ކުމުންދޫ ކަނޑޫފަލުގައި ތަރައްގީ ކުރި ނޭޗާރ ޕާރކަށް މިނިސްޓަރ މައުސޫމުގެ ސާބަސް!

ކުމުންދޫ ކަނޑޫފަލުގައި ތަރައްގީ ކުރި ނޭޗާރ ޕާރކަށް ޓޫރިޒަމް މިނިސްޓަރ ޑރ އަބްދުﷲ މައުސޫމް ސާބަސް ރައްދު ކުރައްވައިފިއެވެ.

މި ޕާރކް ހުޅުވުމާއި ގުޅިގެން މަކުނުދޫ ދާއިރާގެ މެބްބަރު މުހައްމަދު ރާއީ ކުރެއްވި ޓްވީޓެއްގައި ވިދާޅުވީ، ކުުރެވި ޖަމިއްޔާއިން ހިންގާ "ޒީރް ސްޕޯޓްސް ކުލަބް"ން މި ޕާރކް ހުޅުވާފައިވަނީ ހޮނިހިރު ދުވަހުގެ ވަގުތެއްގައި ކަމަށެވެ. "ވެހިސަރާ" ގެ ނަމުން ނަން ދީފައިވާ މި ޕާރކަށް ކަރަންޓު ފޯރުކޮށްދެނީ ސޯލާ ޕެނެލް މެދުވެރިކޮށް ކަމަށް މެމްބަރު ރާއީގެ ޓްވީޓުގައި ފާހަގަ ކުރައްވާފައިވެއެވެ.

މެމްބަރު ރާއީ ވަނީ އެކަމުގައި މުޅި ރައްޔިތުންގެ ފުރިހަމަ އެއްބާރުލުމާއި ބައިވެރިވުން ލިބިގެންދިޔަކަން ފާހަގަ ކުރައްވައި އެކަމަށް ޝުކުރު އަދާ ކުރައްވާފައެވެ.

މެމްބަރު ރާއީގެ ޓްވީޓު ރީޓްވީޓު ކުރައްވައި މިނިސްޓަރ ވަނީ އެ މަސައްކަތަށް ސާބަސް ރައްދު ކުރައްވައި ތައުރީފު ކުރައްވާފައެވެ.

އެކަމާ ގުޅޭ އިތުރު މައުލޫމާތު ހިއްސާ ކުރައްވަމުން މެމްބަރު ރާއީ ވިދާޅުވީ، މި މަސައްކަތުގައި ރަށުގެ ކުޑަބޮޑު އެންމެން ބައިވެރިވި ކަމަށާއި، އެއްވެސް ސިޔާސީ ފިކުރަކަށް ނުވަތަ ބައިބައިވުމަކަށް ނުބަލައި، އެންމެން އެކަތިގަނޑެއްގެ ގޮތުގައި މަސައްކަތް ކޮށްފައިވާ ކަމަށެވެ. އަދި ރަށުގެ ޤުދުރަތީ ރީތިކަން މުޅި ރާއްޖެއަށް ދައްކާލައި، ކަނޑޫފަލުގެ ފުރިހަމަ ބޭނުންތެރިކަން ދުނިޔެއަށްވެސް ދައްކާލެވޭތީ އުފާ ކުރައްވާކަމަށް ރާއީ ވިދާޅުވިއެވެ.