ނ.އަތޮޅުގައި ހިންގަމުން އަންނަ ރިސޯޓެއްގެ ހިއްސާ އެ ކުންފުނީގެ ދިވެހި ހިއްސާދާރުންނަށް ނޭނގި އެހެން ފަރާތަކަށް ބަދަލުކޮށް، ކުރީގެ އިކޮނޮމިކް މިނިސްޓަރ އަދި މިހާރުގެ މާވަށު ދާއިރާގެ މެންބަރު މުޙައްމަދު ސައީދުގެ ނުފޫޒުން އެކަން ކޮށް ނިންމާލި މައްސަލަ ފެންމަތިވެއްޖެއެވެ.
ރާއްޖެއެމްވީ އަށް އެނގިފައިވާ ގޮތުގައި، ސަރުކާރުގެ %10 ހިއްސާއަކާއި، އަމިއްލަ ކުންފުންޏެއްގެ %90 ހިއްސާ ހިމެނޭ ގޮތަށް އެކުލަވާލާފައިވާ އެއްބަސްވުމެއްގެ ދަށުން މި ކުންފުނިން އޭރު ގެންދިޔައީ ރިސޯޓް ތަރައްޤީ ކުރުމުގެ މަސައްކަތް ކުރަމުންނެވެ. އެހެން ނަމަވެސް ރައީސް ޔާމީންގެ ސަރުކާރުން ކުއްލި ގޮތަކަށް ކުންފުނީގައި ހިމެނޭ ދިވެހި ހިއްސާދާރުންނަށް ރިސޯޓަށް އެރުން މަނާކޮށް، އޮފީހުން އެކްސަސްވެސް ކަނޑާލާފައެވެ.
ކުންފުނީގައި ހިމެނޭ ދިވެހި ހިއްސާދާރުން އެކަން ހިނގައި ދިޔަގޮތް ސަރުކާރުގެ ތެރެއިން ސާފު ކުރުމަށް އެތައް މަސައްކަތްތަކެއް ކޮށްފައިވާކަން ރާއްޖެއެމްވީއަށް އެނގިފައިވެއެވެ. އެހެންނަމަވެސް، ސަރުކާރު ބަދަލުވިއިރުވެސް އެކަން ހިނގާފައިވާ ގޮތް ހިއްސާދާރުންނަށް ސާފުކޮށްދީފައެއް ނުވެއެވެ. މި މައްސަލައިގައި ނާޖާއިޒް މަންފާއެއް ހޯދުމުގެ ގޮތުން އެކަމުގެ ތެރޭގައި ކުރީގެ ސަރުކާރުގެ ވެރިން އެތައް ގޯހެއް ހަދާފައިވާކަން ރާއްޖެއެމްވީން ބެލި ބެލުމުން ފާހަގަ ކުރެވުނެވެ.
ކަން ހިނގާފައިވާގޮތަށް ބަލާއިރު، އޭރުގެ ސަރުކާރުން ވަނީ ކުންފުނީގެ ހިއްސާދާރުންގެ ގޮތުގައި ތިބި 2 ދިވެހިން އުސޫލުން ބޭރުން ކުންފުނިން ބޭރުކޮށްފައެވެ. އަދި ދިވެހި ހިއްސާދާރުން ބޭރު ކުރުމަށްފަހު، އެފަރާތުގެ ހިއްސާ ބޭރުގެ ފަރާތްތަކަށް ވަނީ ދީފައެވެ. އެހެން ނަމަވެސް، ކުންފުނީގެ ދިވެހި ހިއްސާދާރުންނަށް ނޭނގި މި ކަމުގައި އެ ކުންފުނީގެ ހިއްސާ ބަދަލު ކޮށް އިކޮނޮމިކް މިނިސްޓްރީ ތެރެއިން އެކަންކޮށް ނިންމާލީ އޭރުގެ މިނިސްޓަރ ސީދާ ސައީދުގެ އެންގުމަށްކަމަށް އިތުބާރު ހުރި މަސްދަރަކުން ރާއްޖެއެމްވީއަށް ކިޔައިދީފައިވެއެވެ.
