މޯލްޑިވިއަނުން މެލޭޝިޔާ އަށް ކުރަން ހަމަޖެހިފައި އޮތް ދަތުރު ފަސްކޮށްފި
5 ސެޕްޓެމްބަރު 2020 | ހޮނިހިރު 12:22މިއީ ކުލަލަންޕޫރަށް ކުރާ ދަތުރެއް
މޯލްޑިވިއަންގެ ފްލައިޓެއް، ދަތުރު ފަސްކުރީ ގިނަ އަދަދެއްގެ ދަރިވަރުންގެ އެދުމުގެ މަތިން ކަމަށް މޯލްޑިވިއަންއިން ބުނޭ
ގިނަ އަދަދެއްގެ ދަރިވަރުންގެ އެދުމުގެ މަތިން ގައުމީ އެއަރލައިން މޯލްޑިވިއަނުން މެލޭޝިޔާ އަށް ކުރަން ހަމަޖެހިފައި އޮތް ދަތުރު ފަސްކޮށްފިއެވެ.
މެލޭޝިޔާގައި ގިނަ އަދަދެއްގެ ދިވެހި ދަރިވަރުން ދަނީ ތައުލީމު ހާސިލު ކުރަމުންނެވެ. ކޮވިޑް-19ގެ ހާލަތާއި ގުޅިގެން ގިނަ ދަރިވަރުން ރާއްޖެއަށް އައިސްފައިވާއިރު، ކިޔެވުން އަލުން ފެށޭތީ ބައެއް ދަރިވަރުންނަށް ވަނީ މެލޭޝިޔާ އަށް ދާން ބެނުންވާ ކަމަށް ބުނެފައެވެ.
ކުއަލަރލަމްޕޫރަށް ކުރާ އެ ދަތުރު ކުރިން ކުރަން ހަމަޖެހިފައި އޮތީ ސެޕްޓެމްބަރު 10 ގައެވެ. ނަމަވެސް މިހާރު އެ ދަތުރު ވަނީ މި މަހުގެ 20 ވަނަ ދުވަހަށް ފަސްކޮށްފައެވެ.
މޯލްޑިވިއަނުން ބުނީ އެ ދަތުރު ފަސްކުރީ ގިނަ އަދަދެއްގެ ދަރިވަރުން އެކަމަށް އެދެމުންދާތީ ކަމަށެވެ.
އެ ދަތުރުގެ އެއްކޮޅު ޓިކެޓުގެ އަގަކީ 385 ޑޮލަރު ކަމަށް މޯލްޑިވިއަނުން މައުލޫމާތުދެއެވެ.
މެލޭޝިޔާގައި ކޮވިޑް-19ގެ ހާލަތު ރަނގަޅުވާން ފަށާފައިވާއިރު، ސްކޫލު ޔުނިވާސިޓީތަކުގެ ކިޔެވުން ފެށުމަށް އެ ގައުމުން ދަނީ ތައްޔާރު ވަމުންނެވެ.
