއެވެ.
ކޮމިޓީ ރިޕޯޓުގައި ވަނީ މި ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތު ނުވަތަ އޭނާ ކަނޑައަޅާ ފަރާތަކުން ދޫކުރާ ލިޔުމެއް އޮތް ކޮންމެ ފަރާތަކަށް، މި ޗުއްޓީ ހަމަޖައްސައިދޭންވާނެ ކަމަށް ބަޔާންކޮށްފައެވެ.
މީގެއިތުރުން، ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި، ވަޒީފާ އަދާކުރާ ފަރާތެއް ދިރިއުޅޭ ރަށް ނޫން އެހެން ރަށެއްގައި އެފަރާތެއް ހުރިވަގުތެއްގައި ދަތުރުފަތުރުކުރުމާ ގުޅޭގޮތުން ޑިރެކްޓަރ ޖެނެރަލް އޮފް ޕަބްލިކް ހެލްތު އަޅާ ފިޔަވަޅަކާ ގުޅިގެން އޭނާ ވަޒީފާއަށް ނިކުންނަންޖެހޭ ތާރީޚަކަށް ވަޒީފާ އަދާކުރާ ރަށަށް އަނބުރާ ދެވެން ނެތް ޙާލަތެއް މެދުވެރިވެ އޭނާ ވަޒީފާއަށް ޙާޒިރުނުވެ ހުންނަން ޖެހުނު މުއްދަތަށް، މެޑިކަލް ސެޓްފިކެޓެއް ހުށަހަޅަންޖެހުމަކާ ނުލައި، މުސާރަ ލިބޭ ގޮތަށް، ޚާއްޞަ ޗުއްޓީއެއް ވަޒީފާދޭ ފަރާތުން ހަމަޖައްސައިދޭންވާނެ ކަމަށް ވެސް މި ބިލަށް ގެނައި އިސްލާހެއްގައިވެއެވެ.
އަދި ކޮވިޑަށް ފަރުވާ ހޯދަމުންދާ ޢާއިލާގެ މެންބަރެއް އެކަހެރިކުރުމުގެ މަރުކަޒެއްގައި ނުވަތަ ޞިއްޙީ ފަރުވާދޭ މަރުކަޒެއްގައި ހުންނަންޖެހޭ ހާލަތުގައި އެތަނުގައި އޭނާއާއެކު ވަޒީފާ އަދާކުރާ ފަރާތް ހުންނަންޖެހޭ ޙާލަތުގައި ވެސް މި ޗުއްޓީ ހަމަޖައްސައިދޭންވާނެ ކަމަށް ވެސް ކޮމިޓީ ރިޕޯޓުގައި ވެއެވެ.
ސަރުކާރުގެ ފަރާތުން މި ބިލު ހުށައެޅީ ކޮވިޑް-19 އާ ގުޅިގެން ރާއްޖޭގައި މެދުވެރިވެފައިވާ އާންމު ޞިއްޙަތުގެ ކުއްލި ނުރައްކަލުގެ ހާލަތުގައި ވަކިވަކި ފަރުދުންނާއި އާއިލާތަކާއި ވިޔަފާރިތަކަށް އެހީތެރިކަމާއި ރައްކާތެރިކަން ފޯރުކޮށްދިނުމަށްޓަކައި އަޅަންޖެހޭ ހާއްސަ ފިޔަވަޅުތައް އެޅުމަށާއި ދައުލަތް ހިންގުމުގެ ނިޒާމު މެދުކެނޑުމެއްނެތި ކުރިއަށް ގެންދިޔުމަށް މަގުފަހި ކުރުމަށްޓަކައި ކަމާބެހޭ ޤާނޫނުތަކުގައި ބަޔާންކުރާ އިޖުރާޢަތުތަކަށް މިހާރުން މިހާރަށް ކޮންމެހެން ގެންނަންޖެހޭ ވަގުތީ ބަދަލުތައް ގެނެސް އެކަންކަމާ ގުޅޭގޮތުން އަމަލުކުރާނެ ހާއްސަ އުސޫލުތައް ވަގުތީ ޤާނޫނަކުން ކަނޑައެޅުމަށެވެ.