އޭގެ އިތުރުން، ކުންފުނީގައި އޮތް ސަރުކާރުގެ ހިއްސާވެސް ވީ ނުވީއެއް ނޭނގެއެވެ. އެންމެ ކުޑަމިނުން އެ ހިއްސާއާމެދު އަމަލު ކުރިގޮތް އޭރުގެ ބޯޑު މެމްބަރުންނާއި، ޝެއަރހޯލްޑަރުންނަށް އަންގާފައެއްވެސް ނުވެއެވެ.
2 ދިވެހިންގެ ހިއްސާ މިނިސްޓަރ ސައީދު ވަނީ ޓްރޭޑް މިނިސްޓްރީ ތެރެއިން އެ ދެ މީހުންނަށްވެސް ނާންގައި ބަދަލުކޮށްފައި ބޭރު މީހާގެ ނަމަށް، އޭރު ރަށް ޑިވޮލޮޕްކުރަންވެސް ފަށާފައި އޮތީ، ޑިވޮލޮޕް ކުރަމުން ދަނިކޮށް ކުއްލިއަކަށް ސައީދު އަޑީގައި ހުރެގެން އެކަން ކުރީ، ހަމަ ރަނގަޅަށްވެސް އުސޫލުން ބޭރުން އެކަން ކޮށްފައި އޮތީ، ރަނގަޅަށް ތަހުޤީޤު ކޮށްފިނަމަ މިކަން ވަރަށް ސާފުކޮށް ފެންނާނެ.އިތުބާރު ހުރި މަސްދަރަކުން ރާއްޖެއެމްވީއަށް ދިން އިންޓަރވިއުގެ ބައެއް
ދިވެހިރާއްޖޭގެ ކުންފުންޏާބެހޭ ޤާނޫނު ބުނާ ގޮތުން، ކުންފުންޏެއްގެ ހިއްސާ އެހެން ފަރާތަކަށް ބަދަލު ކުރެވޭނީ ކުންފުނީގެ ޑިރެކްޓަރުންގެ ބޯޑުގެ ހުއްދައާއެކުއެވެ. އަދި އެކަމަށްޓަކައި ފާސްކުރަންޖެހޭ ބޯޑް ރިސޮލިއުޝަނާއި ސެއަރ ޓްރާންސްފަރ ފޯމުތަށް ފުރިހަމަކޮށް، މިނިސްޓްރީއަށް އެ ލިއެކިއުންތައް ހުށައެޅުމުންނެވެ.
ރާއްޖެއެމްވީއަށް މައުލޫމާތު ދިން ފަރާތުން ބުނި ގޮތުގައި، ޔާމީން ސަރުކާރުގައި މި މައްސަލަ ކޯޓަށްވެސް ހުށައެޅުނު ކަމަށެވެ. އެހެން ނަމަވެސް، ކޯޓުންވެސް އޭރު ވަނީ މި މައްސަލަ ނުބަލައި ބޭރުކޮށްލާފައެވެ.
އޭގެ އިތުރުންވެސް މައްސަލަ ސަރުކާރުގެ އެކި ފަރާތްތަކަށް ހުށަހަަޅައިގެންވެސް ހިއްސާދާރުންނަށް ވީނުވީއެއް އެނގޭނެ ގޮތެއް ނުވި ކަމަށްވެއެވެ.
ޕީޕަލް ނެޝަނަލް ކޮންގްރެސް (ޕީއެންސީ) ގެ ނައިބު ރައީސްކަން ކުރައްވާ ސައީދަށް މިކަމުގައި މައުލޫމާތު ސާފު ކުރަން ގުޅުމުން އޭނާގެ ފޯނު ނިއްވާލާފައި އޮތުމުން ގުޅޭ ގޮތެއް ނުވިއެވެ.
