"ނުހައްގު ދައުވާ އާއި ބޭއިންސާފުން ރައްޔިތުން މިންޖުކުރަން ގާނޫނު އަސާސީ އިން އުފެއްދި އެންމެ ބާރުގަދަ މަގާމަކީ ޕީޖީ"
"ހައްގުތަކާއި މިނިވަންކަން ހިމާޔަތްކުރުމުގެ ބޮޑު ބުރަ މަސްއޫލިއްޔަތު އަދާކުރުމަށް ޕީޖީ ޝަމީމާއި ޕީޖީ އޮފީހުގެ މުވައްޒަފުން ކުރައްވާ މަސައްކަތަށް ސާބަސް"
ބަންޑާރަ ނައިބު އިބްރާހީމް ރިއްފަތު (ކ) އަދި ޕްރޮސެކިއުޓާ ޖެނެރަލް ހުސެއިން ޝަމީީމް (ވ)
ބަންޑާރަ ނައިބު އިބްރާހީމް ރިއްފަތު، ޕްރޮސެކިއުޓަރ ޖެނެރަލް ހުސެން ޝަމީމް ކުރައްވަމުން ގެންދަވާ މަސައްކަތް ފާހަގަ ކުރައްވާ އޭނާ އަށް ތައުރީފު ކުރައްވައިފި އެވެ.
ޕްރޮސެކިއުޓަރ ޖެނެރަލް އޮފީހަށް 12 އަހަރު ފުރުމާއި ގުޅިގެން ޕީޖީ ޝަމީމު ކުރެއްވި ޓްވީޓް ރީޓްވީޓް ކުރައްވަމުން ބަންޑާރަ ނައިބު ރިއްފަތު ވިދާޅުވީ ނުހައްގު ދައުވާ އާއި ބޭއިންސާފުން ރައްޔިތުން މިންޖު ކުރަން ގާނޫނު އަސާސީ އިން އުފެއްދި އެންމެ މުހިއްމު ނުވަތަ ބާރުގަދަ މަގާމަކީ ޕްރޮސިކިއުޓަރ ޖެނެރަލްގެ މަގާމު ކަމަށެވެ. ރިއްފަތު އިތުރަށް ވިދާޅުވީ ހައްގުތަކާއި މިނިވަންކަން ހިމާޔަތް ކުރުމުގެ ބޮޑު ބުރަ މަސްއޫލިއްޔަތު އަދާ ކުރުމަށް ޕީޖީ ޝަމީމާއި ޕީޖީ އޮފީހުގެ މުވައްޒަފުން ކުރައްވާ މަސައްކަތަށް ސާބަސް ދޭ ކަމަށެވެ.
ހުކުރު ދުވަހު ޕީޖީ އޮފީހުގެ އަހަރީ ދުވަހުގެ ތަހުނިޔާ އަރިސް ކުރައްވައި ޕީޖީ ވަނީ އަތު ލިޔުމުން ޚާއްސަ މެސެޖެއް ޓްވިޓަރގައި ހިއްސާ ކުރައްވާފައެވެ. އެގޮތުން ޕީޖީ ވަނީ 12 ވަނަ އަހަރީ ދުވަހުގެ ތަހުނިޔާ ޕީޖީ އޮފީހުގެ ކުރީގެ އަދި މިހާރުގެ މުވައްޒަފުންނަށް އަރިސް ކުރައްވައި، ޕީޖީ އޮފީހާމެދު ދެކިވަޑައިގަންނަވާ އަމާޒު ހިއްސާ ކުރައްވާފައެވެ.
2008 ވަނަ އަހަރުގެ އޯގަސްޓު މަހުގެ 7 ވަނަ ދުވަހު ދިވެހިރާއްޖޭގައި ވަކި ފަރާތަކަށް ބުރަ ނުވާ މުސްތަޤިއްލު ޕްރޮސިކިއުޓަރ ޖެނެރަލެއް ހުންނަންވާނެ ކަމަށް ޤާނޫނުއަސާސީގައި ކަނޑައެޅުމާ ގުޅިގެން، އެ އަހަރުގެ ސެޕްޓެމްބަރު މަހުގެ 4 ވަނަ ދުވަހު ޕީޖީ އޮފީސް އުފެދިގެން ދިޔައެވެ. އަދި ފުރަތަމަ ޕްރޮސިކިއުޓަރ ޖެނެރަލްގެ މަޤާމަށް އަލްއުސްތާޛް އަޙްމަދު މުޢިއްޒު ޢައްޔަންކުރެވިގެން ދިޔައީ ވެސް ހަމަ އެ ދުވަހުއެވެ.
އޭގެ އިތުރުން، ޖެހިގެން އައި އަހަރުގެ ފެބްރުއަރީ މަހުގެ 4 ވަނަ ދުވަހު ޑެޕިއުޓީ ޕްރޮސިކިއުޓަރ ޖެނެރަލްގެ މަޤާމަށް މިހާރުގެ ޕީޖީ ހުސައިން ޝަމީމް އައްޔަނު ކުރެވިގެން ދިޔައެވެ.
